¹ و كي كمل كلامو كامل اللي قالو للشعب دخل لكفرناحوم ² و قايد لمياة عسكري, كان عندو خدّام مريض وصل للموت, و كان عزيز عليه. ³ و كي سمع بيسوع, بعث ليه الناس لكبار تاع ليهود باه يشوفوه يجي ويرتح الراجل اللي يخدم عندو. ⁴ و كي راحوا ليسوع قالولو: "هو واحد يستاهل تقضيلو حاجتو, ⁵ على خاطر يحب الامة تاعنا, و هو اللي بنى لنا المجمع". ⁶ و راح يسوع معاهم. و كي قرب يوصل للدار, بعث لو القايد مع صحابو و قالو: "يا سيدي, بلا ما تَّعب روحك. انا ما نتساهلش تدخل لداري. ⁷ و على هاذا الشيء ما حطيتش في بالي حتى كان نقدر نجيك نوقف قدامك. بالصح قول برك كلمة يبرى الراجل اللي يخدم عندي. ⁸ على خاطر انا ثاني عندي شكون فوق مني في المرتبة, و عندي عسكر تحت يدي. اللي نقولو روح يروح و اللي نقولو ارواح! يجي, و اللي نقولو يدير حاجة! يديرها". ⁹ و كي سمع يسوع هاذا لكلام تعجب فيه, و شاف ف الناس اللي كانوا معاه و قال: "نقول لكم: في اسرائيل كاملة ما لقيتش ايمان كيما هاذا!". ¹⁰ و كي رجعوا صحابو للدار لقاو لخدّام برى. ابن ارملة نايين يقوم من الموت ¹¹ و اليوم وغدوة راح يسوع لواحد لمدينة اسمها نايين, و راحوا معاه تلامذة ياسر و غاشي كبير. ¹² و كي قرب يوصل للدخلة تاع لمدينة, شافوا جنازة تاع واحد الطفل, امو ما تسعاه كان هو, و كانت ارملة و معاها غاشي كبير من لمدينة. ¹³ و كي شافها الرب حن علاها, و قال لها: "ما تبكيش". ¹⁴ و قدم للنعش و حط يدو عليه, ولاو الناس اللي كانوا هازينو وقفوا. و قال: "يا شاب, نقول ليك قوم من لموت!". ¹⁵ ناض الميت و قعد و بدى يهدر, و رجعو لامو. ¹⁶ الناس الكل خافوا, و مجدوا الله و قالوا: "قام في وسطنا نبي كبير, و الله تفقد الشعب تاعو". ¹⁷ و شاع عليه هاذا لخبر في بلاد اليهودية كاملة و الجوايه الكل اللي دايرين بيها. يسوع و يوحنا المعمدان ¹⁸ و راحوا التلامذة تاع يوحنا و خبروه بهاذا الشيء كامل. ¹⁹ ولى عيط لزوز من التلامذة تاعو, و بعثهم عند يسوع باه يسقسِيوْه: "انت هو اللي جاي و الا نسناو واحد اخر؟". ²⁰ و كي وصلوا التلامذة عند يسوع و قالوا: "بعثنا ليك يوحنا المعمدان و راه يقولك: انت هو اللي جاي و الا نسناو واحد اخر؟". ²¹ و في هاذيك الساعة رتّح يسوع ناس ياسر من اللي كانوا مرضى و اللي كانت عندهم علة و اللي كانوا مسكونين بالجنون, و رجع النظر لناس ياسر كانوا عميان. ²² و رد يسوع على تلامذة يوحنا و قال: "روحوا ليوحنا و خبروه بالشيء اللي شفتوه و سمعتوه: العميان يشوفوا, العيّاب يمشيو, و اللي عندهم لبرص يبراو, و الطرُش يسمعوا, و الموتى يقوموا من الموت, و المساكين يسمعوا بشارة الخير. ²³ يا سعد اللي ما يغلطش فيّا". ²⁴ و كي راحوا المرسولين تاع يوحنا, بدى يحكي للناس على يوحنا: "كي خرجتوا للصحراء واش كنتوا حابين تشوفوا؟ قصبة يدي فيها الريح؟ ²⁵ و الا واش خرجتوا تشوفوا واحد لابس لحرير؟ اللي لابسين لحرير راهم يتنعموا في قصور السلاطين. ²⁶ واش خرجتوا تشوفوا؟ نبي؟ نعم, نقول لكم" و خير حتى من نبي! ²⁷ هاذا هو اللي مكتوب عليه: "انا نرسل الملاك تاعي قبلك باه يوجدلك طريقك قدامك! ²⁸ نقول لكم: من بين كل اللي جابتهم النساء ما كانش اعظم من يوحنا المعمدان, بالصح اصغر واحد في الملكوت تاع الله يكون اعظم منو". ²⁹ و كل الناس كي سمعوا و السمسارة تاع المكس اعطاو حق الله و تعمدوا بالمعمودية تاع يوحنا. ³⁰ اما الفريسيين و علماء الشرع ما قبلوش واش حب لهم الله, و ماتعمدوش على يدو. ³¹ و من بعد قال لهم الرب: "باه نشبه اولاد هاذا الجيل؟ وش هي الحاجة اللي يشبهولها؟ ³² يشابهوا لذراري قاعدين في السوق يعيطوا على بعضاهم و يقولوا: زمرنالكم ما حبيتوش تشطحوا. ندبنالكم ما حبيتوش تبكِيوْ. ³³ على خاطر جا يوحنا المعمدان لا يوكل خبز و لا يشرب شراب, قلتوا عليه: ساكنوا جن. ³⁴ جا ابن الانسان ياكل و يشرب, قلتواعليه: هاذا واحد مكراش و سكارجي, و يحب العشارين و المذنبين. ³⁵ و الحكمة تظهر بناسها". يسوع يغفر لمرى زانية ³⁶ و عرضو واحد فريسي باه يجي يتغدى عندو, راحلو للدار و تضيَف عندو. ³⁷ و واحدة لمرى في لمدينة كانت زانية, سمعت باللي يسوع معروض في دار الفريسي, جات و جابت قرعة تاع ريحة, ³⁸ و قعدت عند رجلين يسوع من لورى و هي تبكي و الدموع تطيح على رجلين يسوع, و هي كانت تمسح فيها بشعرها, و كانت تبوس في رجليه و تدهن فيهم بالريحة. ³⁹ و كي شاف الفريسي اللي عرضو واش صرى, قال بينو بين روحو: "لو كان جا هاذا نبي, راو عرف واش تكون هاذي لمرى اللي تمس فيه و واش عاملة! راهي زانية". ⁴⁰ رد عليه يسوع و قالو: "يا سمعان, عندي حاجة حاب نقولهالك".قال: "يا معلم, قول". ⁴¹ "كان و احد الراجل يسال زوز من الناس. واحد يسالو خمسمياة دينار و لوخر يسالو خمسين. ⁴² و على خاطر ما كانش عندهم باه يخلصوا الدين اللي عليهم سامحهم في زوز. شكون منهم كان يحبو اكثر من لاخر؟" ⁴³ رد عليه سمعان و قال: "نضن اللي سامحو بالدين لكبير". قالو يسوع: "كلامك صواب". ⁴⁴ و من بعد خزر للمرى و قال لسمعان: "اك تشوف هاذي لمرى؟ انا دخلت لدارك, و انت ما جبتليش لماء باه نغسل رجليا. اما هي غسلت رجليا بالدموع و مسحتهم بشعرها. ⁴⁵ انت ما سلمتش عليا حتى ببوسة واحدة, اما هي من اللي دخلت و هي تبوس في رجليا. ⁴⁶ انت ما صبيت حتى قطرة تاع زيت على راسي, اما هي دهنت رجليا بالريحة. ⁴⁷ على جال هاذا الشيء كامل نقول لك: ذنوبها لكثيرة الكل تغفرت, على خاطر حبت ياسر. و اللي يتغفر لو لقليل يحب قليل". ⁴⁸ و من بعد قال لها: "ذنوبك مغفورة". ⁴⁹ و بداو الناس اللي كانوا معاه يقولوا في قلوبهم: "شكون هاذا اللي حتى الذنوب و يغفرها؟". ⁵⁰ و زاد قال للمرى: "ايمانك سلكك على خير, روحي متهنية".