1 و نهار السبت لاخر اللي بعد السبت لول عدى يسوع في وسط الزرَع. و كانوا التلامذة تاعو ينحِيوْ ف السبول و يفركوها بين يديهم و ياكلوا. 2 و كي شافوهم جماعة الفريسيين قالوا لهم: "علاه تديروا هكا هاذا الشيء ما يحلش تديروه نهار السبت؟". 3 رد عليهم يسوع و قال: "و انتوما ما قريتوش على الشيء اللي داروا داود, كي جاع هو واللي كانوا معاه؟ 4 كيفاه دخل لبيت الله و كلى من لخبز تاع الزيارة, و زاد مد للناس اللي كانوا معاه همّأ ثاني كلاو, وهاذاك لخبز ما كان يحل غير للكهنة برك". 5 و قال لهم: "ابن الانسان هو ثاني رب السبت". يسوع يرتح واحد نهار السبت 6 و نهار سبت واحد اخر دخل للمجمع و بدى يعلم و كان ثمة واحد الراجل يدو ليمنى مكمشة, 7 و كانوا الكتبة و الفريسيين يعسوا على يسوع باه يشوفوه يشفي نهار السبت و الا لا, باه يلقاو حاجة يحكموها عليه. 8 اما يسوع كان عارف واش راهم يخمموا, و قال للراجل اللي يدو مكمشة: "نوض اوقف ف الوسط". ناض و وقف في النص. 9 و من بعد قال لهم يسوع: "نسقسيكم حاجة: نهار السبت يحل لنا نديروا الخير و الا نديروا الشر؟ نسلكوا نفس والا نقتلوها؟". 10 و من بعد ما خزر فيهم الكل قال للراجل: "مد يدك". و كي مد يدو رجعت صحيحة كيما يدو لخرى. 11 تغشوا عليه الكل و بداو يتشاوروا بيناتهم واش يديروا مع يسوع. يسوع يخاير التلامذة ف ثناش 12 و في هاذيك ليام طلع للجبل باه يصلي. و قعد ليلة كاملة و هو يصلي لله. 13 و كي طلع النهار جاب التلامذة و خاير منهم ثناش ن واحد, اللي سماهم من بعد ثاني "رسل" و همّا: 14 سمعان اللي سماه بطرس و اندراوس خوه. و يعقوب و يوحنا. فيليبس و برتولماوس. 15 متى و توما. يعقوب بن حلفي و سمعان اللي يقولولوا الغيور. 16 و يهوذا خو يعقوب, و يهوذا الاسخريوطي اللي خانو من بعد. بركات و ويلات 17 و هبط معاهم حتى ن وصلوا للسهل, و كان هو و التلامذة الكل و معاهم ناس ياسر من الشعب, من بلاد اليهودية الكل و اورشليم و الشط تاع صور و صيداء, اللي جاو باه يسمعوه واش يعلم و باه يبراو من امراضهم, 18 و الناس اللي معذبين و مسكونين بالجنون. و كانوا يبراو. 19 و الناس طلبوا منو يخليهم يمسوه, على خاطر كانت تخرج منو قوة و ترتح الناس الكل. 20 و هز عينيه للتلامذة و قال لهم: "المساكين يا سعدكم, على خاطر ملكوت الله يكون ليكم. 21 يا اللي اليوم جيعانين, يا سعدكم يجيكم نهار اللي تشبعوا فيه, يا اللي باكيين اليوم, يا سعدكم يجي نهار اللي تضحكوا فيه. 22 يا سعدكم كان الناس كرهوكم, و طردوكم و عايروكم, و بغظوكم كيما العديان على جال ابن الانسان. 23 هاذاك النهار افرحوا وزيدوا, على خاطر اجركم كبير في السماء, هكذا كانوا جدودهم يديروا مع الانبياء. 24 بالصح يا ويلكم يا الاغنياء, على خاطر نلتوا فرحتكم. 25 يا ويلكم يا اللي شبعانين, على خاطر راح تجوعوا, يا ويلكم يا اللي تضحكوا اليوم, على خاطر راح تحزنوا و تبكِيوْ. 