¹ و من بعد زاد نفخ الملاك الخامس ف البوق اللي عندو, و شفت واحد الكوكب طاح من السماء على لرض, و كان عندو مفتاح بير الهاوية. ² و كي حل بير الهاوية, طلع دخان من البير تقول دخان تاع سامور كبير ياسر, و تحجبت الشمس و ظلام الحال من هاذاك الدخان. ³ و من الدخان خرج جراد غطى لرض كاملة, و كانت عندو القدرة يلسع كيما لعقارب تاع لرض. ⁴ و ادى الامر باه ما يضرش العشب تاع لرض, و ما يمس حتى شجرة و لا اي نبات اخضر, يضر برك الناس اللي ما عندهمش الختم تاع الله على جبهتهم. ⁵ و ادى الامر باه ما يقتلهمش بالصح يعذبهم مدة خمسة شهر. و لعذاب تاعو كيما لعذاب تاع العقرب كي تلسع الانسان. ⁶ و ف هاذيك ليام يحوسوا الناس على الموت و ما يلقاوهاش, و يتمناو يموتوا بالصح الموت تهرب منهم. ⁷ و الهيأة تاع الجراد كان تقول عليه خيل واجد باه يدخل للحرب, و فوق روسها حاجة تقول عليها تاج ذهب, و وجهها تقول عليه وجه تاع بشر. ⁸ و عندها شعر طويل كي شعر النساء و سنيها تقول عليها سنين الصيودة, ⁹ و كان عندها درع كيما الدروع تاع لحديد, و صوت جنحاها تقول عليه الحس تاع مركبات لحديد اللي داخلة تجري للحرب. ¹⁰ و عندها ذيل كيما تاع لعقارب, فيه اباري, و عندها القدرة باه تاذي الناس مدة خمسة شهر. ¹¹ و الملاك تاع الهاوية هو السلطان تاعها, اسمو بالعبرية "ابدون", و يسموه باليونانية "ابوليون". ¹² هاذا الويل لول عدى و مازالوا زوز واحد اخرين. ¹³ و كي نفخ الملاك السادس ف البوق اللي عندو, سمعت صوت خرج من لقرون الاربعة تاع مذبح الذهب اللي قدام الله, ¹⁴ و قال الصوت للملاك السادس اللي عندو البوق: "روح اطلق الملايكة ف اربعة اللي مكتفين ف واد الفرات العظيم". ¹⁵ و تفكت السلاسل تاع الملايكة الاربعة اللي واجدين للساعة و للنهار و للشهر و للعام, باه يقتلوا الثلث تاع سكان لرض. ¹⁶ سمعت باللي جيوش الخيالة كانو ميتين الف الف. ¹⁷ و هكا بانت لي الخيل و فرسانها ف الرؤيا, كان عندهم دروع من النار, و من الياقوت لصفر و من الكبريت, و رؤوس الخيل كيما رؤوس الصيودة, و يخرج من افوامها نار و دخان و كبريت. ¹⁸ و ماتوا ثلث البشر بهاذي الثلاثة حوايج, النار و الدخان و الكبريت اللي خارجة من افوامها, ¹⁹ على خاطر كانت قوة الخيل ف افوامها و ف اذيالها, و اذيالها كانت تقول عليها حنوشة , عندها رؤوس تضر بيها الناس. ²⁰ اما الناس اللي منعوا ما ماتوش بهاذي الضربات, و ما تابوش على افعالهم, و بقاو يسجدوا للشواطن و للاصنام تاع الذهب و الفضة و النحاس و لحجر و اللوح اللي لا تشوف و لا تسمع و لا تمشي, ²¹ و لا تابوا على القتيلة و لا على السحر و لا على الزنا و لا على السرقة.