¹ و من بعد اعطاني واحد منهم قصبة كيما لعصا, و وقف الملاك و قالي: "نوض و قيس الهيكل تاع الله و المذبح و الناس الساجدين فيه. ² اما الدار اللي ف الهيكل من برى, خلاها ما تقيسهاش, على خاطر هي للامم, و راح يعفسوا على المدينة المقدسة ثنين و اربعين شهر. ³ و راح نبعث زوز شهود, باه يتنبأوا الف و ميتين و ستين يوم, و همّا لابسين المسوح". ⁴ هاذوما الزوز شهود همّا الزوز زيتونات و المنارتين المنصوبين قدام رب لرض. ⁵ و كي واحد يحب ياذيهم, تخرج من فمهم نار و تاكل عديانهم. هكا لازم يموت كل من يحب ياذيهم. ⁶ و عندهم القدرة باه يقفلوا السماء باه ما تصبش النو ف ليامات اللي يتنبؤوا فيها. و عندهم القدرة باه يبدلوا الماء يولي دم, و باه يضربوا لرض بكل انواع المصايب كيما يحبوا همّا. ⁷ و كي يكملوا الشهادة تاعهم, يجي الوحش اللي خرج من الهاوية و يدخل معاهم ف حرب و يغلبهم و يقتلهم. ⁸ و تكون الجثة تاعهم مرمية ف شوارع لمدينة لعظيمة اللي اسمها الروحي سدوم و مصر, المضرب اللي مات فيه ربنا مصلوب. ⁹ و يشوفوا ناس ياسر من الشعوب و من لقبايل و اللهجات و الامم الجثث تاعهم مدة ثلاثة ايام و نص, و ما يخليو حتى واحد يدفنهم و يحطهم ف لقبورة. ¹⁰ و يشمتوا فيهم سكان لرض و يفرحوا, و يبعثوا يهنيو بعضاهم بالهدايا على خاطر هاذوا الانبياء ف زوز عذبوا سكان لرض عذاب شديد. ¹¹ وف كمالة الثلاثة ايام و نص, تدخل فيهم لحياة من عند الله, و يوقفوا على رجليهم. و الناس اللي كانوا يشوفوا فيهم خافوا خوف كبير. ¹² و سمعوا صوت عظيم من السماء يقول لهم: "اطلعوا لهنا". و طلعوا للسماء ف السحابة, و كانوا العديان تاعهم يشوفوا فيهم. ¹³ و ف هاذيك الساعة صرى زلزال كبير, طاح العشر تاع لمدينة, و مات من الناس سبعة الاف بشر, و لخرين الكل خافوا خوف عظيم, و بداو يمجدوا ف اله السماء. ¹⁴ هاذا الويل الثاني فات, و راح يجي الويل الثالث من وراه ف ساع. ¹⁵ و من بعد نفخ الملاك السابع ف البوق اللي عندو, و علات اصوات عظيمة ف السماء تقول: "ولى مُلك العالم لربنا و للمسيح تاعو, و راح يملك لأبد الابدين". ¹⁶ و الشيوخة الاربعة و العشرين اللي قاعدين على لعروش تاعهم قدام الله, و ركعوا على وجوههم و سجدوا لله, ¹⁷ و قالوا: "نشكرك ياربنا الاله القدير على كل شيء, الكاين و اللي كان و اللي راح يجي, على خاطر بينت الجبروت تاعك و ملكت. ¹⁸ غضبت الامم و جات ساعة الغضب تاعك و ساعة الحكم على الموتى, باه تكافي عبادك الانبياء و القديسين و الناس اللي يخافوا اسمك, الصغار و لكبار, و يهلك الناس اللي كانوا يهلكوا ف لرض". ¹⁹ و تفتح الهيكل تاع الله ف السماء, و ظهر الثابوت تاع العاهد ف الهيكل, و صرى برق و رعد و اصوات و زلزلة و برد عظيم.