¹ و من بعد شفت سماء جديدة و ارض جديدة, على خاطر السماء لولى و لرض لولى فناو, و البحر ما بقاش موجود. ² و انا يوحنا شفت لمدينة المقدسة اورشليم الجديدة نازلة من السماء من عند الله واجدة كيما لعروسة المزينة لراجلها. ³ و سمعت صوت عظيم من السماء يقول: "ها هو المسكن تاع الله مع الناس, و هو يسكن معاهم, و همّا يكونوا ليه شعب, و الله ف ذاتو يكون معاهم اله ليهم. ⁴ و راح يمسح الله كل دمعة تسيل من عينيهم, و ما راح يكون لا موت و لا حزن و لا بكى و لا وجاع, على خاطر الامور لقديمة راحت". ⁵ و قال المتربع على العرش: "انا راح نجعل كل شيء جديد!". و قال لي: "اكتب: هاذا لكلام صدق و حق". ⁶ و زاد قال لي: "تم كل شيء! انا هو الالف و الياء, البداية و النهاية. انا نسقي العطشان من المنبع تاع ماء لحياة بلاش. ⁷ اللي يغلب يورث هاذا الكل, و نكون ليه اله و هو يكون ليّا ابن. ⁸ اما الجبناء و اللي ماهمش مومنين و الاوغاد و القتالين و الزانيين و السحارين و اللي يعبدوا الاوثان و جميع الكذّابين, هاذوك النصيب تاعهم يكون ف القلتة الشاعلة بالنار و الكبريت اللي هو الموت الثاني". اورشليم الجديدة ⁹ و من بعد جاء واحد من السبعة ملايكة اللي عندهم الكيسان السبعة المعمرة من الضربات السبعة لخرة, و تكلم معايا و قالي : "ارواح نوريلك لعروسة مراة لخروف". ¹⁰ و هزني بالروح لواحد الجبل عالي, و ورالي لمدينة العظيمة اورشليم المقدسة نازلة من السماء من عند الله, ¹¹ و عليها هالة تاع مجد الله, و كانت تلمع كيما حجر كريم نادر يشابه لليشب النقي كيما لقزاز. ¹² و كان عندها سور عظيم و عالي, و عندها اثناش ن باب, و ف قدام كل باب واقف ملاك, و مكتوبة اسامي تاع عشاير بني اسرائيل ف اثناش. ¹³ من جيهة الشرق ثلاثة بيبان, و من جيهة الشمال ثلاثة بيبان, و من جيهة الجنوب ثلاثة بيبان, و من جيهة الغرب ثلاثة بيبان. ¹⁴ و سور لمدينة كان عندو ثناش ن عرصة, مكتوب عليها اسامي الرسل تاع لخروف ف ثناش. ¹⁵ و الملاك اللي كان يهدر معايا عندو ف يدو قصبة تاع ذهب باه يقيس بيها لمدينة و البيبان تاعها و السور تاعها. ¹⁶ و لمدينة كانت مربعة, قد طولها قد عرضها. و كي قاس لمدينة لقاها الف و خمسمياة ميل. الطول والعرض و العلو كلها قد بعضاها. ¹⁷ و قاس السور لقاه: مية و اربعة و اربعين قيس ذراع بشر كيما قاس الملاك. ¹⁸ و كان السور مبني من اليشب, و لمدينة بالذهب الخالص تقول عليه قزاز صافي. ¹⁹ و الساسات و السور مزينين بالاحجار الكريمة على كل نوع. الساس لول من اليشب. و الثاني من الياقوت لزرق. و الثالث من لعقيق لبيض. الرابع من الزمرد الذبابي ²⁰ و الخامس من لعقيق الغامق. و السادس من لعقيق لحمر. و السابع من زبرجد. و الثامن من الزمرد السلقي. و التاسع ياقوت اصفر. و العاشر عقيق اخضر. الحادش فيروز. الثانش جمشت. ²¹ و البيبان ف ثناش كانوا عبارة عن ثناش حبة تاع لولو, كل باب من البيبان هو حبة لولي واحدة. و سوق لمدينة ذهب خالص كيما لقزاز الصافي. ²² و ما شفتش فيها هيكل, على خاطر الرب الله القادر على كل شيء, هو و لخروف همّا الهيكل تاعها. ²³ و لمدينة ما تحتاجش للشمس و لا للقمر باه يضوِيوْ فيها, على خاطر الجاه تاع الله نوّرها, و لخروف هو المصباح تاعها. ²⁴ و تمشي شعوب المخلصين ف النور تاعها, و يجيوها الملوك تاع لرض بالمجد و الكرامة تاعهم. ²⁵ و بيبانها ما تقفل لا ليل و لا نهار, على خاطر ما يكونش فيها ليل. ²⁶ و يجيو ليها بالمجد تاع الامم و الكرامة تاعهم. ²⁷ و ما يدخل ليها حتى شيء منجوس و لا من يعمل الرجس و الكذب, غير الناس اللي اساميهم مكتوبة ف كتاب حياة لخروف.