¹ و كي كان معدي شاف واحد الراجل اعمى من نهار اللي ولد فيه, ² و سقساوه التلامذة و قالوا: "يا معلم, الذنب تاع شكون: تاعو هو و الا تاع والديه حتى خلق اعمى؟". ³ قال لهم يسوع: "لا ذنبو هو ولا ذنب والديه, بالصح باه تظهر فيه اعمال الله. ⁴ لازم ندير لعمال تاع اللي بعثني ما دام الوقت نهار. قبل ما يجي الليل و حتى واحد ما يقدر يعمل. ⁵ و ما دمت ف العالم انا هو النور تاع العالم". ⁶ قال هاذا لكلام و تفل على لرض و دار من هاذاك التفال طين و مسح بيه عينين الراجل لعمى. ⁷ و قال لو: "روح اغسل ف بركة سلوام" اللي لمعنى تاع اسمها: مرسول, و راح الراجل ثمة و غسل و ولى يشوف. ⁸ و الجيران اللي كانوا يشوفوه من قبل اعمى, كي شافوه قالوا: "مش هاذا هو اللي كان يقعد و يطلب صدقة؟". ⁹ و اخرين قالوا: "هاذا هو". و وحايد اخرين قالوا: "لا او واحد يشبهلو". بالصح هو قال لهم: "اني انا هو". ¹⁰ قالوا لو: "و كيفاه تحَلوا عينيك و وليت تشوف؟". ¹¹ رد عليهم و قال: "واحد الراجل اسمو يسوع دار طين و طلاه على عينيا, و قال لي: روح لبركة سلوام و اغسل. و كي رحت غسلت وليت نشوف". ¹² قالوا: "و هو وين؟". قال لهم: "ما نعرف". علماء الشريعة يديروا تحقيق ¹³ و راحوا داو الراجل اللي كان اعمى عند علماء الشريعة. ¹⁴ و كان نهار سبت وقت اللي يسوع دار الطين و حطو على عينين الراجل الاعمى. ¹⁵ و زادوا سقساوه العلماء تاع الشريعة كيفاه حتى ولى يشوف, قال لهم: "حط الطين على عينيا و رحت غسلت, و انا ضرك نشوف". ¹⁶ و جماعة من العلماء تاع الشريعة قالوا: "هاذا الراجل ماهوش مبعوث من عند الله, على خاطر ما يحافظش على الشريعة تاع السبت". و اخرين قالوا: "كيفاه يقدر واحد مذنب يدير عجايب كيما هاذي؟". و صرى بينهم جدال. ¹⁷ و زادوا قالوا للاعمى: "و انت واش تقول عليه مادام فتح ليك عينيك و وليت تشوف؟". قال: "او نبي!". ¹⁸ و ليهود ما صدقوش باللي هاذاك الراجل كان اعمى و ولى يشوف حتى جابوا امو وباباه. ¹⁹ و سقساوهم و قالوا لهم: "هاذا هو ولدكم اللي تقولوا كان اعمى و ضرك ولى يشوف؟". ²⁰ ردوا عليهم و قالوا: "احنا نعرفوا باللي هاذا ولدنا, و نعرفوا باللي ولد اعمى. ²¹ بالصح كيفاه ولى اليوم يشوف ما نعرفوش. و الا شكون فتح عينيه ما نعرفوش. هو كبير ف العمر و يعرف. سقسيوه ضرك يهدر على نفسو". ²² و امو باباه قالوا هاذا لكلام على خاطر كانوا خايفين من ليهود, على خاطر ليهود كانوا متحلفين باللي كل من يستعرف باللي يسوع هو المسيح يخرجوه من المجمع. ²³ على هاذيك باباه و امو قالوا: "او كبير ف لعمر, سقسيوه". ²⁴ و زادوا عيطوا مرة اخرى على الراجل اللي كان اعمى, و قالوا لو: "احلف بالله. احنا عارفين باللي هاذا الراجل مذنب". ²⁵ رد عليهم و قال: "هو مذنب و الا لا؟ هاذي ما علاباليش. علابالي بحاجة واحدة برك: باللي كنت اعمى و ضرك وليت نشوف". ²⁶ زادوا قالوا: "واش دار لك؟ كيفاه فتحلك عينيك؟". ²⁷ رد عليهم و قال: "انا قلت لكم و ما حبيتوش تسمعوا. علاه تحبوا نزيد نقول لكم؟ بلاك انتم ثاني تحبوا توليو من التلامذة تاعو؟". ²⁸ سبوه وقالوا: "انت هو التلميذ تاع هاذاك, اما احنا التلامذة تاع موسى. ²⁹ احنا نعرفوا باللي موسى كلمو الله, اما هاذا ما علابالناش منين جا". ³⁰ جاوب الراجل و قال لهم: "شوفوا لعجب! ما تعرفوش منين جا, و هو فتح لي عينياّ. ³¹ و نعرفوا باللي الله ما يسمعش دعوة المذنبين. بالصح الله يسمع لواحد يتقيه و يعمل رضايتو. ³² عمرها ما صرات واحد فتح عينين واحد اعمى من نهار اللي ولد. ³³ لو كان ما جاش من عند الله ما كانش يقدر يعمل حتى شيء". ³⁴ ردوا عليه و قالوا: "انت بكلك تولدت ف الذنوب, و جاي تعلّم فينا!". و خرجوه لبرى. لعمى الروحي ³⁵ و كي سمع يسوع باللي سحتوه و خرجوه, كي لقاه قالو: "تامن بابن الله؟". ³⁶ رد عليه و قال: "شكون هو يا سيدي باه نامن بيه؟". ³⁷ قالو يسوع: "اك تشوف فيه, اللي قاعد يهدر معاك هاذاك هو!". ³⁸ رد عليه وقال: "نامن يا سيدي!". و سجد ليه. ³⁹ قال يسوع: "جيت باه يتحاسب هاذا العالم, باه يشوفوا العميان و يعماو اللي يشوفوا". ⁴⁰ و سمعوا هاذا لكلام علماء الشريعة اللي كانوا معاه, و قالوا لو: "بلاك احنا ثاني عميان؟". ⁴¹ قال لهم يسوع: "لو كان جيتوا عميان ما كان عليكم حتى ذنب. بالصح انتم تقولوا احنا نشوفوا, مالا الذنب تاعكم باقي كيما راه.