¹ و شفت ملاك نازل من السماء و عندو المفتاح تاع الهاوية, و سلسلة كبيرة ف يدو. ² و قبض على التنين, الحية لقديمة, اللي هو ابليس و الشيطان, و كتفو لمدة الف سنة, ³ و رماه ف الهاوية و قفل عليه, و ختم عليه باه ما بقاش يضللش الامم, حتى كمالة الف سنة. و من بعد لابد يسيبوه لمدة قليلة. ⁴ و شفت عروش تربعوا عليها الناس اللي عندهم سلطة القضاء. و شفت النفوس تاع الناس اللي ماتوا على جال الشهادة تاع يسوع و على جال الكلمة تاع الله. و الناس اللي ما سجدوش للوحش و لا للتصويرة تاعو, و اللي ما قبلوش لمارة تاعو على جبهتهم و لا على يديهم, و عاشوا و ملكوا مع المسيح الف سنة. ⁵ اما الموتى لخرين ما يعيشوش حتى تتم الالف سنة. هاذي هي لقيامة لولى. ⁶ مبارك و مقدس كل من كان ليه نصيب ف لقيامة لولى. هاذوك اللي الموت الثاني ما عندوش القدرة عليهم, بالصح راح يكونوا كهنة لله و للمسيح, و راح يملكوا معاه الف سنة. الحكم على الشيطان ⁷ و ف كمالة الالف سنة يتسيب الشيطان من الحبس تاعو, ⁸ و يخرج باه يضلل الامم اللي ف الجوايه الاربعة تاع لرض: جوج و ماجوج, باه يجمعهم للحرب, و كان العدد تاعهم قد الرمل تاع لبحر. ⁹ و طلعوا على وجه لرض و حاصروا المعسكر تاع القديسين و المدينة المحبوبة, و نزلت نار من السماء من عند الله و كلاتهم. ¹⁰ و ابليس اللي كان يضلل فيهم تطرح ف قلتة النار و الكبريت, وين كاين الوحش و النبي الكذّاب. و راح يتعذبوا نهار و ليل لابد الابدين. الدينونة تاع الموتى ¹¹ و من بعد شفت عرش ابيض عظيم, و القاعد عليه, اللي من وجهو هربت لرض و السماء, و ما بقى لهم حتى اثر! ¹² و شفت الموتى صغار و كبار واقفين قدام الله, و تحلت الكتب, و تحل كتاب اخر هو كتاب لحياة, و تحاسبوا الموتى على الشيء اللي مكتوب ف لكتب حساب اعمالهم. ¹³ و خرج لبحر الموتى اللي فيه, و سلمت الموت والهاوية الموتى اللي فيهم. و كل واحد تعاقب على حساب اعمالو. ¹⁴ و تطرح الموت و الهاوية ف قلتة النار. هاذا هو الموت الثاني. ¹⁵ و كل اللي ما كانش اسمو مكتوب ف كتاب لحياة يتطرح ف قلتة النار.