¹ مالا واش نقولوا على بابانا في الجسد ابراهيم؟ ² على خاطر اذا كان تبرر على حساب لعمال عندو الحق يفخر, بالصح موش قدام الله. ³ على خاطر واش يقول في لكتاب؟ "كي امن ابراهيم بالله تحسب ليه التبرير". ⁴ اما اللي يعمل لعمال تاع الشرع ما يتحسبش ليه الاجر بالنعمة, بالصح من حقو يدي الاجر تاعو. ⁵ و اما اللي ما عملش باعمال الشرع, بالصح يامن بهاذاك اللي يبرر الفاجر. الايمان تاعو يتحسب ليه تبرير. ⁶ و هاذا واش يقول داود و هو يمدح في الانسان اللي يحسبلو الله التبرير بلا ما يعمل لعمال تاع الشرع: ⁷ يا سعدهم الي ذنوبهم تغفرت و اثامهم تسترت. ⁸ يا سعد الراجل اللي ما يحاسبوش ربي على معاصيه". ⁹ و هاذي الفرحة هي للناس اللي مطهرين برك و الا حتى للناس اللي ما همش مطهرين؟ على خاطر احنا نقولوا: باللي الله حسب الايمان تاع ابراهيم تبرير. ¹⁰ وقتاه حسبلو؟ كي كان مطهر و الا مازال ما تطهرش وقتها؟ حسبلو هاذا التبرير وهو ما زال ماهوش مطهر! ¹¹ و دار الطهارة كيما امارة على البر اللي يجي من الايمان اللي كان عندو قبل ما يتطهر, باه يقدر يكون اب للمومنين الكل اللي ماهمش مطهرين, و يتحسب لهم هما ثاني التبرير. ¹² و اب للي مطهرين موش برك على جال الطهارة, بالصح ثاني على خاطر تبعوا طريق بابانا ابراهيم اللي كان ماشي عليه حتى قبل الطهارة. ¹³ على خاطر موش بالشرع جاء العاهد لابراهيم و لذريتو باه يورثوا العالم, بالصح بالايمان اللي تبرر بيه. ¹⁴ على خاطر لو كان جاو الوراثة همّا اهل الشرع, يتعطل الايمان و يبطل العاهد: ¹⁵ على خاطر الشرع يجيب السخط تاع الله, على خاطر كي ما يكونش شرع ما تكونش معصية. ¹⁶ على هاذا الورثة تجي من الايمان, باه يكون نعمة من عند ربي, و هكذا يتحقق العاهد للذرية كاملة. موش برك لاهل الشرع, بالصح ثاني للناس اللي تبعوا الايمان تاع ابراهيم, اللي هو بابانا الكل. ¹⁷ كيما مكتوب: "انا جعلتك اب لامم ياسر". قدام الله اللي امن بيه, وهواللي يحيي الموتى, و هو اللي يقول للشيء اللي موش موجود كون فيكون. ¹⁸ و الوقت اللي غاب فيه الامل, امن ابراهيم و صدّق باللي راح يكون اب لشعوب ياسر, حساب الشيء اللي جا في لكتب "قد هكا راح تكون الذرية تاعك". ¹⁹ و ما ضعفش في الايمان و ما دارش حساب لعمرو اللي فات لمياة سنة و ما دارش حساب لرحام زوجتو سارة اللي ذبال. ²⁰ وما شكش في العاهد تاع الله, بالصح ثبّت روحو بالايمان ومد المجد لله. ²¹ و صدّق باللي الله قادر يتمم العاهد تاعو معاه ثاني. ²² و على هاذيك زاد: تحسبلو التبرير". ²³ و ما كانش هاذا لكلام تكتب على ابراهيم وحدو هو برك, ²⁴ بالصح على جالنا, راح يتحسب لنا احنا ثاني, على خاطر امنا باللي قوم يسوع المسيح ربنا من بين الموتى, ²⁵ اللي مات على جال ذنوبنا و حيا من بين الموتى على جال تبريرنا.