¹ و كي فك الختم السابع ساد السكات ف السماء قريب نص ساعة. ² و شفت الملايكة السبعة اللي واقفين قدام الله, و كل واحد منهم عندو بوق. ³ و جاء ملاك واحد اخر و وقف عند المذبح و كان هاز كانون تاع ذهب, و اعطاوه بخور ياسر باه يقدموا مع الصلوات تاع القديسين الكل على المذبح تاع الذهب اللي قدام العرش. ⁴ و طلع دخان لبخور مع الصلوات تاع القديسين من يد الملاك قدام الله. ⁵ و من بعد هز الملاك الكانون تاع لبخور و عباه من النار تاع المذبح و صبها على لرض, كي صبها صرات اصوات و رعود و بروق و زلزلة. الابواق السبعة ⁶ و من بعد هاذوك الملايكة ف سبعة اللي عندهم الابواق وجدوا ارواحهم باه ينفخوا ف الابواق, ⁷ و كي نفخ الملاك لول, صب البرد و النار مخلطين بالدم على لرض, و تحرقت بيهم الثلث تاع الشجر, و كل عشبة خضرا. ⁸ و كي نفخ الملاك الثاني ف البوق اللي عندو, طاح ف لبحر شيء تقول عليه جبل كبير يقدي بالنار, و الثلث تاع لبحر ولى دم, ⁹ و ثلث المخلوقات الحية اللي ف لبحر ماتت, و ثلث السفن اللي ف لبحر تكسرت. ¹⁰ و كي نفخ الملاك الثالث ف البوق اللي عندو, هبط من السماء كوكب كبير يقدي تقول عليه شعلة تاع نار, و طاح فوق الينابيع تاع الماء. ¹¹ و اسم هاذاك الكوكب "العلقم". و تحول ثلث الماء لعلقم, و ناس ياسر ماتوا كي شربوا منو على خاطر ولى مرّ. ¹² و كي نفخ الملاك الرابع ف البوق اللي عندو, ضرب ثلث الشمس و القمر و ثلث النجوم, حتى ظلام الثلث منها, و النهار و الليل راح ثلث الضوء اللي كان فيهم. ¹³ و شفت و سمعت ملاك طاير ف وسط السماء و هو ينادي بصوت عظيم و يقول: "يا ويلهم! يا ويلهم! يا ويلهم سكان لرض كي يزيدوا ينفخوا الملايكة الثلاثة لخرين ف الابواق اللي ما زالت!".