¹ نقول: بلاك ربي رفض الشعب تاعو لقديم؟ على خاطر انا ثاني واحد منهم و من ذرية ابراهيم من عرش بنيامين. ² الله ما نكرش شعبو اللي خايرو من لول. و ما يخفاش عليكم واش قال لكتاب على ايليا؟ كيفاه كان يشكي من شعب اسراييل لله وقالو: ³ "يا ربي, قتلوا الانبياء تاعك و ريْبوا المذابح تاعك, وبقيت غير انا وحدي, و ها همّا حابين يقتلوني!". ⁴ بالصح واش جاوب عليه الوحي تاع الله؟ "خليت لروحي سبعة الاف راجل عمرهم ما ركعوا على ركايبهم لبعل". ⁵ و حتى في الزمان تاعنا الحاضر ثاني خلى الله جماعة مخصصة ليه خايرها بالنعمة تاعو. ⁶ اذا كان خايرهم بالنعمة معناها خايرهم موش على حساب اعمالهم, و الا النعمة ما بقاتش نعمة. و اذا كان خايرهم على حساب لعمال و موش بالنعمة, تولي لعمال ماهيش اعمال. مالا كيفاه؟ ⁷ اللي كان يحوس عليه شعب اسراييل ما نالهش. بالصح المختارين منهم نالوه. اما لخرين اللي بقاو قساو قلوبهم, ⁸ كيما قال لكتاب: "عطالهم ربي روح باردة, وعينين ما تبصرش, و وذنين ما تسمعش, حتى لليوم هاذا". ⁹ و داود يقول عليهم: "اجعل مايدتهم فخة ليهم و منداف و حجرة عثرة بيها تجازيهم. ¹⁰ باه ما يشوفوا ظلّمْ عينيهم, و احمال على ظهورهم ديما تعييهم". الخلاص تاع الامم ¹¹ و انا نقول: زعمى الطيحة هاذي تاع بني اسراييل باه يفناو خلاص؟ حاشا! بالصح بالطيحة تاعهم همّا ولات الشعوب لخرى مقبولة باه يغيروا. ¹² اذا كان الطيحة تاعهم فيها فايدة كبيرة للعالم, و نقصانهم فيه زيادة للشعوب, مالا واش نقولوا على الفايدة اللي راح تكون لو كان همّا يثبتوا؟ ¹³ و انا هنا نقول للناس اللي ما همش من ليهود: على خاطر انا رسول للشعوب من غير ليهود عندي فخرة بالخدمة تاعي بيناتهم, ¹⁴ كاش ما يغيروا اهلي واماليا و يمنعوا حتى لو كان شوية منهم. ¹⁵ اذا كان رفضهم همّا مد مصالحة للعالم, قبولهم ما راح يكون غير حياة من بين الموتى؟ ¹⁶ و اذا كانت لخميرة مقدسة حتى لعجينة تكون مقدسة! و اذا كانت الجدرة مقدسة حتى لعراف تكون مقدسة! ¹⁷ و اذا كان قص شوية عراف, و جابك انت من زيتونة برية و طعمك فيها, و وليت شريك في الاصل تاع الزيتونة و في زيتها, ¹⁸ مالا ما تهزش روحك على لعراف لمنحية. كي تتكبر, مشك انت اللي هاز الاصل, او الاصل هو اللي هازّك! ¹⁹ راح تقول: "تقصت هاذيك لعراف باه انا نتطعم!". ²⁰ مليح! هي تقصت على خاطر ما عندهاش ايمان, وانت ثبتت على خاطر عندك ايمان. مالا ما تتكبرش خيرلك خاف على روحك! ²¹ اذا كان الله ما شفقش على لعراف الاصلانية قادر حتى انت ثاني و ما يشفقش عليك! ²² و هنا يبان اللطف تاع الله و السخط تاعو: السخط تاعو على الناس اللي طاحوا, و اما اللطف تاعو عليك انت, مالا اثبت في اللطف لا تتنحى انت ثاني. ²³ و همّا لو كان يرجعوا للايمان راح يطَّعمهم, على خاطر الله قادر يزيد يطَّعمهم مرة اخرى. ²⁴ اذا كنت انت نحاك من زيتونة بيثر و طعّمك على خلاف العادة في زيتونة حرة, و هما عندهم الحق اكثر منك باه يطّعمهم في زيتونتهم الحرة؟ رحمة ربي واسعة للناس الكل ²⁵ ما دابيا ما يخفاش عليكم هاذا السر, باه ما تحسبوش ارواحكم فاهمين خير من لخرين: باللي مجموعة من بني اسراييل قسّاو قلوبهم حتى ن يدخلوا الشعوب لخرين الكل. ²⁶ و من بعد عاد يخْلصوا بني اسراييل الكل. كيما جاء في لكتاب: " من صهيون يخرج المخلص و ينحي الكفر من بني يعقوب. ²⁷ و يكون هاذا هو العاهد تاعي معاهم كي نمحي ذنوبهم". ²⁸ من الجيهة تاع الانجيل همّا ولاو عديان على جالكم. و اما من جيهة الاختيار همّا احباب على جال الجدود, ²⁹ و الهبات تاع الله و الاختيار تاعو همّا بلا ندامة. ³⁰ انتوما قبل ما كنتوش طايعين لله, و رحمكم بالعصيان تاعهم همّا, ³¹ و بالصح همّا ضرك ماهمش طايعين باه يترحموا كيما ترحمتوا انتم, ³² على خاطر الله خلى الناس الكل محبوسين في العصيان, باه كي يرحم يرحم الناس الكل. تسبيح لله ³³ قداه واسع الغنى تاع الله و حكمتو و العلم تاعو! و قداه صعيب علينا باه نعرفوا احكامو و باه نفهموا الطُرق تاعو! ³⁴ "على خاطر شكون عرف تخمام الله؟ و الا شكون كان يدبّر عليه؟ ³⁵ و الا شكون دار فيه مزية و يستنى فيه يرجعلو الخير؟". ³⁶ على خاطر منو هو و بيه هو و ليه هو لحوايج الكل. ليه المجد للابد. امين.