¹ و تلم الغاشي الكل و اداو يسوع لبيلاطس, ² و شْكاو بيه و قالوا: "لقينا هاذا الراجل يفسد ف الامة, و يحرم على الناس يمدوا الضريبة للقيصر, و قال: باللي هو المسيح الملك". ³ سقساه بيلاطس وقال: "مالا انت هو الملك تاع ليهود؟". رد عليه يسوع و قال: "راك انت اللي تقول". ⁴ ولى قال بيلاطس لرياس الكهنة و للشعب: "ما لقيت حتى ذنب في هاذا الراجل". ⁵ اما هم بقاو حاكمين ف الهدرة تاعهم وقالوا: "راهو يهيج ف الشعب و يعلم ف بلاد اليهودية كاملة بدا من الجليل و وصل حتى لهنا". ⁶ و كي سمع بيلاطس كلمة الجليل, سقسى: "هاذا الراجل من الجليل؟" ⁷ و كي عرف باللي هو من الولاية تاع هيرودس, بعثو لهيرودس, على خاطر كان هاذيك ليام ف اورشليم. ⁸ اما هيرودس كي شاف يسوع فرح ياسر, على خاطر كان حاب يشوفو هاذا زمان, كي سمع عليه حوايج ياسر, و تمنى يشوف منو معجزة يديرها قدامو. ⁹ و كان يسقسي فيه على امور ياسر اما يسوع ما جاوبو بحتى شيء. ¹⁰ و وقفوا رياس الكهنة و العلماء تاع الشريعة يشكيو بيه يتهموا فيه بتهم كبيرة, ¹¹ و حقرو هيرودس هو و العسكر تاعو و استهزاو بيه, و لبسو لبسة تلمع, و زاد رجعو ل بيلاطس. ¹² و في هاذاك النهار ولى بيلاطس و هيرودس اصحاب, على خاطر كانوا قبل متعاديين. الحكم بالموت ¹³ عيط بيلاطس على رياس الكهنة و الرجال لكبار اصحاب الجاه من الشعب, ¹⁴ و قال لهم: "انتم جبتوا لي هاذا الراجل و قلتوا عليه قاعد يفسد ف الشعب. و انا تحققت معاه قدامكم و ما لقيت فيه حتى ذنب من الشيء اللي اتهمتوه بيه. ¹⁵ و حتى هيرودس ثاني ما لقى والو ف هاذا الراجل, على خاطر بعثتكم عندو. و هو ما دار حتى حاجة يستاهل عليها الحكم بالموت. ¹⁶ ضرك نعاقبو و نسَيبو يرَّوح". ¹⁷ و كان لازم يسيب لهم في كل عيد واحد من المحابسية. ¹⁸ ولاو كلهم يعيطوا و يقولوا: "احكم هاذا! و سيّب لنا باراباس!". ¹⁹ و باراباس كان دخل للحبس على خاطر دار فتنة كبيرة و صرات قتيلة ف لمدينة. ²⁰ زاد قال لهم بيلاطس مرة اخرى و هو حاب يسيب يسوع, ²¹ بداو يعيطوا و يقولوا: "اصلبو! اصلبو!". ²² زاد قال لهم للمرة الثالثة: "واش من شر عمل هاذا الراجل؟ ما لقيت فيه حتى ذنب يستاهل عليه الموت, نعاقبوا و نسَيبوا". ²³ و كانوا يعيطوا باصوات عالية طالبين باه يتصلب. و قْوَات اصواتهم و اصوات رياس الكهنة. ²⁴ ولى حكم لهم بيلاطس كيما حبوا. ²⁵ و سيَّب اللي كان محبوس على جال الفتنة و لقتيلة, دار لهم واش طلبوا, و سلم لهم يسوع يديروا فيه كيما حبوا. الصلب ²⁶ و كي كانوا ماديينوا يصلبوه لقاو ف الطريق واحد اسمو سمعان, راجل من القيروان كان راجع من الجنان, حطوا المادرية تاع الصليب فوق ظهروا باه يهزها و يمشي ورى يسوع. ²⁷ و مشى وراه غاشي كبير من الشعب, و النساء كانوا يندبوا و ينوحوا عليه. ²⁸ تلفت لهم يسوع و قال: "يا بنات اورشليم ما تبكيوش عليّا انا ابكيو على ارواحكم و على اولادكم, ²⁹ على خاطر تجي ايامات يقولوا فيها: يا سعد اللي ما ولدت و ما جابت اولاد و ما رضعت! ³⁰ وقتها يقولوا للجبل: طيح علينا! و يقولوا للكدية غطينا! ³¹ اذا كان داروا هكا مع العرف الطري, كيفاه مالا يديروا مع العرف اليابس؟". ³² و جابوا زوز مجرمين اخرين باه يقتلوهم معاه. ³³ و كي وصلوا بيه للمضرب اللي اسمو "جمجمة".