¹ و زاد كلمهم يسوع ثاني بأمثال و قال: ² "يشابه ملكوت السماوات لواحد السلطان دار عرس ولدو, ³ و بعث الخدامين تاعو باه يعيطوا على الناس المعروضين للعرس, بالصح همّا ما حبوش يجِيوْ. ⁴ زاد بعث لهم خدامين اخرين وقال لهم قولوا للمعروضين: اني وجدت لغدا و ذبحت الثيران و لكباش المخزونة, و كل شيء راه واجد, ارواحوا للعرس! ⁵ بالصح هما رخفوا ارواحهم و راحوا كل واحد في حالو, اللي راح للجنان تاعو, و اللي راح للتجارة تاعو, ⁶ و كاين حتى اللي حكموا الخدامين سبوهم و قتلوهم, ⁷ و كي سمع السلطان بعث العسكر و قتل هاذوك القتّالين و حرق مدينتهم. ⁸ و من بعد قال للخدامين: العرس واجد, بالصح المعروضين ما كانوش يستاهلوا. ⁹ روحوا اخرجوا للطرق, و جيبوا كل واحد تلقاوه اعرضوه للعرس. ¹⁰ و خرجوا الخدامين للطرق و لموا كل من لقاوه يصلح و الا ما يصلحش.و تعبى هاذاك العرس بالمعروضين. ¹¹ و كي دخل السلطان باه يتفقد المعروضين, شاف واحد ما كانش لابس لبسة تاع فرح. ¹² قالّو: يا صحيبي كيفاه دخلت هنا و انت ماكش لابس لبسة العرس؟ سكت الراجل. ¹³ ولى السلطان قال للخدامين تاعو: كتفوه من يديه و رجليه, و هزوه ارموه لبرى في الظلمة. وين كاين لبكاء و الرجفة. ¹⁴ على خاطر المعروضين ياسر بالصح لمخيرين قلال". المكس تاع قيصر ¹⁵ و من هاذيك الساعة راحوا الفريسيين و تشاوروا باه يصيدوه بكاش كلمة. ¹⁶ و بعثولوا التلامذة تاعهم مع جماعة هيرودس قالوا: "يا معلم, احنا علابالنا باللي راك صادق و تعلم في الناس طريق ربي بالحق, و ما يهمك حتى واحد, و ما تشوفش للوجوه. ¹⁷ قول لنا: واش تقول حلال نخلص المكس للقيصر و الا لا؟". ¹⁸ عرف يسوع لخبث تاعهم و قال: "وعلاه تجربوا فيّا يا واحد المنافقين؟ ¹⁹ اعطوني دينار نشوفوا". جابولو دينار. ²⁰ قال لهم: "هاذي التصويرة و لكتيبة تاع شكون؟". ²¹ قالوا: "تاع قيصر". قال لهم: "مالا مدوا حق قيصر لقيصر و مدوا حق الله لله". ²² و كي سمعوا كيفاه جاوبهم تعجبوا في الهدرة تاعو و خلاوه و راحوا. لقيامة تاع الموتى ²³ و في هاذاك النهار جاو ليه الصدوقيين, اللي ما يصدقوش لقيامة, و سقساوه ²⁴ و قالوا: "يا معلم, قال موسى: لو كان واحد يموت و ما يخليش ذرية وراه, يزوج خوه بالمرى تاعو و يجيب ذرية على اسم خوه. ²⁵ كان عندنا سبعة خاوة, تزوج لول و مات. و ما خلاش ذرية, ولى خوه رجّع لمرى. ²⁶ و حتى هو مات بلا ما يخلي ذرية و الثالث وهكا صرى حتى ماتوا في سبعة. ²⁷ و من بعد زادت ماتت لمرى حتى هي. ²⁸ نهار القيامة راح تكون مرة شكون فيهم؟ على خاطر كانت متزوجة بيهم في سبعة!" ²⁹ جاوبهم يسوع و قال: "راكم غالطين على خاطر ما تعرفوش لكتب ولا قوة الله. ³⁰ على خاطر في القيامة لا يزوجوا لا يتزوجوا, بالصح يكونوا كيما الملايكة تاع الله في السماء. ³¹ اما من جيهة قيامة الموتى, ما قريتوش الشيء اللي قال عليه الله: ³² انا اله ابراهيم و اله اسحاق و اله يعقوب؟ و الله ما هوش اله تاع موتى هو اله ناس حيين". ³³ و كي سمعوه الناس واش قال حاروا من التعليم تاعو. اعظم وصية ³⁴ اما الفريسيين كي سمعوا بيه كيفاه سكّت الصدوقيين تلموا مع بعضاهم و راحوا عندو, ³⁵ و سقساه واحد منهم, و هو واحد من علماء الشرع, باه يجربو قالو: ³⁶ "يا معلم, وش هي اعظم وصية في شرع الله؟". ³⁷ قال يسوع: "تحب ربي الهك من كل قلبك, و من كل روحك, و من كل فكرك. ³⁸ هاذي هي لوصية لولى و الاعظم فيهم الكل. ³⁹ و الثانية كيما هي بالضبط: تحب قريبك كيما روحك. ⁴⁰ بهاذو الزوز وصيات يتعلق كل شرع الله و الانبياء". المسيح و داود ⁴¹ و كي كانوا الفريسيين متلميين سقساهم يسوع ⁴² و قال: "واش قولكم في المسيح؟ هو ولد شكون؟" قالوا: "بن داود". ⁴³ قال لهم: "مالا كيفاه داود كي يكون في الروح يعيطلو ربي؟ وقت اللي قال: ⁴⁴ "قال الرب لربي: اقعد على يميني حتى نحط عديانك تحت رجليك. ⁴⁵ اذا كان داود يعيطلو ربي, كيفاه يكون ولدو؟". ⁴⁶ واحد فيهم ما قدر يرد عليه بكلمة. و من هاذاك النهار واحد ما عاد يتجرأ و يسقسيه في اي حاجة.