1 Ashan kida keli anina kutu ihtimam tanina ketir le kalam al anina asuma de, ashan kede anina ma tala bara min huwo. 2 Kan risala al kan wonusu be wasit ta malaika huwo hagiga, wa kulu mukhalafat wa tamarud bi ligo ikab bito, 3 Nina kef bi nofut kan nina aba kalam ta kulasa al azim? De yau kulasa al alinu awel be Rabuna wa sabitu le nina be del al asuma. 4 Fi nefsu zaman Allah shahidu be alamat, wa ajaib muktelifa, wa be towzi hadiat ta Roho al kudus hasab irada Bito. 5 Ashan Allah kan ma wodi dunia al jai le malaikat, al nina bi kelim an huwo. 6 lakin fi wahid zol shahidu, gali, "insan huwo munu, hata inta be zekir huwo? awo jena ta insan, hata inta bi zekiru huwo 7 Inta kutu zol al tehit min malaikat; inta libisu huwo be tagia ta mejid wa karama. 8 Inta kutu kulu haja ashan be kun tehet kura bito. ashan kan le huwo Allah kutu kulu haja. huwo ma sibu ayi haja ma kutu tehit le huwo. lakin hasa nina lisa ma aynu kulu haja akhda le Huwo. 9 Lakin nina aynu zol al amulu huwo tehet min malaikat le zaman guser: Yesuah, al, ashan taab wa mutu bito, libisu Huwo be mejid wa karama. hasa be neama ta Allah, Huwo jeribu mutu ashan ai zol. 10 Lianu huwo kan hagiga le Allah, ashan kulu haja ligo le huwo wa be wasit bito, ashan bi jibu iyal ketir le mejid. Wa kaman kan hgiga le huwo ashan bi amulu kaid bita kulasa tomon kamil be wasit taab Bito. 11 Leanu al mukadas wa al mukadasin humon kulu wahid. ashan kida huwo ma bi kun indu fadiya ashan bi nadi humon akuana. 12 huwo kelim, "ana bikabiru be isim taki le akuana bi tai. ana bi guna le inta fi nus ta kenisa." 13 Wa tani, "ana bi sedeg fi huwo." wa tani, "ayinu, ana yau hini ana wa iyal al Alla wodi le ana." 14 ashan kida, wokit iyal de bi shariku fi gisim wa dom, huwo kaman bi shariku foko, leanu be wasit mutu, huwo bi batilu zol al indu guwa ta mutu, de yau, shetan. 15 de al kan huwo hariru kulu del al bi kafu min mutu haya bitomon kulu fi abudia. 16 Leanu hagiga huwo ma saidu malaika, lakin iyal ta ibrahim. 17 huwo kan durori le humon ashan bi kun ze akuana bitomon fi kulu haja ashan biga huwo bi kun rehim wa reise ta kahana al amin fi ilaga le hajat ta Alla, ashan huwo bi afi an katia ta nas. 18 ashan Yesuah be nefsa bito ligo tab wa jeribu huwo, .huwo bi agder saidu del al jeribu humon