1 و رجع يسوع من نهر الاردن و كان مليان بالروح القدس, و كان الروح يقود فيه في الصحراء 2 لمدة ربعين يوم باه يجربو ابليس. و في هاذيك ليام ما دخل في فمو حتى شيء من الماكلة. و كي كملت ربعين يوما جاع. 3 و قال ليه ابليس: "اذا كنت ابن الله, قول لهاذي الحجرة تولي خبز". 4 رد عليه يسوع و قال: "مكتوب: مش غير بالخبز وحدو يعيش الانسان, بالصح يعيش بكل كلمة تخرج من عند الله". 5 و من بعد طلعو ابليس لجبل عالى و وراه المماليك تاع الدنيا الكل في رمشة عين. و قال ليه ابليس: 6 "نمد ليك هاذا الملك كامل بيه بالعز تاعو, على خاطر هاذا كامل تمد ليا, وانا نمدو للي تحب. 7 لو كان تسجد لي هاذا كامل يكون ليك". 8 رد عليه يسوع و قال: "بعد عليا يا شيطان! على خاطر مكتوب: غير للرب الهك برك تسجد و غير هو وحدو برك اللي تعبد". 9 و من بعد اداه لاورشليم, و حط بيه على جناح الهيكل و قال ليه: "لو كان انت ابن الله صح ارمي روحك من هنا للتحت, 10 على خاطر او مكتوب: يوصي ملايكاتو بيك في طريقك يعسو عليك 11 على يديهم يهزوك ما تدعثر بحجار رجليك". 12 رد عليه يسوع و قال: "بالصح قال: ما تجربش الرب الهك". 13 و كي كمل ابليس التجربة كاملة راح عليه حتى وقت اخر. الناصرة ما تقبلش يسوع 14 و رجع يسوع بقوة الروح للجليل, و سمعوا باخبارو في هاذوك الجوايه كاملين. 15 و كان يعلم في وسط المجامع تاعهم و الناس الكل كانت تقدروا. 16 و وصل للناصرة اللي تربى فيها. و دخل للمجمع كيما العادة نهار السبت و وقف باه يقرى في لكتاب, 17 مدولوا كتاب اشعياء النبي. و حل لكتاب لقى وين مكتوب: 18 "روح ربي عليا,على خاطر دهنني باه المساكين بالخير نبشرهم, بعثني اللي قلوبهم مكسورة نداويهم, باه المأسورين للحرية نناديهم, والعميان النظر يرجع ليهم, و المظلومين للحرية نعديهم, 19 و نعلن للناس وقت ربي للقبول". 20 و من بعد طبق لكتاب و رجعو للخادم تاع المجمع, و قعد, بالصح الناس الكل بقاو يخزروا فيه. 21 و هو قال لهم: "اليوم تم هاذا لكلام المكتوب اللي سمعتوه". 22 و كلهم شهدوا ليه و تعجبوا من لكلام تاع النعمة اللي كان يخرج من فمو, و قالوا: "مش هاذا هو وليد يوسف؟". 23 قال لهم: "على كل حال راح تقولولي هاذا لمثل: يا طبيب داوي روحك! اعمل هنا في بلادك كيما سمعنا بيك تدير في كفرناحوم". 24 و قال: "نقول لكم الحق: ما كاين حتى نبي مقبول في بلادو. 25 نقول لكم الحق: كانوا كاينين هجالات ياسر بكري في اسرائيل في وقت ايليا وقت اللي ما صبتش فيه النو ثلاثة سنين و ستة اشهر. و كي كانت المجاعة في لبلاد كاملة, 26 و ايليا ما راح لحتى واحدة منهم, بالصح بعثو الله لواحدة الهجّالة, ساكنة في صرفة صيداء. 27 و كانوا ناس ياسر مرضى بالبرص في اسرائيل في زمان النبي اليشع, بالصح واحد فيهم ما برى من مرضو غير نعمان السرياني". 28 و الناس اللي كانوا في المجمع تغشوا عليه كي سمعوا هاذا لكلام, 29 وقفوا و خرجوه برى لمدينة, و جابوه للحاشية تاع الجبل اللي كانت مبنية عليه لمدينة و حبوا يرموه من لثمة. 30 اما هو عدى بيناتهم و خرج من وسطهم. راجل مسكون يبرى 31 و هبط لكفرناحوم, مدينة في الجليل, وكان يعلم لثمة ايامات السبت. 32 و الناس تعجبوا من التعليم تاعو, على خاطر كلامو كانت فيه قوة و سلطان. 33 و كان في المجمع راجل ساكنو جن, عيط بصوت عالى 34 و قال: "اه! واش كاين بينّا و بينك يا يسوع الناصري؟ جيت باه تقضي علينا! انا نعرفك مليح شكون انت: انت القدوس تاع الله!". 35 نهرو يسوع و قالو: "اسكت! و اخرج منو!". صرعو الجن و طيحو في لوسط و خرج منو و ما ضرو حتى بشيء. 36 و هاذوك الناس الكل حاروا, و كانوا يقولوا في بعضاهم: "وش هاذا لكلام؟ عندو قوة و سلطان يامر على الجنون تخرج!". 37 و شاعوا لخبار عليه في هاذيك الجوايه كاملة. نسيبة بطرس تبرى هي و اخرين 38 و كي خرج من المجمع راح لدار سمعان. و كانت نسيبتو مريضة حكمتها سخانة كبيرة, كي طلبوا منو يشفاها. 39 قرب لها و نهر السخانة تناحت لها! و ثم ثم وقفت و بدات تخدم فيهم. 40 و كي بدات الشمس تغرب, جميع اللي عندهم ناس مرضى بامراض مختلفة جابوهم ليسوع, و حط يديه على كل واحد فيهم و رتّحهم. 41 و كانت الجنون ثاني تخرج من ناس ياسر مسكونين و هي تعيط و تقول: "انت المسيح ابن الله!". و اما هو نهرهم ما خلاهمش يهدروا, على خاطر عرفوه باللي هو المسيح. 42 و كي طلع النهار خرج من الدار و راح لمكان خالي, و كانوا الناس يحوسوا عليه. و كي لقاوه حكموه و ما خلاوهش يروح و يخليهم. 43 قال لهم: "لازم عليا نبشر المدن الاخرى حتى همّا بالملكوت تاع الله, على خاطر هاذا هو الشيء اللي جيت على جالو". 44 و راح يبشر في لمجامع تاع الجليل.