26 يا ويلكم اذا الناس الكل ذكروكم بالخير. على خاطر هكا كانوا جدودهم يديروا مع الانبياء المزورين. محبة العديان 27 "بالصح انا نقول لكم يا السامعين: حبوا عديانكم, ديروا الخير في اللي يكرهوكم, 28 باركوا اللي يلعنوكم, صلوا للناس اللي يديروا فيكم الشر. 29 اللي ضربك على خدك زيد لقيلو الخد لاخر, و اللي ادالك برنوسك ما تحكمش عليك ثوبك ثاني. 30 كل من يطلبك اعطيه, و اللي ادالك خليه. 31 و عاملوا الناس بالشيء اللي تحبوا الناس يعاملوكم بيه. 32 كان حبيتوا غير الناس اللي يحبوكم, واش من مزية عندكم؟ حتى المذنبين يحبوا اللي يحبوهم. 33 واذا عملتوا الخير غير في الناس اللي يديروا فيكم الخير, واش من مزية عندكم؟ حتى المذنبين هما ثاني يديروا هكا. 34 و كان تسلفوا برك غير للناس اللي راح يخلصوا. واش من مزية عندكم؟ حتى المذنبين همّا ثاني يسلفوا للمذنيين اللي عارفينهم يخلصوا الدين كامل. 35 حبوا عديانكم, ديروا الخير و حلوا ضيقة المحتاج بلا ما تسناو منو يرجع, هكا يكون اجركم كبير و تكونوا ولاد العالي, اللي ينعم على نكارين الخير و الاشرار. 36 كونوا حتى انتوما رحماء كيما باباكم الرحيم. الحكم على لخرين 37 "ما تطلبوا ما تكونوا مطلوبين. ما تحكموا على حتى واحد باه واحد ما يحكم عليكم. اغفروا يتغفر لبكم. 38 كيما تمدو تلقاو, كيل مليح مدكوك مهزوز فايض تلقاو بين يديكم. على خاطر الميزان اللي توزنوا بيه لغيركم يتوزن بيه ليكم انتم ثاني" 39 و زاد قال لهم هاذا لمثل: "كاش ما كاين اعمى بقدر يقود اعمى كيفو؟ في زوز يطيحوا في حفرة؟ 40 التلميذ عمرو ما يكون خير من لمعلم تاعو, بالصح التلميذ اللي يولي كامل يكون كيما المعلم بالذات. 41 علاه تشوف القشة اللي في عين خوك, بالصح اللوحة اللي في عينك ما تفيقش بيها؟ 42 كيفاه تقول لخوك: خليني نحيلك القشة اللي في عينك. و انت ما تشوفش اللوحة اللي في عينك انت؟ يا واحد المنافق! خرج الشيء اللي في عينك انت قبل. و من بعد كي تعود تشوف مليح خرج القشة من عين خوك. الشجرة و ثمارها 43 على خاطر ما كانش شجرة صالحة و تجي ثمارها بيثر, و ما كانش شجرة بيثر تجي ثمارها صالحة. 44 على خاطر كل شجرة من ثمارها تتعرف. الشوك عمرو ما يجيب الكرطوس, و العليق عمرو ما يجيب لعنب. 45 الواحد كي يكون ناس ملاح من صندوق قلبو لمليح يخرج الصلاح, اما الخايب من صندوق قلبو الخايب يخرج الشر. على خاطر من مكنون القلب يتكلم اللسان. البنّاية الفاهمين و البنّاية الجُهال 46 "علاه تنادِيو لي: يا ربي, يا ربي. و انتوما ما تديروش الشيء اللي وصيتكم بيه؟ 47 كل من يجي عندي و يسمع كلامي و يخدم بيه نقول لكم لشكون يشابه. 48 يشابه لواحد الراجل بنى دار, حفر و غرّقْ و حط الساس على لحجار. نهار اللي جات الشتاء و فاض الواد على هاذيك الدار ما قدرش يزعزعها, على خاطر كان الساس تاعها مبني عل لحجار. 49 اما اللي يسمع كلامي و ما يخدمش بيه, يشابه لواحد بنى دارو بلا ساس, نهار اللي فاض عليها الواد ثم ثم طاحت, و كانت طيحة خايبة!".