¹ و من بعد شفت ملاك اخر جبار هابط من السماء, لابس سحابة و فوق راسو قوس قزح, و وجهو كيما الشمس, و رجليه كيما زوز عُرص تاع نار, ² و كان هاز ف يدو كتاب صغير مفتوح. حط رجلو ليمنى على لبحر و ليسرى على لرض, ³ و عيط بصوت عظيم كيما يزأر الصيد. و بعد ما عيط هو تكلمت الرعود السبعة بأصواتها. ⁴ و بعد ما تكلمت الرعود السبعة بأصواتها, و كنت راح نكتب بالصح سمعت صوت من السماء يقول لي: "اكتم لكلام اللي تكلمت بيه الرعود السبعة و ما تكتبوش". ⁵ و الملاك اللي شفتو واقف على لبحر و على لرض, هز يدو للسماء, ⁶ و حلف بالحي على دوام الدهور للابد, اللي خلق السماء و ما فيها, و لرض و ما فيها, و لبحر و ما فيه: بالي ما بقاش يزيد يبطى! ⁷ غير يجي الوقت اللي ينفخ فيه الملاك السابع ف البوق اللي عندو, يتم سر الله حتى هو, كيما بشّر بيه عبادو الانبياء. ⁸ و الصوت اللي سمعتو من قبل ف السماء زاد كلمني و قال: "روح هز لكتاب الصغير اللي ف يد الملاك الواقف على لبحر و على لرض". ⁹ رحت للملاك و قلت: "اعطيني لكتاب الصغير". قال لي: "هاك هزو و ابلعو راح تلقاه ف جوفك مر, بالصح ف فمك يكون حلو عسل". ¹⁰ هزيت هاذاك لكتاب الصغير من يد الملاك و بلعتو, و كان ف فمي حلو كي لعسل. و بعد ما بلعتو ولى ف كرشي مر. ¹¹ قال لي: "لازم تزيد تتنبأ مرة اخرى على شعوب و امم و لهجات و ملوك ياسر".