¹ و عرضو واحد الفريسي لدارو نهار السبت باه يتغدى عندو, و كانوا يعسوا فيه واش يدير. ² و كان واحد قاعد قدامو مريض بالاستقساء. ³ قال يسوع للفريسيين و لعلماء الشريعة: "يحل الشفاء نهار السبت؟". ⁴ سكتوا الكل واحد ما رد عليه. ولّى يسوع رتّح الراجل و بعثو روّح. ⁵ و من بعد قال لهم: "شكون منكم اللي يطيحلو لحمار و الا الثور تاعو في بير و ما يجبدوش ليه ليه حتى لو كان نهار سبت؟. ⁶ و ما قدروش يجاوبوه على هاذا لكلام. ⁷ و قال للناس المعروضين هاذا لمثل, و هو يشوف فيهم كيفاه خايروا الاماكن لولى و قال لهم: ⁸ "كي يعرضك واحد للعرس ما تروحش تخاير لمكان لول, بلاك يكون واحد اعلى منك في الشان معروض. ⁹ و من بعد يجيك السيد اللي عرضكم في زوز انت وياه و يقولك: نوض خلي هاذا الراجل يقعد. وقتها تولي حاشم و تروح تقعد في مكان اخر مع لَخّرين. ¹⁰ بالصح كي يعرضك واحد روح و اقعد ف المضرب لخّر, و كي يجي السيد اللي عرضك يقول لك: يا صحايبي روح اطلع لفوق. وقتها يكون شرف ليك قدام المعروضين معاك. ¹¹ على خاطر كل من يعلي روحو يهبط و كل من يهَبط روحو يعلى". ¹² و زاد قال للراجل اللي عرضو: "كي تدير غداء و الا عشاء ما تعرضش صحابك و خاوتك و عايلتك و جيرانك الاغنياء, باه ما يخلفوهاش ويعرضوك همّا ثاني, و يرجعولك لمزية. ¹³ بالصح كي تدير لمّة اعرض: الفقراء, المشوهين, العيّاب, العميان, ¹⁴ هكّا يكون عندك اجر على خاطر هما ماهمش راح يرجعولك باه يكافوك, بالصح تنال الجزاء تاعك نهار القيامة تاع الناس الصالحين". لمثل تاع الزردة لكبيرة ¹⁵ كي سمع واحد من القاعدين هاذا لكلام قال: "يا سعد اللي ياكل خبز في الملكوت تاع الله". ¹⁶ رد عليه يسوع و قال: "واحد الراجل دار زردة كبيرة و عرض الناس ياسر, ¹⁷ و بعث لخديم تاعو وقت لعشاء باه يقول للمعروضين: ارواحوا تتعشاو راه كل شيء واجد. ¹⁸ و بداو الكل يعتذروا. لول قال: اني شريت جنان, و لازم عليا نروح نتفقدو, ماذابيك تعذرني. ¹⁹ و لاخر قال: شريت عشرة بقرات, و انا رايح نشوفها. ماذابيك تعذرني. و واحد اخر قال: ²⁰ انا تزوجت كي غير, ما نقدرش نجي. ²¹ رجع هاذاك لخديم و خبر سيدو بالشيء اللي صرى كامل. وقتها تغشش مولى الدار, و قال للخديم: اخرج فيساع للشوارع و الزنق تاع لمدينة, و لم كل الفقراء و المشوهين و العياب و العميان. ²² راح الخديم و رجع و قال: يا سيدي اللي قلت عليه الكل صار, هكذاك و مازال كاين مكان. ²³ قال السيد للخديم: زيد اخرج للطرق و للساحات وحتّم على الناس اللي تلقاهم يجيو حتى تتعمر داري, ²⁴ على خاطر نقول لكم : واحد من هاذوك الرجال اللي عرضتهم واحد منهم ما يذوق عشايا". الثمن باه تتبع يسوع ²⁵ و كانوا ناس ياسر ماشيين معاه. تلفت لهم و قال: ²⁶ "اذا كان واحد يجيني و ما يبغضش باباه و الا امو و الا مرتو و اولادو و خاوتو و خواتاتو, حتى ذاتو ثاني, ما يقدرش يكون التلميذ تاعي. ²⁷ و اللي ما يهزش الصليب تاعو على كتافو و يمشي ورايا ما يقدرش يكون التلميذ تاعي. ²⁸ شكون فيكم اللي يكون حاب يبني دار ما يقعدش قبل و يحسب قداه لازمو. و يشوف اذا عندو ما يلزم باه يكمل و الا لا؟ ²⁹ مش يصب الساس و من بعد ما يقدرش يكمل, حتى يوليو الناس يضحكوا عليه, ³⁰ و يقولوا: هاذا الراجل بدى و ما قدرش يكمل. ³¹ و اي ملك كي يعود رايح يدير حرب مع ملك واحد اخر, مش يقعد قبل و يتشاور: و يشوف اذا كان يقدر يقابل بعشرة الاف هاذاك اللي جاي عليه بعشرين الف و الا لا؟ ³² و اذا كان هاذاك مُحال يولي يبعث مرسول و يطلب الصلح. ³³ هكا ثاني كل واحد منكم اللي ما يقدرش يخلي كل ما يملك وراه, ما يقدرش يولي التلميذ تاعي. لمثل تاع الملح ³⁴ "الملح مليح. بالصح كي يفسد الملح, وش الحاجة اللي تعدلو؟ ³⁵ يولي لا يصلح لا للرض و لا للمزبلة, غير يتلوح في الطريق. اللي يحب يسمع يسمع".