¹ Wa Iman yau geni mutuakid be hajat al deiru wa hajat tanina al ma bi aynu. ² Wa ashan kida sedeku Iman ta nas al kan fi bediri dak. ³ Be iman nina agder fahim gali duniya kalagu be awamir min Allah, kaman, haja al bi aynu ma salau min hajat al kan bi aynu. ⁴ Kan bes be iman Habik gedimu le Allah ahsen zebiha min Kain, al be wasit towo agder shahidu le huwo gali huwo adil. wa Allah wonusu kuwes be huwo ashan zebiha bito, wa be iman Habil lisa bi wonusu, sala kan huwo meit. ⁵ De kan be iman Aknuk shilu fok wa huwo ma aynu mutu."Ma ligo huwo,ashan Allah kan shilu huwo." ashan gubal lisa ma shilu huwo fok, shahidu le huwo gali huwo kutu Allah mokosut. ⁶ Hasa bidun iman saab ashan nina bi kutu Huwo mokosut. Ashan mohim kalis ai wahid al bi ja le Allah kede sedeg gali Huwo fi wa Huwo yau bi dafa nas al bi fetisu Huwo. ⁷ Kaman kan be iman Noah, kan wori lehuwo risala ta Allahbe hajat al kan lisa ma aynu, be kafu ta Rabuna huwo abinu babur kebirashan be alagu be nas bet towo. Zede huwo huwo hukumu duniya wa biga huwo worisu sokol adil al be sabab ta iman. ⁸ De kan be iman Ibrahim, wokit nadi huwo huwo ihterim wa huwo ruwa fi mahal al kelimu le huwo gali huwo bi worisu. Huwo ruwa, wa kan huwo ma aruf huwo bi ruwa wen. ⁹ Kan be iman huwo geni fi wata ta waad ze ajnebi. Huwo geni fi kheima ma Is-hak wa Yakub. al bi worisu nefs waad. ¹⁰ Ashan huwo kan bi fetisu medina al abinu be asas, al muhandis towo wa zol al abinu yau Allah. ¹¹ De kan be iman, sala kan Sarah zatu kan biga ma bi weledu, Ibrahim agder ligo guwa ashan bi kun abu ta jena. De hasil sala kan huwo ajuz kalis, wokit badau hasibu gali huwo amin huwo al kan wodi le huwo waad. ¹² Ashan kida, min zol wahid de - huwo kan kalas gerib bi mutu - kan weledu iyal kutar ze nujum al fi sama wa ma bi agder idu ze romla al fi taraf balar. ¹³ De kan fi iman del kulu mutu bidun ma istelimu waad, lakin, baad ma humon aynu wa selimu min beid, humon aktene gali humon ajanib bes ja nezil fi duniya. ¹⁴ Ashan del al kelim shikil hajat dak agder kutu wadeh gali humon bi fetisu watan tomon. ¹⁵ Lo kan humon bi zekir watan tomon al humon rahalu min fogo, humon kan bi kkun indu fursa ashan bi rija. ¹⁶ Lakin bes ze, niya tomon bi fekir watan al kuwes, al ta sama. Ashan kida Allah ma indu kan bi nadi Huwo Allah tomon, min wokit Huwo jahizu le humon medina. ¹⁷ Kan be iman Ibrahim,wokit jeribu huwo, huwo gedim Ishak. De kan jena bito al wahid al huwo kan gedimu, al istelimu waad. ¹⁸ De kan Ibrahim al kelimu le huwo, "Be wasit Ishak bi kutu isim le iyal taki." ¹⁹ Ibrahim fekir gali Allah bi agder goumu Ishak min mutu, ze misal, min humon huwo agder ligo huwo tan mara. ²⁰ Kaman kan be iman ashan hajat al bi ja hasil Ishak bariku Yakub wa Isu. ²¹ Wa be iman Yakub, wokit huwo bi mutu huwo bariku ai wahid min iyal ta Yusif. Yakub kan bi seli, wa bi teki fi asayabito. ²² Wa be iman Yusif, wokit nihaya bito biga gerib, huwo wonusu be kalam ta rahalu ta iyal ta Israel min Masir wa wodi talimat be kalam udam bito. ²³ Be iman kaman kan Musa, wokit weledu huwo, Abu wa Uma bito dusu huwo talata shahar ashan humon aynu huwo jena giyafa. Humon kan ma kafu talimat ta melik. ²⁴ Kan be iman Musa, wokit huwo raba, huwo aba ashan bi nadi huwo gali jena ta biniya ta Faraun. ²⁵ Huwo hazilu ashan bi kun fi taab sawa ma nas ta Allah bidal huwo bi keif wa bi dala be katiya fi zaman besit. ²⁶ Huwo agder fahim gali fadiya ta ruwa wara ta al Mesih de akbar maksab min dahabat kulu al fi Masir. Ashan huwo kan bi aynu le makafa bito. ²⁷ Kan be iman Musa sibu Masir. Huwo ma kafu zalan ta melik, huwo istemir ze kanu huwo bi aynu al ma bi aynu. ²⁸ De kan be iman huwo agder hafizu Eid faska wa rushu dom, ashan al bi ja demiru iyal al bikir ma bi lemesu iyal bikir ta Israelin. ²⁹ Kan be iman humon agder douru min nus bahar kanu humon bi douru fi wata al yabis. Wokit Masriin hawil ashan bi amulu ze de, bahar abulau humon. ³⁰ Kan be iman hosh ta Ariha waga, baad ma humon lifu saba ayam. ³¹ Kan be iman Rahab al saramuta ma mutu ma del al mutumeridin, ashan huwo kan gabilu jawasis del be salam. ³² Shunu tani al ana bi kelim? Zaman ma bi timu kan ana kelim an Jadaun, Barak, Shamshun, Yaftah, Daud, Samuel wa anbiya. ³³ Kan be iman humon gilibu mamalik, humon amulu adala, wa humon ligo waad tomon. Humon gofulu kasma ta usud, ³⁴ humon batulu guwa ta nar, humon agder tala min gidam ta sef, humon kan ligo ilaj min ayanat, humon biga gowin fi harb, wa gilibu jes ta nas tanin. ³⁵ Nuswan istelimu nas tomon al mutu be giyama. Tanin azibu, wa ma fiku, ashan humon bi jeribu giyama al kuwes. ³⁶ Tanin jeribu be ihana wa jelda, wa robutu be genzir wa kutu fi sijin. ³⁷ Luku humon be hujar. Gatau humon fi nus be musher. Katulu humon be sef. Humon jere jere sambala humon libisu gisim be jilid ta ganamaya wa ta khoruf. Humon kan ma indu hajat, zulumu humon, amulu humon batal. ³⁸ Dunia kan biga batal ma humon. Humon kan biga bi lifu fi sahara wa fi jibal, wa fi juwa jibal wa fi hufurat ta wata. ³⁹ Sala kan nas delm kulu Allah rudu le humon ashan iman tomon, humon ma istelimu al waad. ⁴⁰ Allah khatit fi haja tani .ahsen le nina, ashan bidun nina, ma bi agder amulu humon kamil