¹ و من بعد شفت ملاك واحد اخر هابط من السماء, و عندو قدرة كبيرة. و ضوات لرض من بهاه. ² و عيط بصوت قاوي وقال: "طاحت! طاحت بابل العظيمة! ولات سكنى للشواطن و ملجأ لكل روح شرير, و لكل طير ناجس و مكروه, ³ على خاطر جميع الامم شربت من الخمر الزنا تاعها, و ملوك لرض زناو معاها, و تجار لرض استغناو من كثرة النعيم تاعها". ⁴ و من بعد زدت سمعت صوت اخر من السماء يقول: "اخرجوا منها يا شعبي, باه ما تشاركوش ف ذنوبها, و باه ما تتقاسوش بنكباتها. ⁵ على خاطر ذنوبها وصلت للسماء, و ذكر الله الشر تاعها. ⁶ ديروا فيها كيما دارت فيكم, و زيدوها قد ما دارت فيكم زوز مرات. ف الكاس اللي شربتهالكم, زيدوها لها اضعاف. ⁷ على قد ما مجدت روحها و تنعمت, اعطوها لعذاب و الحزن. على خاطر تقول ف قلبها: انا قاعدة هنا ملكة, مانيش ارملة, ما نذوقش الحزن. ⁸ على جال هاذا ف نهار واحد تجي ضرباتها: موت و حزن و جوع, و تتحرق بالنار, على خاطر اللي يحاسبها هو الرب الاله القدير. ⁹ و راح يبكيو و ينوحوا عليها ملوك لرض, اللي زناو و تنعموا معاها, كي يشوفوا دخان لهيبها طالع, ¹⁰ واقفين من بعيد خايفين من عذابها, يقولوا: يا ويلها! يا ويلها! لمدينة لعظيمة بابل! لمدينة الجبارة! على خاطر ف ساعة واحدة جا لحساب تاعك. ¹¹ و يبكيو و ينوحوا عليها تجار لرض, على خاطر واحد ما عاد يشري سلعتهم, ¹² سلعة تاع ذهب و فضة و حجار كريمة و لولو و در و ارجوان و حرير و قرمز, و انواع الطيب و مصنوعات لخشب و النحاس و لحديد و الرخام, ¹³ و القرفة و البخور و الطيب و اللبان و الخمر و الزيت و السميد و القمح, و الحيوانات و لغنم و الخيل, و عربات, واجساد عبيد و نفوس بشر. ¹⁴ راحت عليك الثمار اللي فيها شهوتك, و يروح عليك كل الترف و لبهاء, و ما بقيتيش تشوفيه. ¹⁵ التجار تاع هاذي لحوايج اللي استغناو منها, واقفين من بعيد خايفين من عذابها, يبكيو و ينوحوا, ¹⁶ و يقولوا: يا ويلها! يا ويلها! لمدينة العظيمة اللي كانت تلبس الكتان و الارجوان و القرمز, و تتحلى بالذهب و لحجر الكريم و اللولو! ¹⁷ على خاطر ف ساعة واحدة راح هاذاك الغنى كامل. و ريّاس الفلايك, و البحارة و كل من يخدم ف لبحر, وقفوا من بعيد, ¹⁸ و ولاو يصيحوا و يعيطوا كي شافوا الدخان تاع لهيبها طالع, و هما يقولوا: واش من مدينة عظيمة كيما هاذي؟ ¹⁹ و ذراو التراب على روسهم, و بداو يبكيو و ينوحوا و يصيحوا و يقولوا: يا ويلها! يا ويلها! لمدينة لعظيمة اللي فيها استغناو صحاب لفلايك ف لبحر! ف ساعة واحدة راح كل ما فيها! ²⁰ افرحي يا سماء, و الرسل و القديسين و الانبياء, على خاطر الله عاقبها على الشيء اللي داراتو فيكم". ²¹ و هز ملاك واحد اخر جبار حجرة كبيرة كيما الحجرة تاع الرحى, و رماها ف لبحر و قال: "هكا تتطيش بابل لمدينة العظيمة بعنف, و ما تبقالها حتى ذاكرة. ²² و الصوت تاع العازفين بالقيتارة و المغنيين و النافخين ف الابواق, ما يزيدش يتسمع فيك. و كل صاحب صنعة ما يزيدش يكون فيك, و صوت رحى ما يزيدش يتسمع فيك. ²³ و ما يزيد يضوي فيك ضوء مصباح. و لا يتسمع فيك صوت عروسة و عريس. على خاطر التجار تاعك كانوا عظماء ف لرض. على خاطر بالسحر تاعك غويتي كل الامم. ²⁴ و فيها ساح دم انبياء و قديسين, و كل اللي تقتلوا ف لرض".