¹ و شفت لخروف كي فك واحد من الاقفال ف السبعة, سمعت واحد من الحيوانات الاربعة و هو يقول بصوت عظيم تقول عليه رعد: "ارواح تشوف!". ² و شفت حصان ابيض, و كان راكب فوقو واحد هاز قوس, نال تاج, و خرج و هو غالب و باه يغلب. ³ و كي فك الختم الثاني, سمعت الحيوان الثاني يقول: "ارواح تشوف!". ⁴ و شفت حصان اخر احمر خرج, و اللي كان راكب فوقو عندو القدرة باه ينحي السلام من لرض, و يجعل الناس يقتلوا بعضاهم. و نال سيف كبير. ⁵ كي فك الختم الثالث, سمعت الحيوان الثالث يقول: "ارواح تشوف!". و كي شفت لقيت حصان اكحل, و راكب فوقو واحد هاز ف يدو ميزان. ⁶ و سمعت صوت ف وسط الحيوانات الاربعة يقول: "كيلة القمح بدينار, و ثلاثة كيلات شعير بدينار. اما الزيت و الشراب ما تفسدهمش". ⁷ و كي فك الختم الرابع, سمعت صوت الحيوان الرابع يقول: "ارواح تشوف!". ⁸ و كي شفت لقيت حصان اخضر, و كان فوق منو واحد اسمه الموت, و الهاوية تتبع فيه, و نالوا القدرة على ربع سكان لرض باه يقتلوهم بالسيف و بالجوع و ب الموت و بالوحوش البرية. ⁹ و كي فك الختم الخامس, شفت تحت المذبح النفوس تاع المذبوحين ف سبيل كلمة الله, و ف سبيل الشهادة اللي شهدوا بيها, ¹⁰ و عيطوا بصوت عظيم و قالوا: " وقتاه يا صاحب السيادة القدوس والحق, تقضي و تنتقم لينا على دمنا من الساكنين ف لرض؟" ¹¹ و نال كل واحد منهم كسوة بيضاء و طلبوا منهم يرتاحوا زمان قليل حتى يزيدوا يلحقوا خاوتهم و رفاقهم, اللي رايحين يموتوا كيما همّا. ¹² و كي فك الختم السادس, شفت و اذا زلزلة كبيرة صرات, و الشمس ولات كحلة كيما لبسة الحزن, و القمرة ولات حمرا كي الدم, ¹³ و طاحت نجوم السماء على لرض كيما تطَيح شجرة الكرطوس الحب اليابس اللي فيها وقت اللي تهزها الريح القاوية. ¹⁴ و تتلم السماء كي اللفافة, و كل الجبال و الجزر تتزحزح من مضاربها. ¹⁵ و الملوك تاع لرض و العظماء و الاغنياء و الاقوياء و الزعماء و العبيد و الاحرار كلهم هربوا للغيران و للكيفان تاع الجبال, ¹⁶ و همّا يقولوا للجبال و للحجار: "طيحي علينا و خزنينا من وجه المتربع على العرش و من الغضب تاع لخروف, ¹⁷ على خاطر حل بينا نهار الغضب العظيم, شكون يقدر يوقف على رجليه؟".