¹ نقول لكم الحق في المسيح, و ما نكذبش, و الضمير تاعي شاهد عليا بالروح القدس: ² انا حزين ياسر و قلبي يوجع فيا خلاص. ³ كنت نتمنى لو كان جيت انا محروم من المسيح على جال خاوتي اولاد شعبي, ⁴ اللي همّا بني اسراييل, اللي مدلهم الله التبني و الجاه و العهود و الشرَع و العبادة و الوعود, ⁵ و اللي منهم جاو جدودنا الانبياء, و منهم جاء المسيح حساب الجسد, و هو الكاين على كل شيء اله يتبارك اسمو للابد. امين. ⁶ و مانيش نقول باللي كلمة الله خابت. على خاطر مش كل بني اسراييل هما اسرائيليين, ⁷ و موش على خاطر همّا من اولاد ابراهيم يعني همّا كلهم اولاد, بالصح الله قال: " تكون عندك ذرية من اسحاق". ⁸ يعني باللي اولاد الجسد ما همش اولاد الله, بالصح لولاد اللي جاو بالعاهد تاع ربي همّا اللي يكونوا الذرية. ⁹ على خاطر هاذي هي كلمة العاهد: "نجي في هاذا الوقت العام الجاي وتكون سارة عندها طفل". ¹⁰ و موش هاذا برك, حتى رفقة ثاني, كانت بالكرش من راجل واحد و هو جدنا اسحاق. ¹¹ و قبل ما يولدوا التوام اللي في كرشها, و لا داروا لا خير ولا شر, باه يثبت ربي القصد تاعو حساب الاختيار, وموش على حساب لعمال بالصح اللي يناديه ربي هاذاك هو, ¹² و قال لرفقة: " لكبير يولي هو لخديم للصغير". ¹³ كيما جاء في لكتاب: " حبيت يعقوب وكرهت عيسو". ¹⁴ مالا كيفاه؟ ربي زعمى يظلم؟ حاشاه! ¹⁵ يقول لموسى: "نرحم اللي نرحم و نشفق على من نشفق". ¹⁶ مالا الامر موش للي هو يحب و الا للي يسعى باه يترحم, ربي هو اللي يرحم. ¹⁷ على خاطر في لكتاب قال الله لفرعون: " انا حطيتك في هاذا المنصب باه نبين فيك القوة تاعي, و باه في كل الدنيا الناس يدعيو باسمي". ¹⁸ هو يرحم اللي يحب, و يقسي قلب اللي يحب. ¹⁹ بلاك واحد يقول: "مالا علاه يلومنا الله ويحاسبنا؟ على خاطر شكون يقدر يقول لا لله؟" ²⁰ شكون انت يا انسان حتى تعارض الله؟ لعل الطين يقول للملاس: "علاه صنعتني هكا؟". ²¹ و الا الملاس ما يتصرفش في الطين, ياخي من عجنة واحدة يخدم ماعون شريف ويخدم واحد اخر دوني؟ ²² كيفاه؟ اذا كان الله و هو حاب يبين سخطو و قوتو, استحمل بصبر مواعن السخط المخدومة للهلاك. ²³ باه يبين فيض الجاه تاعو على مواعن الرحمة اللي وَجدْها قبل للجاه, ²⁴ و خايرنا احنا ثاني باه نكونوا مواعن تاع رحمة, موش من ليهود برك بالصح حتى من الامم ثاني. ²⁵ كيما قال ثاني على لسان النبي هوشع: " الشعب اللي ما كانش ليا راح يولي هو الشعب تاعي, و اللي ماهيش محبوبة راح تولي هي المحبوبة تاعي. ²⁶ و يكون وين قالوا لهم: انتوما ماكمش الشعب تاعي. لثمة بالذات يتسماو اولاد الله الحي". ²⁷ و اشعياء ينادي ويقول من جيهة اسراييل: "حتى لو كانوا بني اسراييل على قد الرمل تاع لبحر, راح يمنعوا منهم غير شوية. ²⁸ على خاطر ربي راح يتمم امر محكوم بيه على لرض. يقضيه بالعدل و يتم بيه". ²⁹ و كيما قال اشعياء من قبل: " لو كان موش اله الجيوش خلى لنا ذرية, ولينا كيما سدوم وشابهنا عمورة". اسراييل ما تامنش ³⁰ مالا واش نقولوا؟ الشعوب اللي ما كانوش يحوسوا على التبرير لقاو التبرير, التبرير اللي بالايمان. ³¹ بالصح امة اسراييل, اللي كانوا يسعاو للتبرير بالشرع, ما وصلوش للتبرير اللي المفروض يكون بالشرع! ³² علاه؟ على خاطركانوا يسعاو باه يوصلوا للتبرير بالاعمال تاع الشرع, و مش بالايمان. و دعثروا في حجرة عثرة, ³³ كيما راه مكتوب: "انا راح نحط في صهيون حجرة في طريق الشعب و صخرة عثرة, و كل من يامن بيه ما يخزاش".