¹ Kan ganun bes ze dulu ta hajat al kuwes al jai, wole zatu shikil al asili ta hajat del. Del al agder ja gerib ma Allah ma bi agder kun kamil be nefsu zebiha al kahin tuwali bi gedimu sena le sena. ² Ile, sei zebiha de ma indu mushkila ashan bi gedimu? Nas al bi abudu Allah humon bi kasulu nufus tomon mara wahid wa humon ma bi his tani mara be katiya. ³ Lakin be zebiha del bi kun fi zikra ta katiyat sena le sena. ⁴ Ashan ma bi agder hasil gali dom ta tiyus wa ganamayat bi agder shilu katiyat bara. ⁵ Wokit al Mesih ja fi duniya, Huwo kelim, "Zebihat wa tegdimat ma min niya taki, lakin jisim al intum indu de yau jahizu le Ana; ⁶ be tegdimat al bi haragu wa tegdimat ta katiya inta mamokosut. ⁷ Biga ana kelim, 'Aynu, Ana Yau - ze katibu fi kitabbe kalam Tai - ashan bi amulu haja al Inta deir."' ⁸ Awel Huwo kelim, "De ma kan zebihat, wole tegdimat, wole kulu tegdimat al bi haragu, wole tegdimat ta katiya yau Inta deir. Wole Inta kutu niya fogo." Del yau zebihat al gedimu ze ganun deir. ⁹ Biga Huwo kelim, "Aynu, Ana jai ashan bi amulu haja al niya Bitaki deir." Huwo shilu tedrib al awel bara ashan bi kutu tedrib nimira itnin. ¹⁰ Be niya dak, kedisu nina be wasit tegdima ta jisim ta Yesuah al Mesih wahid mara bes. ¹¹ Yom bad yom kulu kahin bi gum wa bi gedim kidma bito le Allah. Huwo bi gedim nefsu zebihat tani mara wa tani - zebihat del ma bi shilu katiyat bara. ¹² Lakin wokit al Mesih gedimu zebiha ta katiya wahid le kulu zaman, Huwo geni tehet fi idan yemin ta Allah. ¹³ Huwo bi istena lahadi adu Bito del bi kutu mahal ta kutu kura la Huwo. ¹⁴ Ashan be tegdima wahid Huwo timu le nihaya del al kalas kedisu. ¹⁵ Roh al kudus kaman shahidu le nina. Awel haja Huwo kelim, ¹⁶ "De yau tifagiya al Ana bi amulu ma humon baad ayam del, Rabuna yau kelim. Ana bi kutu gawanin Bitai fi gulub tomon, wa Ana bi katibu fi muk tomon." ¹⁷ Wa kaman Huwo zidu, "Katiyat tomon wa hajat al humon amulu bidun ganun Ana ma bi zekir tani mara." ¹⁸ Wa ashan kan fi afi katiya zede, ma bi kun fi gedimu zebiha le katiya tani mara. ¹⁹ Ashan kida, ya akuwana, nina indu thiqa ashan bi dakalu fi kuds al akdas be dom ta Yesuah. ²⁰ Dak yau jedid wa teriga ta haya al Huwo fatau le nina be wasit al sitara, al huwo yau teriga bita jisim Bito. ²¹ Ashan nina indu aazam kahin fok le bet ta Allah, ²² kede nina ja gerib be geliba nesiya wa be takid al kamil ta iman, gulub bita nina rush nedif min demir al wasaka wa jisim bita nina kasulu be moyo safi. ²³ Kede nina kaman amsuku raja al nina iterif be huwo de bidun taradud, ashan Huwo al wodi waad Huwo amin. ²⁴ Kede nina wodi kutu bal kef nina bi hasisu badu be muhaba wa amulu hajat al kkuwes. ²⁵ Kede nina ma sibu limu sawa, ze nas tanin amulu. Lakin, shejau takum badu ketir ketir, wa be ketir ze intum bi aynu yom biga gerib. ²⁶ Kan nina bi istemir fi amulu katiya be dur baad ma nina istelim marafa ta hagiga, ma bi kun fi zebiha ta katiya tan mara. ²⁷ lakin, bes akid bikun fi khof ta hukum al nina bi istena, wa zalan shedid ta nar al bi haragu be nas al gilibu dahar le Allah. ²⁸ Ai wahid al aba ganun ta Musa bi mutu bidun rahma ka fi nafaren aw talata gedimu shuhuda tomon. ²⁹ Godur shunu zol bi ligo akaab ikab kan huwo dusu Jena ta Allah, al aliju dom ta tifagiya ze ma mukadas - dom al kan kedisu bi huwo - wa bi sitimu Roho ta neima? ³⁰ Nina arufzol al kelim, "Intiqam de tai; Ana bi dafa." Wa kaman, "Rabuna bi hukumu nas Bito." ³¹ De haja al bi jibu kafu kan nina waga fi idan ta Allah al hai! ³² Lakin kede inta zekir ayam al gedim, baad ma kalas nur wala le intum, kef intum wogif gowi wa sedidu fi taab. ³³ Alisu intum gidam nas be shataim wa taab,wa intum kan bi limu sawa ma del al kaman mururu min taab ze de. ³⁴ Ashan kan intum bi jamilu del al kan fi sijin, wa intum rudu be farah ashan bi sadiru mumtalakat bitakum. Intum aruf fi nufus bitakum gali intum indu ahsen milkiya wa al ma bi kalasu. ³⁵ Matakum sibu thiqa takum , ashan indu ujura kbir kalis. ³⁶ Der kede intum wogif gowiashan kan intum amulu haja al Allah, intum bi ligo haja al Huwo waadu. ³⁷ Baad shuiya, zol al jai de bi ja wa ma bi akir. ³⁸ Zol Bitai al adil bi ish be iman. Wa kan huwo rija wara Ana ma bi kun mokosut be huwo." ³⁹ Lakin nina ma del al rija wara le karaba, lakin nina ma del al indu .imanwa hafizu nufus tomon