¹ وقتها كلّم يسوع الغاشي و التلامذة تاعو معاهم ² و قال لهم: "الكتبة و الفريسيين تربعوا على الكرسي تاع موسى, ³ و كل شيء يقولوا لكم تحرسوا عليه احرسوا عليه و ديروه, بالصح ما تعملوش اعمالهم, على خاطر همّا يهدروا اما لفعال ما كانش. ⁴ يوجدوا احمال ثقيلة بالسيف ما تتهز و يحطوها على اكتاف الناس, و همّا ما يحركوش حتى شعرة باه يعاونوهم, ⁵ و لعمال الكل اللي يعملوها غير باه ينعتوا ارواحهم للناس: يعرضوا في الشاش و يطولوا في البرنوس, ⁶ يحبوا ديما يقعدوا في اعز مكان في لعراس, و الصفوف لولى تاع المجالس, ⁷ و يحبوا الناس تسلم عليهم في لسواق, و يحبوا الناس كي يعيطولهم: سيدي سيدي! ⁸ اما انتوما ما تقولوا لحتى واحد سيدي, على خاطر المعلم تاعكم واحد و هو المسيح, و انتوما الكل خاوة, ⁹ و ما تعيطوا لحتى واحد فوق لرض اب, على خاطر باباكم واحد اللي هو في السماوات. ¹⁰ و ما تعيطوا لحتى واحد معلم, على خاطر المعلم تاعكم واحد و هو المسيح. ¹¹ اكبر واحد فيكم يكون هو لخديم تاعكم. ¹² اللي يعلي في يروحو يهبط. و اللي يهبط من روحو يعلى. الويلات للكتبة و الفريسيين ¹³ "يا ويلكم يا الكتبة و الفريسيين المنافقين! على خاطر تقفلوا ملكوت السماوات في وجه الناس, لا انتوما تدخلوا و لا تخلِيوْ لخرين يدخلوا. ¹⁴ يا ويلكم يا لكتبة و الفريسيين المنافقين! على خاطر تاكلوا مال ليتامى, و تلعبوها تطولوا في الصلاة, راح تتعذبوا عذاب شديد. ¹⁵ يا ويلكم يا الكتبة و الفريسيين المنافقين! على خاطر تجولوا لبحر والبر باه تكسبوا مؤمن واحد للدين تاعكم, و كي يجي تجعلوه يستاهل جاهنامة اكثر منكم. ¹⁶ يا ويلكم يا القادة العميان! تقولوا: اللي يحلف بالهيكل ماهوش ملزم بالحلف تاعو, بالصح اللي يحلف بالذهب تاع الهيكل يكون ملزم بالحلف تاعو. ¹⁷ يا جاهلين و يا عميان! شكون شانو اعظم من لاخر الذهب و الا الهيكل للي يقدس الذهب؟ ¹⁸ و تقولوا: اللي يحلف بالمذبح ما هوش ملزم بالحلف تاعو, بالصح اللي يحلف بالذبيحة اللي تتذبح فوق المذبح يكون ملزم بالحلف تاعو. ¹⁹ يا جاهلين و يا عميان! شكون اللي شانو اعظم من لاخر: الذبيحة و الا المذبح اللي يقدس الذبيحة؟ ²⁰ اللي يحلف بالمذبح يكون حلف بيه و بكل ما فيه! ²¹ و اللي يحلف بالهيكل يكون حلف بيه و باللي ساكن فيه, ²² و اللي يحلف بالسماء يكون حلف بعرش الله و المتربع عليه. ²³ يا ويلكم يا الكتبة والفريسيين يا واحد المنافقين! تمدوا لعشور تاع النعناع و الشبث و الكمون, و خليتوا اثقل حاجة في الشرع: الحق و الرحمة و ليمان. كان لازم تديروا هاذي و ما فرطوش في هاذيك. ²⁴ يا القادة العميان! يا اللي تصفوا ع الذبانة و تبلعوا الجمل. ²⁵ يا ويلكم يا الكتبة و الفريسيين يا واحد المنافقين! تنظفوا الكاس والصحفة من لبرى, و همّا مليانين من الداخل بالزنا و السرقة. ²⁶ يا الفريسي الاعمى! نظف قبل الكاس و الصحفة من الداخل تنظاف من برى ثاني. ²⁷ يا ويلكم يا الكتبة و الفريسيين يا واحد المنافقين! على خاطر انتوما تشابهوا للقبورة المجيرة من برى تبان مليحة, بالصح من الداخل مليان بعظام الموتى و كل نجاسة. ²⁸ حتى انتوما ثاني هكا: من لبرى تبانوا للناس صالحين, بالصح انتوما من الداخل مليانين بالنفاق و الاثم. ²⁹ يا ويلكم يا الكتبة و الفريسيين يا واحد المنافقين! على خاطر تبنِيوْ لقبورة تاع الانبياء و تزينوا لمدافن تاع الصالحين, ³⁰ و تقولوا: لو كان جينا في زمان جدودنا ما كنّاش نشاركوا في دم الانبياء. ³¹ راكم تشهدوا على ارواحكم باللي انتوما اولاد قتالين الانبياء. ³² الشيء اللي بقى على جدودكم كملوه انتوما. ³³ يا واحد لحنوشة اولاد لفاعي! كيفاه راح تمنعوا من عذاب جاهنامة؟ ³⁴ على هاذيك انا راح نبعث لكم انبياء وحكماء و كتبة, اللي تقتلوه تقتلوه واللي تصلبوه تصلبوه, و منهم اللي تضربوهم في مجالسكم, و تحاوزوهم من بلاد لبلاد, ³⁵ هكا تتحملوا مسؤولية الدم البريء اللي ساح على لرض, من دم هابيل الصدّيق حتى لدم زكريا بن برخيا اللي قتلتوه بين الهيكل و المذبح. ³⁶ نقول لكم الحق: هذا الشيء كامل يصرى في هاذا الجيل! يسوع يبكي على اورشليم ³⁷ "اورشليم, يا اورشليم! يا قتالة ارواح لنبياء يا راجمة المرسولين اللي جاوك, قدّاه من مرة حبيت نلم اولادك كيما تلم الدجاجة لفلالس تحت جنحاها, بالصح انتوما ما حبيتوش! ³⁸ هاي داركم تقعد لكم خربة. ³⁹ نقول لكم: من اليوم ما تزيدوش تشوفوني حتى يجي النهار اللي تقولوا فيه: تبارك الله على اللي جاي باسم ربي!".