¹ Nomba nge vyajendapo ivi, Imfumu yikasewa 70 awanji, poyikawatuma wawiri wawiri munthanzi mwakwe mutwaya tonsi utukulu namumalo gonsi go akawalagaukujendamo. ² Akanena kuwawo, " ukugowora kuli mwalwe mwalwe, ukwene awambombo wachefile. Ponomba muwuzge Imfumu umwenecho uwakugowora ukuti atumeso awakugowora. ³ Mujende munzira yinyu, Loli, nkhuwatuma ngati ng'onzi mukasi mumphumphi. ⁴ Mutakanyamule ichikwama chandalama, oro ichikwama chapawulendo, oro amagulubasi, po eso mutakalamuche nayumo pamusewo. ⁵ Po munyumba yonsi yomukuwala ukwinjilamo, munene suti, ' umutende wuwemo munyumba ino!' ⁶ Nanthi umwana uwamutende alimo mula, umutende winyu wukwinza ukutuzga pawuyo, ukwene nanthi wutalimo, wukwinza ukugaluchila kwimwe. ⁷ Musyale munyumba yilanyene, mulyanje nukung'wera vyowakuwapa, chifukwa uwambombo akwenela amalipiro gakwe. Mutakajendajendaje munyumba zgonsi. ⁸ Pomukaya komukwinjiramo, ponanthi wawapochelera imwe, mulye vyonsi vyo wawikazizga imwe ⁹ pomupozge awawine wowari kura. Munene kuwawo, uwu fumu ubwa Chiwuta bwa senjerera sana ukwinza kwimwe.' ¹⁰ Ukwene nanthi mukuwala ukwinjira mutwaya utukulu powatawapocherera, mufumemo nukujenda mutunzira twawo nukunena, ¹¹ 'Ninthukumbwi zgozgatudemerera kuvinama vyitu zgope tukuwapuputira mwewenecho! Ukwene mumanye ichi, Uwu Fumu bwa Chiwuta wuli papipi sana.' ¹² Nkhunena kwimwe ukuti pisiku lira umulandu uwa sodomu ukwinza ukuwako ichete ukuruska akaya kala. ¹³ Soka kwiwe, Korazini! soka kwiwe, Betisayida! nanthi imbombo izgamaka zgo zikawombeka mwimwe zgoziwombekaje mu Ture namu Sidoni, nge wakang'anamuka paranye kale, ukwikala mumagunira namwitoyi. ¹⁴ Ukwene umulandu uwa Ture nu Sidoni pacheruzgo wukwinza ukuwako ichete ukuruska uwinyu. ¹⁵ Iwe Kapenamu, ka ukughana ghana ukuti wande ukwerere kumwanya? Awe, ukwinza ukwisichira pansi ku Hadesi. ¹⁶ Umunthu wo akutejerezga kwimwe akutejerezga kwine, numunthu wo akuwakana imwe ukukana ine, powoka wo akukana ine akukana wo akanthuma ine." ¹⁷ Sevenite wakagaruka nichimwemwe, wakanena, "Mfumu, nimizimu imbiwi yope yaturambiraga mwizinz lyinyu." ¹⁸ UYesu akanena kuwawo, "Nkhenniaga uSatana akisikaga ukufuma kumwanya ngati kumesy kwamvula. ¹⁹ Yennyi, nawapa amazaza agakuryatira pawakalizga napa zinjoka, naponsi popali amaka agawalwani, popatali nakamo kokakwinza ukuwavurazga imwe. ²⁰ Po nomba mutakasechereraje mwichi cheka awe, ukuti nimizimu imbiwi yikuwagwadiraga, ukwene musechereraje nkhani ukuti amazina ginyu galembesile kumwanya." ²¹ Panyengo yiranyene akakondwa sana mumzimu umuzeru po akanena, "Nkhuwachindikaimwe, Baba, Imfumu yakumwanya napansi, chifukwa mukazgika ivi kuwakusambira nakuwamahara pomukawa vumbulira wowa tasambiliriye, nawabonda. Ena, Baba, mochikawahowosezga