¹ و كي قربوا لاورشليم و وصلوا لبيت فاجي في جبل الزيتون, وقتها بعث يسوع زوز من التلامذة ² و قال لهم: "روحوا ادخلوا للقرية هاذي اللي مقابلتكم, راح تلقاو بهيمة موَحلة و معاها جحش, حلوها و جيبوهم. ³ و اذا كاش واحد قالكم حاجة, قولولو: ربي يحتاجهم. ضرك يخليكم تدِيوهم". ⁴ و هاذا الشيء كامل صرى باه يتم واش قال النبي: ⁵ "قولوا لبنت صهيون: سلطانك راح يجيك متواضع, راكب على بهيمة و جحش يتبع فيها". ⁶ و راحوا التلامذة في زوز و داروا الشيء اللي قاللهم عليه يسوع, ⁷ و جابوا لبهيمة و الجحش معاها, و حطوا قشهم فوقها و قعد يسوع عليهم. ⁸ و ناس ياسر فرشوا قشهم في الطريق. و وحايد اخرين قصوا اعراف الشجر و فرشوها في الطريق. ⁹ و الناس اللي كانوا يتبعوا فيه وراه و قدامو كانوا يعيطوا و يقولوا: "اوصانا لابن داود! مبارك اللي جاي بإسم ربي! اوصنا في لعلالي!". ¹⁰ و كي دخل لاورشليم لمدينة كاملة دخلت في بعضاها و الناس الكل يسقسِيو: "شكون هو هاذا؟". ¹¹ قالولهم: "هاذا هو يسوع النبي اللي من ناصرة الجليل". يسوع ينقي الهيكل ¹² و دخل يسوع للهيكل تاع الله و سحت الناس الكل اللي كانوا يبيعوا و يشرِيوْ في الساحة تاع الهيكل, و قلب الميَد تاع الصرّافة و لكراسي تاع بياعة لحمام ¹³ و قال لهم: "مكتوب: بيتي يسموه بيت الصلاة, و انتوما رجعتوه غار تاع سراقين!". ¹⁴ و جاو ليه ناس عميان و عيَاب للهيكل و هو رتحهم. ¹⁵ و الكتبة و رياس الكهنة كي شافوا لعجايب اللي دارهم, و كي سمعوا لولاد يعيطوا في وسط الهيكل و يقولوا: "اوصنا لوليد داود!". تغششوا ¹⁶ و قالوا لو: "اك تسمع فيهم واش قاعدين يقولوا؟". قال لهم يسوع: "نعم راني نسمع! علاه عمركم ما قريتوا: وجّدت تسبيح من فم لاولاد و الذراري؟". ¹⁷ و من بعد خلاهم و راح خارج لمدينة لبيت عنيا و بات لثمة. شجرة الكرطوس تيبس ¹⁸ و في الصباح كي كان راجع للمدينة جاع, ¹⁹ و شاف شجرة تاع كرطوس على حاشية الطريق, قصدها و كي وصل لها ما لقى فيها حتى شيء غير لورق برك. قال لها: "من ليوم عمرو ما يكون فيك ثمار!". و في وقتها بالذات يبست هاذيك الشجرة تاع الكرطوس. ²⁰ و كي شافوا التلامذة واش صرى تعجبوا و قالوا: "كيفاه يبست شجرة الكرطوس ثم ثم؟". ²¹ قال لهم يسوع: "نقول لكم الحق: اذا كان عندكم ايمان و ما تشكوش, مش غير تعملوا امر الشجرة برك, بالصح حتى لو كان تقولوا لهاذا الجبل: اتهز و طيح في لبحر يصرى الشيء الي قلتوه. ²² كل ما تطلبوه في الصلاة و انتوما مآمنين باللي راح يكون تنالوه". منين جا سلطان يسوع ²³ و كي دخل للهيكل جاو ليه ريّاس الكهنة و الشيوخة تاع الشعب و هو كان يعلم و سقساوه: "بواش من سلطان راك تعمل في الشيء اللي تدير فيه؟". ²⁴ جاوبهم يسوع و قال لهم: "و حتى انا ثاني نسقسيكم على حاجة واحدة, كي تجاوبوني نقول لكم بواش من سلطان ندير هذا الشيء: ²⁵ المعمودية تاع يوحنا المعمدان: من عند شكون كانت؟ من عند الله و الا من عند الناس؟". و كي خمموا مع ارواحهم قالوا: "لو كان نقولوا من عند الله, يقول لنا: علاش مالا ما تامنوش بيه؟ ²⁶ و اذا قلنالو: من عند الناس, نخافوا لا ينوض فينا الشعب, على خاطر يوحنا كيما نبي عند الناس الكل". ²⁷ و لاو ردوا على يسوع و قالوا: "ما نعرفوش". قال لهم هو ثاني: "حتى اما ما نقولش بواش من سلطان ندير الشيء اللي راني ندير فيه. لمثل تاع زوز اولاد ²⁸ "واش رايكم؟ كان واحد الراجل عندو زوز اولاد, راح لولدو لول و قالو: يا وليدي روح اليوم اخدم في الجنان. ²⁹ قالو ولدو: ما نروحش. بالصح من بعد ندم و راح. ³⁰ و راح لوليدو الثاني و قالو كيف كيف. قالو ولدو الثاني: معليش يا سيدي. ضرك نروح. و ما راحش. ³¹ شكون من هاذو في زوز عمل واش طلب منو باباه؟". قالوا: "لول". قال لهم يسوع نقول لكم الحق: السماسرة و اللي يزنيو راح يسبقوكم لملكوت الله, ³² على خاطر جاكم يوحنا في طريق الحق بالصح انتوما ما امنتوش بيه, اما السماسرة و اللي يزنيو امنوا بيه. و حتى للخر كي شفتوا بعينيكم ما ندمتوش و ما امنتوش بيه. لمثل تاع الخدامين و في جنان لعنب ³³ اسمعوا نزيدكم مثل واحد اخر: و كان واحد الراجل مولى رزق غرس جنان تاع كرم, و سيج عليه, و حفر فيه معصرة, و بنى فيه برج, و سلموا للكرامين و راح سافر. ³⁴ و كي قرب وقت اللي يحصد فيه الثمار بعث الخدامين تاعو للكرامين باه يدي المحصول. ³⁵ راحوا الكرامين حكموا الخدامين اللي ضربوه ضربوه و اللي قتلوه قتلوه و اللي دمغوه دمغوه. ³⁶ و من بعد زاد بعث خدامين اخرين اكثر من لولين, زادوا دارولهم كيف كيف. ³⁷ و اخر حاجة بعث لهم ولدو قال: ضرك يخافوا من ولدي! ³⁸ اما الكرامين كي شافوا الابن تفاهموا بيناتهم و قالوا: هذا هو لوريث! ارواحوا نقتلوه و ندِيو احنا الورثة! ³⁹ و اداوه و خرجوه من الجنان و قتلوه. ⁴⁰ و كي يجي مولى الرزق, واش يدير في هاذوك الكرامين؟". ⁴¹ قالوا: "هاذوك الاشرار يقتلهم و شوية فيهم, و يسلم الجنان لكرامين اخرين يمدولو المحاصيل في وقتها". ⁴² قال لهم يسوع: عمركم ما قريتوا في لكتب: الحجرة اللي رماوْها البنايين ولات هي راس الزاوية؟ هذا الشيء امر ربي و احنا نشوفوه حاجة غريبة! ⁴³ على هاذا الشيء نقول لكم: ملكوت الله يتنحى من عندكم و يتمد لامة تخدم الثمار تاعو. ⁴⁴ و اللي يطيح على هاذي الحجرة يتكسر, و اللي تطيح عليه الحجرة تدقدقو!". ⁴⁵ و كي سمعوا رياس الكهنة و الفريسيين لمثال تاعو, فهموا باللي يهدر عليهم, ⁴⁶ و كانوا حابين يقبضوا عليه, بالصح خافوا من الغاشي, على خاطر الناس كانوا حاطينوا نبي.