¹ و من بعد شفت لقيت باب محلول ف السما, و الصوت لول اللي سمعتو اللي تقول عليه صوت بوق هدر معايا وقالي: "اطلع هنا باه نوريك الشيء اللي لابد يصير من بعد". ² و ف ساع خطفني الروح, شفت عرش محطوط ف السماء, و على العرش قاعد واحد. ³ ف المنظر تقول عليه حجر اليشب و العقيق لحمر, داير بالعرش قوس قزح ف لون الزمرد. ⁴ و دايرين بالعرش ربعة و عشرين عرش. و على العروش ربعة و عشرين شيخ قاعدين و لابسين كساوي بيُض, و فوق روسهم تيجان ذهب. ⁵ و يخرج من وسط العرش اصوات و برق و رعد. و سبعة ضواو شاعلة تقدي قدام العرش. هي ارواح الله السبعة. ⁶ و قدام العرش بحر تاع قزاز تقول عليه بلور. و ف وسط العرش و دايرة بيه ربعة حيوانات مليانة بالعينين من قدام و من لورى: ⁷ الحيوان لول يشابه للصيد, و الحيوان الثاني يشابه للعجل, و الحيوان الثالث يشابه وجه الانسان, و الحيوان الرابع يشابه للنسر الطاير. ⁸ و لربعة حيوانات لكل واحد منها ستة جنحين, مرصعة بالعينين من داخل و من برى, و ها تحبسش من التسبيح ليل و نهار و هي تقول: "قدوس, قدوس, قدوس, الرب الاله القادر على كل شيء, اللي كان و الكائن و اللي يجي". ⁹ و ف الوقت اللي الحيوانات نقدم فيه التمجيد و الاكرام و الحمد للقاعد على العرش, الحي على دوام الدهور للابد, ¹⁰ الربعة و عشرين شيخ يهَبطوا روسهم قدام المتربع على العرش, و يسجدوا للحي على دوام الدهر للابد, و يطرحوا تيجانهم قدام العرش و همّا يقولوا: ¹¹ "يا ربنا و الاهنا, بيك يليق التمجيد و الاكرام و القدرة, على خاطر انت اللي خلقت لحوايج الكل, و هي بمشيئتك تخلقت و توجدت".