¹ و بعد هاذا شفت اربعة ملايكة واقفين على اطراف لرض ف اربعة, حاكمين الرياح تاع الجوايه ف اربعة باه ما تهبش لاعلى لرض, و لا على لبحر, و لا على الشجر. ² و شفت ملاك اخر جاي من المشرق تاع الشمس و هو هاز الختم تاع الله الحي, و نادى بصوت عظيم على الملايكة ف اربعة, اللي نالوا القدرة باه يضروا لرض و لبحر, ³ و قال لهم: "ما تضروا لا لرض و لا لبحر و لا الشجر, حتى نختم العباد تاع الهنا كل واحد فيهم على جبهتو". ⁴ و سمعت باللي الناس اللي ختم عليهم ف جبهتهم كانوا اربعة و اربعين الف, مختومين من كل عشيرة من عشاير بني اسرائيل: ⁵ من عشيرة يهوذا اتناش الف مختوم, و من عشيرة راوبين اثناش الف مختوم, و من عشيرة جاد اثناش الف مختوم. ⁶ و من عشيرة اشير اثناش الف مختوم. و من عشيرة نفتالي اثناش الف مختوم. و من عشيرة منسى اثناش الف مختوم. ⁷ و من عشيرة شمعون اثناش الف مختوم. و من عشيرة لاوي اثناش الف مختوم. و من عشيرة يساكر اثناش الف مختوم. ⁸ و من عشيرة زبولون اثناش الف مختوم. و من عشيرة يوسف اثناش الف مختوم, و من عشيرة بنيامين اثناش الف مختوم. ناس ياسر ب القش ابيض ⁹ و من بعد شفت غاشي كبير واحد ما يقدر يحسبو, من كل الامم و القبايل و الشعوب و اللهجات, واقفين قدام العرش و قدام لخروف, لابسين قش ابيض و هازين ف ايديهم سعف تاع نخل ¹⁰ و هما يعيطوا بصوت عظيم و يقولوا: "الخلاص لالهنا المتربع على العرش و للخروف". ¹¹ و الملايكة الكل كانوا واقفين دايرين بالعرش, و معاهم الشيوخة و الحيوانات ف اربعة, كلهم ركعوا على وجوههم قدام العرش وسجدوا لله ¹² و همّا يقولوا: "امين! لالهنا الحمد و المجد و الحكمة و الشكر و الاكرام و القدرة و القوة على دوام الدهور للابد. امين!". ¹³ تكلم واحد من الشيوخة و قالي: "هاذوك اللي لابسين لبيض, شكون همّا؟ و منين جاو؟". ¹⁴ رديت عليه و قلت: "يا سيدي, انت اعلم". قال لي: "هاذوك همّا اللي منعوا من المحنة لكبيرة, غسلوا قشهم و جعلوه ابيض بالدم تاع لخروف ¹⁵ على جال هاذا الشيء همّا اليوم قدام العرش تاع الله, ف الهيكل تاعو يحمدوا فيه نهار و ليل, و المتربع على العرش يظللهم و يخيّم عليهم. ¹⁶ لا يجوعوا, و لا يعطشوا, و لا تضربهم الشمس و لا تقيسهم سخانة, ¹⁷ على خاطر لخروف اللي ف وسط العرش يرعاهم, و يهديهم للينابيع تاع ماء لحياة, و يمسح الله كل دمعة من عينيهم".