صلبوه ثمة مع المجرمين, واحد على ليمين و واحد على ليسار. ³⁴ و قال يسوع: "يا بابا, اغفر لهم, على خاطر ماعلبالهمش واش يديروا". و كي كانوا يقسموا في قشو بيناتهم داروا عليه القُرعة. ³⁵ و الشعب كامل واقفين يشوفوا, ومعاهم الرياس تاعهم و كانوا يستهزاو بيه و يقولولوا: "منّع ناس اخرين, يمنّع روحو ضرك اذا كان هو المسيح المختار تاع الله!". ³⁶ و العسكر ثاني كانوا يستهزاو بيه يجيو و يمدولوا ف الخل, ³⁷ و يقولوا: "كي عدت انت هو الملك تاع ليهود منّع روحك!". ³⁸ و كانت لوحة فوق منو مكتوبة بحروف يونانية و رومية و عبرية: "هاذا هو الملك تاع ليهود". ³⁹ و واحد من المجرمين اللي كانوا معلقين فوق الصليب بحذاه بدى يسب فيه و يقول: "كان انت هو المسيح منّع روحك و منعنا معاك!". ⁴⁰ رد عليه المجرم لخر و بخسو و قال: "او انت ما تخافش ربي, راك قاعد تتعاقب كيما هو؟ ⁴¹ بالصح احنا العقاب تاعنا عادل, نستاهلوا الشيء اللي يصرالنا, اما هو مادار حتى شر". ⁴² و من بعد قال ليسوع: "اذكرني يا ربي نهار اللي تجي ف الملكوت تاعك". ⁴³ قال لو يسوع: "نقول لك الحق: اليوم راح تكون معايا ف الفردوس". الموت ⁴⁴ و كانت قريب الساعة الستة, و لرض كاملة ظلامت حتى للتسعة. ⁴⁵ ظلامت الشمس, و تقطع لحجاب تاع الهيكل من الوسط. ⁴⁶ و عيط يسوع على طول صوتو و قال: "يا بابا, في يدك نودع روحي". و كي قال هاذا طلع الروح. ⁴⁷ و كي شاف القايد تاع لمياة عسكري واش صرى, مد المجد لله و قال: "صح كان هاذا الراجل صالح!". ⁴⁸ و الناس الكل اللي كانوا حاضرين لهاذا الشيء, كي شافوا واش صرى. رجعوا وهمّا يضربوا ف ارواحهم. ⁴⁹ و كانوا جميع معارفو, و النساء جاو يتبعوا فيه من الجليل, و كانوا واقفين من بعيد و يتفرجوا. الدفينة ⁵⁰ و كان واحد الراجل اسمو يوسف, عضو ف المجلس و كان راجل صالح و يخاف الله. ⁵¹ ما كانش موافق على الراي تاع المجلس و الشيء اللي داروه, و هو من الرامة لمدينة تاع ليهود. و هو ثاني كان يستنى ف الملكوت تاع الله يظهر. ⁵² راح لبيلاطس و طلب منو يعطيه لبدن تاع يسوع باه يدفنو, ⁵³ و هبطو من فوق الصليب, و لفو بالكتان, و اداه حطو ف قبر منحوت ما تدفن فيه حتى واحد من قبل. ⁵⁴ و كان اليوم هو النهار اللي يوجدوا فيه للسبت و كان السبت قريب يجي. ⁵⁵ و تبعوه نساء ياسر جاو معاه من الجليل, و شافوا لقبر و وين دفنو. ⁵⁶ رجعوا و وجدوا الطيب و الحنوط. و ارتاحوا نهار السبت كيما يقول الشرع.