1 و في هاذيك ليام صدر مرسوم من عند اوغسطس قيصر باه كل الناس يسجلو رواحهم في الاحصاء. 2 و هاذا هو الاحصاء لول اللي صرى وقت اللي كان كيرينيوس والي على سوريا. 3 و الناس الكل راحوا باه يسجلوا ارواحهم كل واحد للمدينة تاعو. 4 و طلع يوسف ثاني من الجليل من مدينة الناصرة و راح لليهودية, لمدينة داود اللي يقولولها بيت لحم. على خاطر هو من بيت داود و من العشيرة تاعو, 5 باه يسجل روحو هو ومريم اللي كانت مخطوبة ليه و كانت بالكرش. 6 و كي كانوا لثمة وصل وقتها باه تولد. 7 و ولدت و جابت وليدها البكر و قمطاتو و حطاتو في لمراح, على خاطر ما كانش عندهم مكان في الدار. الملايكة و السرّاح 8 و كان في هاذيك الجيهة سرّاح مخيمين يعسوا في الليل على الغنم تاعهم. 9 و هما قاعدين وقف عليهم ملاك الرب و ضوى عليهم مجد الرب, اما هما خافوا خوف كبير خلاص. 10 قال لهم الملاك: "ما تخافوش! انا جيت نبشر فيكم بفرحة كبيرة راح تكون للناس الكل: 11 ولد لكم اليوم في مدينة داود مخلص هو المسيح الرب. 12 و هاذي هي لمارة ليكم: تلقاو الطفل مقمط و راقد في لمراح". 13 و ظهر لهم على غرّادة مع الملاك غاشي كبير من جنود السماء و همّا يسبحوا في الله و يقولوا: 14 "العزّة لله في لعلالي, و على لرض السلام. و بالناس الفرحة". 15 و كي راحو عليهم الملايكة و طلعوا للسماء, قالوا السرّاح لبعضاهم: "هيا نروحوا لبيت لحم و نشوفوا هاذا الامر اللي صرى و اللي خبرنا بيه الرب". 16 و راحوا بالرزبة, و لقاو مريم و يوسف و الطفل في لمراح. 17 و كي شافوه خبروهم بالكلام كامل اللي تقال لهم على هاذا الطفل. 18 و الناس الكل اللي سمعوا تعجبوا من الشيء اللي قالوه. 19 اما مريم خبات هاذا لكلام كامل في قلبها و قعدت تتخمم فيه. 20 و رجعوا السرّاح و هما يسبحوا في الله و يحمدوا فيه على كل اللي شافوه و سمعوه كيما خبرهم الملاك. يسوع يطهروه و يقدموه للهيكل 21 و في كمالة ثمانية ايام اداو الطفل و طهروه و سموه يسوع, كيما سماه الملاك فبل ما تهز بيه مريم بالكرش. 22 و كي تمت ايامها باه تتطهر, على حساب الشرع تاع موسى, طلعوه لاورشليم باه يقدموه للرب, 23 كيما مكتوب في شرع الله: كل من هو ذكر فاتح لرحام يتنذر قدوس للرب. 24 و باه يقدموا ذبيحة كيما قال الشرع: طيرين حجل و الا طيرين حمام. 25 و كان واحد الراجل في اورشليم اسمو سمعان, كان صالح و يخاف الله و يستنى لفرج تاع الله لبني اسرائيل, و كان عليه الروح القدس. 26 وحى ليه الله بالروح القدس باللي ما يموتش حتى ن يشوف مسيح الرب. 27 قادو الروح باه يجي للهيكل. و كي دخلوا والدين يسوع بالطفل, باه يعملوا حساب العادة تاع الشرع, 28 هزو في حضنتو و بارك الله و قال: 29 "ضرك تسَرح عبدك بالسلامة يا سيدي على حساب قولك, 30 على خاطر شفت خلاصك بعينيا, 31 اللي وجدتو للشعوب الكل. 32 نور يهدي الامم, و عزة لشعبك اسرائيل". 33 و كان يوسف و مريم يتعجبوا م الشيء اللي تقال عليه. 34 و باركهم سمعان, و قال لمريم امو: "هاذا تجعل باه ياسر يطيحوا و ياسر يقوموا في اسرائيل, و اية تتقاوم, 35 و انتي ثاني يجوز عليك السيف يعدي في روحك, و ناس ياسر تتكشف نيات قلوبهم". 36 و كانت واحدة النبية, اسمها حنة بنت فنوئيل من عرش اشير, و هي مرى كبيرة في لعمر خلاص, عاشت مع راجلها سبع سنين بعد زواجها و من بعد مات و خلاها. 37 قعدت هجالة قريب اربعة و ثمانين سنة, ما فارقتش الهيكل, تعبد و تصوم و تصلي ليل و نهار, 38 و في هاذيك الساعة وقفت تسبح في ربي, و هدرت عليه لكل الناس اللي كانوا يسناو في الفرج في اورشليم. 39 و كي كملوا كل شيء حساب شرع الله, رجعوا ل الجليل ل مدينتهم الناصرة. 40 و كان الطفل يكبر و يتقوى بالروح, و يفيض بالحكمة, و كانت نعمة الله عليه. الطفل يسوع يبقى في الهيكل 41 و كانوا امو و باباه يروحوا مرة في العام لاورشليم في عيد الفصح. 42 و كي كان عمرو ثناش ن سنة طلعوا كيما العادة ل اورشليم في العيد. 43 و بعد ما كملوا ليامات و هما راجعين لاورشليم قعد الطفل يسوع في اورشليم, و يوسف وامو ما فاقوش بيه. 44 على خاطر كانوا حاسبينوا مع صحابو, و من بعد ما مشاو نهار كامل, جاو يحوسوا عليه بين العايلة و لمعارف. 45 و كي ما لقاوهش رجعوا لاورشليم يحوسوا عليه. 46 و من بعد ثلاثة ايام لقاوه في الهيكل, قاعد في وسط المعلمين, يسمع لهم و يسقسي فيهم. 47 و الناس الكل اللي سمعوه حاروا في العلم تاعو و جواباتو. 48 و كي شافوه لثمة حاروا. و قالت لو امو: "يا وليدي, علاش درت فينا كيما هكّا؟ انا و باباك تعذبنا و احنا نحوسوا عليك!". 49 قال لهم: "علاش كنتوا تحوسوا عليا؟ ما علاباكمش باللي لازم نكون في الامور اللي تخص بابا؟". 50 بالصح ما فهموش واش قال. 51 و من بعد هبط معاهم و راحوا للناصرة و كان طايعهم, و كانت امو تخبي هاذي الامور الكل في قلبها. 52 اما يسوع كان يكبر في الحكمة و الطول و النعمة, عند الله و عند الناس.