¹ Ashan kida, Ya akuwana al kedisin, intakum al limu sawa fi nadi bitakum ta samawat. Fekir takum Yesuah, al Huwo yau marasula wa reis bita kahana ta iman al nina amin fogo. ² Huwo amin le Allah, al ikhtar Huwo, ze Musa kaman kan amin fi kulu bet ta Allah. ³ hasibu Yesuah ahsen min Musa, ashan zol al bi abinu bet bi wodi le huwo tegdir aktar min bet de zatu. ⁴ Ai bet abinu be zol, lakin al abinu hajat kulu de Allah. ⁵ Ashan Musa kan amin ze kadam fi bet ta Allah, kan bi shahidu kulu hajat al kelimu fi mustagbal. ⁶ Lakin Al mesih amin ze Jena al mosul fi bet ta Allah. Nina yau bet Bito kan nina amsuku gowi fi thika bitana wa fi raja bita de al nina bi farah le nihaya. ⁷ Ashan kida, de bes ze Roho Al kudus bi kelim: "Alela, kan intakum asuma sot Bito ⁸ matakum gowi geliba ze kan fi zaman bita tamarud, fi zaman bita tejriba fi sahara. ⁹ De wokit judud bitakum amulu tamarud wa jeribu Ana, wa fi wokit bita arbein sena, humon aynu hajat al Ana amulu. ¹⁰ Ashan kida zalan Bitai nezil le jil dak. Ana kelim, "Humon daiman bi woduru fi gulub bitomon. Humon ma aruf sikat Bitai." ¹¹ De kutu Ana halifu be zalan: "Humon ma bi dakalu fi raha Bitai." ¹² Amulu hisabkum, Ya akuwana, ashan kede mafi zol min intakum bi indu roho batal bita adam iman, geliba al bi rija huwo wara min Allah al hai. ¹³ lakin seja takum badu kulu yom, fi zaman al lisa bi nadi "alela," ashan kede ma kabasu min intakum zol be kabasa bita katiya. ¹⁴ Ashan nina biga mushterikin ma Al mesih kan nina amsuku thika bitana gowi fi Huwo min bidaya le nihaya. ¹⁵ Zede kelimu gali, "Alela, kan intakum asuma sot Bito, maatakum gowi geliba ze kan fi zaman bita tamarud." ¹⁶ Del nas munu al kan asuma Allah wa tala mutmeridin? Sei de ma nas kulu al tala bara min Masir be wasit Musa? ¹⁷ Be del al Huwo zalan arbein sena? De ma del al amulu katiya, al jusas bitomon fadulu fi sahara? ¹⁸ Al Huwo halifu le humon gali ma bi dakalu fi raha Bito, kan ma del al aba asuma Huwo? ¹⁹ Nina aynu humon ma bi agder dakalul fi mahal raha Bito ashan adam .iman