¹ و من بعد خرج يسوع من الهيكل و راح, جاو التلامذة عندو و وراولو البرج تاع الهيكل من بعيد. ² قال لهم يسوع: "شفتوا هاذي الكل؟ نقول لكم الحق: ما تبقى هنا حتى حجرة فوق حجرة غير و تريب!". ³ و كي كان قاعد في جبل الزيتون’ جاو ليه التلامذة وحدهم و قالوا: "قول لنا وقتاه يصرى هاذا الشيء؟ واش هي لمارة تاع الوقت اللي ترجع فيه و وقتاه تفنى الدنيا؟". ⁴ رد عليهم يسوع و قال: "شوفوا! واحد ما يغلطكم. ⁵ راح يجيو ياسر بإسمي و يقولوا: انا هو المسيح! و راح يغلطوا ناس ياسر. ⁶ و راح تسمعوا بالحروب و لخبار تاع الحروب. شوفوا ما تخافوش, هاذي الكل لازم تكون, بالصح ما زال مشها لاخرة. ⁷ راح تجور الامم على بعضاها, و السلاطين على بعضاهم, و يكون الجوع و الامراض و زلازل في اماكن ياسر. ⁸ بالصح هاذي الكل ما هي غير البدية تاع لوجاع. ⁹ في هاذاك الوقت يسلموكم للعذاب و يقتلوكم, و تكونوا مكروهين عند الناس الكل على جال اسمي. ¹⁰ و قتها ياسر اللي يخلِيوْ الايمان و يبيعوا بعضاهم. ¹¹ و يظهروا ياسر من الانبياء الكذبة و يغلطوا ناس ياسر. ¹² و يكثر لفساد و تبرد لمحبة في قلوب اغلب الناس, ¹³ بالصح اللي يصبر حتى للخر هاذاك يمنع. ¹⁴ بالصح لاخرة تجي بعدما يسمعوا سكان لرض كاملين ببشارة الملكوت باه تكون شاهدة عليهم. ¹⁵ "نهار اللي تشوفوا "نجاسة لخراب" اللي قال عليها النبي دانيال قايمة في المضرب المقدس- باه اللي يقرى يفهم- ¹⁶ وقتها الناس اللي في اليهودية يهربوا للجبال, ¹⁷ و اللي في السطح ما ينزلش حتى للدار باه كاش ما يهز معاه, ¹⁸ و اللي في الجنان ما يوليش وراه باه يهز قشو. ¹⁹ يا ويل للنساء اللي بلكرش و اللي يرضعوا في هاذيك ليام! ²⁰ صلوا باه ما يصراش هاذا الشيء في الشتاء و الا نهار سبت, ²¹ على خاطر راح يكون وقتها ضيق كبير عمرو ما صرى من اول ما بدات الدنيا و عمرو ما راح يزيد يصرى. ²² و لو كان مش هاذيك ليام نقصت واحد ما كان يمنع. بالصح على جال لمخيرين عند الله نقصت هاذيك ليام. ²³ وقتها كان قال لكم كاش واحد: او المسيح هنا! و الا: او لهيه! ما تصدقوش. ²⁴ على خاطر راح يقوموا مسحاء كذابين و انبياء كذابين و يديروا ايات و عجايب كبيرة, حتى كان قدروا يغلطوا حتى المخيريين ثاني. ²⁵ انا قلت لكم كل شيء و نبهتكم من قبل. ²⁶ و اذا كان قالوا: او في الصحراء! عندكم تروحوا. و الا راه في الديار الداخل! ما تقبلوهمش. ²⁷ على خاطر كيما يخرج لبرق من الشرق و يبان في الغرب, كيما هكا يكون رجوع ابن الانسان. ²⁸ على خاطر وين تكون الجيفة تتلم النسورة. ²⁹ "و من ورى الضيقة تاع هاذيك ليام تظلام الشمس, و يطفى ضوء القمرة, و تطيح النجوم من السماء, و تتزعزع السماوات. ³⁰ وقتها تظهر لمارة تاع ابن الانسان في السماء. وقتها راح تنوح كل لجناس اللي في الدنيا, و يشوفوا ابن الانسان جاي على سحاب السماء بقوة و بمجد كبير. ³¹ و يبعث لملايكات تاعو بصوت البوق القاوي خلاص, و يلموا المختارين تاعو من الجوايه في ربعة, من اخر الدنيا لاخر السماوات. ³² من الشجرة تاع الكرطوس تتعلموا لمثل: كي يكون عرفها طري و يخَرّج لورقة, تعرفوا باللي الصيف قرّب. ³³ حتى انتوما ثاني هكا, وقت اللي تشوفوا هاذا كامل صرى اعرفوا باللي الوقت راه قريب و راه على الابواب. ³⁴ نقول لكم الحق: ما يفوتش هاذا الجيل حتى يصرى هاذا الشيء كامل. ³⁵ السماء و لرض يفناو بالصح كلامي ما يفناش. كونوا ديما واجدين ³⁶ "اما هاذوك ليام و هاذيك الساعة واحد ما يعلم بيهم, حتى لملايكات تاع السماوات, غير الاب برك هو وحدو اللي يعلم. ³⁷ و كيما صرى في ايام نوح هكذاك ثاني يصرى كي يجي ابن الانسان. ³⁸ على خاطر كيما كانوا الناس قبل الطوفان ياكلوا و يشربوا و يزوجوا و يتزوجوا, حتى للنهار اللي دخل فيه نوح للفلوكة, ³⁹ و ما فاقوش حتى دهم عليهم الطوفان و ادّاهم الكل, هكذاك يكون رجوع ابن الانسان. ⁴⁰ وقتها يكونوا زوز من الناس في الجنان, يترفع واحد و يبقى لاخر. ⁴¹ و زوز نساء يرحيو على الرحى, تترفع واحدة و تبقى الاخرى. ⁴² "مالا اسهروا على خاطر ما تعلموش واش من ساعة يجي فيها سيدكم. ⁴³ يكون في علمكم: لو كان جا مولى الدار يعرف وقتاه يجيه السرّاق, كان سهر و ما خلاهش يسرقو. ⁴⁴ على هاذا الشيء كونوا انتم ثاني موجدين ارواحكم, على خاطر ابن الانسان يجي في ساعة ما تتوقعوهاش. لمثل تاع لخديم مولى لمانة ⁴⁵ شكون هو لخديم اللي مولى امانة و رزين اللي وكلو سيدو على الخدامين لخرين باه يعطيهم الماكلة في وقتها؟ ⁴⁶ يا سعد هاذاك لخديم نهار اللي يرجع سيدو يلقاه يخدم في خدمتو كيما وصاه! ⁴⁷ نقول لكم الحق: راح يزيد يوكلو على رزقو كامل. ⁴⁸ بالصح اذا كان هاذاك لخديم ماهوش ناس ملاح و قال في قلبو: سيدي راح يبطى باه يرجع. ⁴⁹ و يبدى يضرب في خاوتو الخدامين و ياكل و يشرب مع السكارجية. ⁵⁰ و يجي سيدو في نهار ما يتوقعوش و في ساعة ما يعرفهاش, ⁵¹ راح يقطعوا و يجعلو مع المنافقين. وين يكون النواح و الرعدة.