¹ و شفت على يمين المتربع على العرش كتاب مكتوب من الجيهتين, مشمّع بسبعة اقفال. ² و شفت ملاك جبّار ينادي بصوت عالي ويقول: "شكون يستاهل يحل هاذا لكتاب و يفك عليه الاقفال؟". ³ و ما كان حتى واحد قدر يحل لكتاب و لا يشوف فيه لا ف السماء و لا على لرض و لا تحت لرض. ⁴ و بكيت بالحريقة على خاطر ما كان حتى واحد يستاهل باه يحل لكتاب و يقراه و لا يشوف فيه. ⁵ نطق واحد من الشيوخة و قال لي: "ما تبكيش. او غلب الصيد اللي من عشيرة يهوذا, نسل داود, باه يحل لكتاب و يفك عليه الاقفال السبعة". ⁶ و شفت و اذا خروف تقول عليه مذبوح ف وسط العرش و الحيوانات ف ربعة و الشيوخة, هاذاك لخروف عندو سبعة قرون و سبعة عينين, هي لرواح تاع الله ف سبعة اللي بعثها للرض كاملة. ⁷ جا و هز لكتاب من يمين المتربع على العرش. ⁸ و كي هز لكتاب سجدوا الحيوانات ف ربعة و الاربعة و عشرين شيخ للخروف, و كل واحد فيهم كانت عندو قيتارة و كاس تاع ذهب معمر بالبخور اللي هي الصلوات تاع القديسين. ⁹ و همّا يرنموا ف ترنيمة جديدة يقولوا فيها: "انت هو اللي تستاهل تدي لكتاب و تحل الاقفال, على خاطر تذبحت و دمك سال و بدمك شريتنا لله من كل شعب و امة و كل قبيلة و لسان. ¹⁰ و جعلت منا ملوك و كهنة لالهنا, باه نكونوا ملوك على لرض". ¹¹ و شفت و سمعت صوت ملايكة ياسر بلا حساب دايرين بالعرش و الحيوانات و الشيوخ, و كانوا الاف الاف مؤلفة, ¹² و هما ينشدوا باعلى اصواتهم: "يستاهل الخروف المذبوح باه ينال القدرة و الغنى والحكمة و الجبروت و الاكرام و الجاه و البراكة!". ¹³ و كل خليقة من اللي ف السماء و اللي على لرض و اللي تحت لرض, و اللي ف لبحار, الكون كامل و ما فيه, سمعتها تقول: "البراكة و الاكرام و الجاه و السلطان للمتربع على العرش و للخروف ل ابد الدهور و دوامها". ¹⁴ و كانت الحيوانات ف اربعة تقول: "امين" و الشيوخة الاربعة و عشرين ركعوا ساجدين للحي ل ابد الدهور و دوامها.