imwe muminso ginyu. ²² "Ivinthu vyonsi vikaperekeka kwine ukufuma kwa Baba, popatali wakumanya ukti walikwi ukufumyako uBaba, ukupatulako umwana nawo umwana asevile ukuwavumbulira." ²³ Po nomba akang'anamuchira kuwasambiri wakwekuwuzgevu nukunena, "Wamwawi wowakwennia vyo imwe mukwennia. ²⁴ Nkhunena kwimwe, awapulofeti awinji namafumu wakadocheraga ukuti wennye vyo imwe mukwennya, loli watakavyennya,nukwivwa vyo imwe mukwivwa, pololi watakivwaga awe." ²⁵ Po nomba, ukaswiri mimadango akimilira ukuti amuyezge, akati, " musambizgi, kaninga womba ichoni ukuti nkhawe ninjire muwufumu ubwa muyaya?" ²⁶ UYesu akanena kwawuyo," Choni chochilembesire mwidang? ukuchiwerenga wuliwuli?" ²⁷ Akapereka izgoro akati, " utemwaje imfumu uChiwuta wako numoyo wako wonsi, numzimu wako wonsi, namaka gako gonsi, namahara gako gonsi, numuzengezgani wako ngati wewe wemwenecho." ²⁸ UYesu akanena kwawuyo, "wazgora ichete sana. Wombaga ivi, powande uwe nuwumi." ²⁹ Ukwene wo, akayennyaga ukuti wakufikapo, akanena kwa Yesu, "Wenu womuzengezgani wane?" ³⁰ UYesu akamuzgora akati, "umunthu yumo akajendaga pansi ukufuma ku Yerusalemu akawaraga ku Yeriko. Akagwira muvigawenga, wakamuzula vyonsi vyo akawa navyo, powakamukoma, hafu ukufwa powakamuleka. ³¹ Mwamwawi umuliska yumo wope akajendaga pansi munzira yiranye, po nge amwennya akajenda uluwazu lunji. ³² Munzira yoka yiniyo, umuLevi wope, nge afika pamalo nukumwennya, wope akachilingannya kuluwazu ulunji. ³³ Ukweni umusamariya yumo, nge akujenda, akinza afika po akawa. Nomba nge amwennya,akajendaga nubwila. ³⁴ Akamufika umunthu yura nukumupinya ivilonda vyakwe, nukumwitira amafuta nuvinyo. Akamunyamula nukumukwezga pachinyamana chakwe, nukumutwala kunyumba yakugonako awajeni, nukumusunjilira. ³⁵ Pisiku ilya wuwiri akafumya indalama ziwiri, nukumupa umwenecho nyumba, nukunena, 'mumusunjirire, nazgo mungataga izgakuluska pizi,para nagaluka, nkhwinza ukulipira.' ³⁶ Wuwenu uwawatatu awa ukughana ghana ukuti akawa muzengezgani uwamunthu wo akagwira muvigawenga?" ³⁷ Akanena," woka wo akalinjizga ubwila." ³⁸ Nomba nge wachili wakujenda munzira, akinjira mukaya kamo, po umwanthanda yumo wakitwaga Malita akamwitizgaga munyumba yakwe. ³⁹ Po umwene akawa numukulu wakwe akitwaga Mariya, wakikaraga pavinama vya Mfumu nukwivwa amazwi gakwe. ⁴⁰ Ukwene uMarita akatangwanikwaga inyengo yonsi ukuyannya ivyakulya . Akinza kwa Yesu nukuti, "Mfumu, kamutenavyo nimbombo ukuti umukuru andeka neka nkhusengannya ivyakulyaapa? ponomba muwuzge kuti anavwe" ⁴¹ Ukwene Imfumu yikamuzgora yikati, " Marita, Marita, ukwenjerwa sana nukutamya muvinthu ivyinji, ⁴² Ukwene ichinthu choka wuro chikukwana. Umariya asewa ichinthu chochinza, chochitakwinza ukupokeka kwawuyo."