1 و في العام الخمسطاش من حكم طيباريوس قيصر, وقت اللي كان بيلاطس قيصر والي على بلاد اليهودية, و هيرودس رايس ربوع على الجليل, و فيلبس خوه رايس ربوع على ايطورية و جوايه تراخونييتس, و ليسانيوس رايس ربوع على الابلية, 2 في ايامات رايس الكهنة حنّان و قيافا, كانت كلمة الله ليوحنا بن زكريا في الصحراء, 3 و جا للجوايه الدايرة بنهر الاردن و بدى ينادي في وسط الناس بالمعمودية تاع التوبة باه يتغفروا ذنوبهم. 4 كيما مكتوب في كتاب النبي اشعياء اللي قال: "صوت ينادي في الصحراء و يقول: وجدوا طريق ربي, اجعلوا مساربو مقدودة. 5 كل حدرة واطية تعلى و كل جبل و كدية عالية توطى, و الطرق العوجة تتسقم, و الشعبة الواعرة تسهال, 6 و سلاك الله لكل انسان يبان". 7 و كان يقول للناس اللي يجيو عندو باه يعمدهم: "يا ولاد لفاعي, شكون قالكم راح تمنعوا من الهول اللي جاي؟ 8 اعملوا ثمار تليق بالتوبة. و ما تقولوش بينكم و بين ارواحكم: احنا بابانا ابراهيم. على خاطر نقول لكم: الله قادر يجعل من هاذي لحجار اولاد لابراهيم. 9 و ضرك الفاس تحط على اصل الشجرة, و كل شجرة ما تمدش ثمار صالحة تتقص و تتحرق بالنار". 10 و سقساوه الناس الكل و قالوا: "واش نديروا؟" 11 رد عليهم و قال: "اللي عندو زوز لبسات يمد للي ما عندوش, و اللي عندو ماكلة يمد للي ما عندوش". 12 و جاو عندو تاع المكس حتى هما باه يعمدهم و قالوا: "يا سيدي قلنا واش نديروا؟". 13 قال لهم: "ما تطلبوش على الناس اكثر من الشيء اللازم عليهم". 14 و سقساوه العسكر ثاني و قالوا: "و احنا واش نديروا؟". قال لهم: "ما تظلمو حتى واحد, ما تحقروا حتى واحد, اقنعوا بالشيء اللي عندكم". 15 و على خاطر الشعب كامل كان يسنى, و الناس الكل كانوا بينهم وبين ارواحكم يخمموا في يوحنا بلاك يكون هو المسيح, 16 بالصح يوحنا رد عليهم الكل و قال: "انا نعمد فيكم بالماء, بالصح يجي من بعدي اللي هو اقوى مني, اللي انا ما نستاهلش باه نحل سيور سباطو. و هو راح يعمدكم بالروح القدس و النار. 17 اللي هاز المذرى في يدو, و راح يصفي الطرحة, يلم القمح للمخزن, و التبن يحرقو بنار ما تطفاش". 18 و حوايج اخرى ياسر كان يوصي بيها الناس و كان يبشر فيهم. 19 اما هيرودس رايس الربوع على خاطر وبخوا على جال هيروديا مرت خوه فيلبس و على جال المناكر الكل اللي كان يعمل فيها, 20 و زاد كملها كي دخّل يوحنا للحبس. معمودية يسوع المسيح 21 و بعد ما تعمدوا الناس الكل جا يسوع ثاني يتعمد. و كي كان يصلي تحلت السماء, 22 و نزل عليه الروح القدس في هيئة حمامة. و جا صوت من السماء يقول: "انت هو وليدي لحبيب, بيك رضيت". نسب يسوع المسيح 23 و كي بدى يسوع الخدمة تاعو كان عمرو قريب ثلاثين سنة, و كانوا الناس يعتبروه ولد يوسف بن هالي, 24 بن متاثيا, بن لاوي, بن ملكي, بن ينّا, بن يوسف, 25 بن مثانبا, بن عاموص, بن ناحوم, بن حسلي, بن نجاي, 26 بن مات, بن متاتيا, بن شمعي, بن يوسف, بن يهوذا, 27 بن يوحنا, بن ريسا, بن زربابل, بن شألتيئيل, بن نيري, 28 بن ملكي, بن أدي, بن قصم, بن ألمودام, بن عير, 29 بن يوسي, بن أليعازر, بن يوريم, بن متثات, بن لاوي, 30 بن شمعون, بن يهوذا, بن يوسف, بن يونان, بن ألياقيم, 31 بن مليّا, بن مينان, بن متاثا, بن ناثان, بن داود, 32 بن يسى, بن عوبيد, بن بوعز, بن سلمون, بن نحشون, 33 بن عميناداب, بن ارام, بن حصرون, بن فارص, بن يهوذا, 34 بن يعقوب, بن اسحاق, بن ابراهيم, بن تارح, بن ناحور, 35 بن سروج, بن رعو, بن فالح, بن عابر, بن شالح, 36 بن فينان, بن ارفكشاد, بن سام, بن نوح, بن لامك, 37 بن متوشالح, بن اخنوخ, بن يارد, بن مهللئيل, بن قينان, 38 بن انوش, بن شيث, بن ادم, بن الله.