¹ و راح يسوع لجبل الزيتون. و ف الصبح زاد جا للهيكل, ² و جاو ليه ناس ياسر قعد و بدى يعلم فيهم. ³ و جابوا ليه الكتبة و العلماء تاع الشريعة مرى حكموها تزني. و وقفوها ف الوسط ⁴ و قالوا: "يا معلم, هاذي لمرى تحكمت و هي تزني, ⁵ و موسى ف الشريعة وصانا باللي وحدة كيما هاذي لازم تترجم بالحجار. وانت واش تقول؟". ⁶ قالوا هاذا لكلام باه يجربوه, و باه يحكموا عليه حاجة يتهموه بيها. اما يسوع طابس راسو لتحت و بدى يكتب بصبعو على لرض. ