¹ "يشابه ملكوت السماوات لواحد الراجل مولى رزق خرج الصباح بكري باه يكري خدامين للجنان تاعو, ² و تفاهم مع الخدامين باه يخلصهم دينار واحد في النهار, و هكا بعثهم للجنان. ³ و من بعد جوايه الثلاثة زاد خرج و لقى خدّامين واحد اخرين قاعدين في السوق بلا خدمة, ⁴ قال لهم روحوا حتى انتم اخدموا في الجنان و نعطيكم حقكم. ولاو راحوا يخدموا. ⁵ و زاد خرج على الستة و على التسعة و دار كيما المرة لولى ثاني. ⁶ و كي زاد خرج على لحداش لقى واحد اخرين قاعدين بلا خدمة, قال لهم: علاه راكم قاعدين بلا خدمة نهار كامل؟ ⁷ قالوا: حتى واحد ما كرانا باه نخدموا عندو. قال لهم: روحوا انتم ثاني للجنان اخدموا و اديو حقكم. ⁸ و كي عشات لعشية قال مول الجنان للراجل اللي مكلفو باه يخلص الخدامين: عيط للخدامة و اعطيهم حقهم و ابدى من لخرين حتى توصل لل اولين. ⁹ جاو تاع لحداش و اداو الكل دينار دينار. ¹⁰ و كي وصلت دالة لولين كانوا حاسبين باللي راح يخلصهم اكثر من لخرين. بالصح اعطاهم حتى همّا دينار. ¹¹ و هو يخلص فيهم ما عجبهمش الحال من مولى الرزق ¹² و قالوا: هاذوك لخرين خدموا غير ساعة واحدة, و خلصتينا كيف كيف احنا واياهم و احنا نهار كامل واقفين للقايلة! ¹³ اما هو قال لواحد منهم: ا صاحيبي, انا ما ظلمتكش! ياخي تفاهمت معايا على دينار؟ ¹⁴ خلاص ادي صواردك و روح, ما يهمكش فيّا انا حاب نخلص الخدّام لخر كيما انت. ¹⁵ و الا تسالني كيفاه نتصرف في مالي؟ و الا حاسدني على خاطر كريم؟ ¹⁶ هكّا يكونوا لخرين همّا لوالى و لولين همّا لخرين, على خاطر المعروضين ياسر بالصح لمخيرين قلاّل". يسوع يخبر على الموت و القيامة تاعو من بين الموتى ¹⁷ و كي كان يسوع طالع لاورشليم دا التلامذة وحدهم على جيهة في الطريق و قال لهم: ¹⁸ "رانا طالعين لاورشليم, وين يطيح ابن الانسان في يد رياس الكهنة و الكتبة, و همّا يحكموا عليه بالموت, ¹⁹ و يسلموه للامم يستهزاو بيه و يضربوه و يصلبوه, و ثالث يوم يقوم من بين الموتى". الشيء اللي طلباتو ام ولاد زبدي من يسوع ²⁰ في هاذاك الوقت قدمت ام ولاد زبدي هي و اولادها و سجدت و حبت تطلب منو حاجة. ²¹ قال لها: "واش تطلبي؟". قالت: "نطلب منك تخلي ولادي يقعدوا معاك في الملكوت تاعك واحد على ليمين و واحد على ليسار". ²² رد عليها يسوع و قال: "ما علابالكمش و اش قاعدين تطلبوا. تقدروا تشربوا من لكاس اللي رايح نشربها انا, و تقدروا تتصبغوا بالصبغة اللي رايح نتصبغ بيها انا؟". قالوا "نعم نقدروا". ²³ رد عليهم و قال: "الكاس تاعي تشربوه, و الصبغة تاعي تتصبغوا بيها. بالصح لقعاد على يميني و على يسارى منقدرش نمدوا غير للناس اللي بابا وجدو ليهم باه يقعدوا فيه". ²⁴ و كي سمعوا التلامذة العشرة لخرين هذا لكلام غاظهم الحال من الخاوة ولاد زبدي. ²⁵ ولّى يسوع عيط لهم و قالهم: "راكم علابالكم باللي الرياس تاع هاذي الدنيا يسيطروا عليهم, و الزعماء يتسلطوا عليهم. ²⁶ اما انتوما ما يكونش هاذا الشيء بيناتكم. بالصح اللي يحب يكون فيكم كبير يكون ليكم خديم, ²⁷ و اللي يحب يكون فيكم لول يكون هو لخديم فيكم, ²⁸ كيما ابن الانسان ما جاش باه يخدموا عليه بالصح جا باه يخدم, و باه يمد روحو فدية على ناس ياسر". يسوع يشفي زوز عميان في اريحا ²⁹ و كي كانوا خارجين من اريحا تبعوه ناس ياسر, ³⁰ و كان واحد الزوز عميان قاعدين على حاشية الطريق. و كي سمعوا باللي يسوع معدي من لثم بداو يعيطوا و يقولوا: "ارحمنا يا سيدي, يا ولد داود!". ³¹ و بداو الناس يبخصوا فيهم باه يسكتوا, بالصح همّا بقاو يعيطوا على طول اصواتهم و يقولوا: "ارحمنا يا سيدي, يا ولد داود!". ³² ولى وقف يسوع و عيط لهم و قال لهم: "واش تستحقوا واش نديرلكم؟". ³³ قالوا: "يا سيدي, افتح لنا عينينا!". ³⁴ حن عليهم يسوع و مسهم على عينيهم, و في هاذاك الوقت بالذات تحلت عينيهم ولاو يشوفوا و و بداوْ يتبعوا في يسوع.