¹ و كي كمل يسوع هذا لكلام راح من الجليل و وصل لجوايه اليهودية من وراء الاردن. ² و تبعوه ناس ياسر حتى لثمة وهو شفاهم. ³ و جاو عندو الفريسيين باه يطيحوه في لكلام و قالوا: "حلال على الراجل يطلق مرتو لاي سبة؟". ⁴ و هو جاوبهم و قال: "ما قريتوش اللي خلقهم من لول خلقهم ذكر وانثى؟ ⁵ و قال: "على جال هذا الشيء يخلي الراجل باباه و امو و يلصق في مرتو, ⁶ و يولِيوْ في زوز بدن واحد. و اللي يلموا الله ما يفرقوش العبد." ⁷ و زادوا قالوا: "علاه مالا موسى وصى باه نمدولها ورقة طلاق و تكون طالقة؟". ⁸ قال لهم: "على جال قلوبكم القاسية سمحلكم موسى باه تطلقوا نساكم. بالصح من الاول ماكانش هكَا. ⁹ و نقول لكم: " كل من يطلق مرتو بلا ما تكون السبًة الزنى و يتزوج من واحدة اخرى يزني, و اللي يتزوج بواحدة مطلقة يزني." ¹⁰ قالوا التلامذة تاعو: "مالا اذا كان كيما هكًا حالة الراجل مع لمرى, خيرلو كان ما يتزوجش." ¹¹ قال لهم: "مش كل الناس يقبلوا هاذ لكلام بالصح غير اللي معطية ليهم, ¹² كاين اللي من نهار ولدوا و همًا عاجزين على الزواج, و كاين اللي الناس همَا اللي جعلوهم ماهمش قادرين على الزواج, و كاين اللي وحدهم ما يتزوجوش على جال ملكوت السماوات. اللي قادر يقبل هاذا الشئ يقبلوا". يسوع يبارك لولاد الصغار ¹³ وقتها جابولو ذراري صغار باه يحط يدو عليهم و يصلي, بالصح بخسوهم التلامذة. ¹⁴ اما يسوع قال لهم" خلوا لولاد يجيو عندي ما تحَرموش عليهم على خاطر ملكوت السماوات يكون للناس اللي كيما هما". ¹⁵ و حط يديه عليهم و من بعد راح من لثم. الشاب اللي عندو لمال ¹⁶ و جاه واحد و قالو: "يا المعلم الصالح, واش هو الصلاح اللي لازمني نديرو باه نربح لحياة الدايمة؟". ¹⁷ قالو يسوع: " علاه تعيطلي صالح؟ كاين غير واحد برك صالح و هو الله. و اذا كان حبيت تنا ل لحياة الدايمة اعمل بالوصايا". ¹⁸ قال لو: "واش من وصايا؟". قال يسوع: "ما تقتلشز ما تزنيش. ما تسرقش. ما تشهدش بالزور. ¹⁹ قدر باباك و امك, حب كيما تحب روحك". ²⁰ قال هاذاك الشاب: "هاذي الكل من صغري و انا نعمل بيها. واش يخصني نزيد ندير؟". ²¹ قال يسوع: "اذا كان حبيت تولي كامل روح بيع كل واش تملك و صدق على الفقراء, و هكا يولي عندك كنز ف السماء, و من بعد ارواح تبعني". ²² و كي سمع الشاب هاذا لكلام راح روًح و هو حزين على خاطر كان عندو اموال ياسر. ²³ و قال يسوع للتلامذة تاعو: "نقول لكم الحق: صعيب ياسر على واحد غني باه يدخل لملكوت السماوات. ²⁴ و نزيد نقول لكم ثاني: الجمل اسهل عليه كي يعدي من ثقبة لبرى من الغني باه يدخل لملكوت الله. ²⁵ و كي سمعوا التلامذة هاذا لكلام حاروا و قالوا: "مالا شكون يقدر يمنع؟". ²⁶ تلفت لهم يسوع و قال لهم:" هاذا الشيء ماهوش مقدور عليه عند الناس, بالصح عند الله كل شيء مقدور عليه". ²⁷ وقتها هدر بطرس و قال: "و احنا رانا سيبنا كل شيء و تبعاك. واش تمدلنا؟". ²⁸ قال لهم يسوع: "نقول لكم الحق: انتوما اللي تبعتوني, نهار اللي يتربع الابن على عرش المجد, وقت اللي يتجدد فيه كل شيء, انتم ثاني تقعدوا معاه على اثناش ن عرش باه تحكموا على عروش بني اسرائيل في ثناش. ²⁹ و كل من خلى ديار, و الا خاوة و الا خواتات و الا اب والا ام و الا زوجة و الا اولاد و الا جنانات على جال اسمي يرجعوا مياة مرة و يربح لحياة الدايمة. ³⁰ بالصح ياسر من لوالى يولوا هما التوالى و التوالى يولوا هما لوالى.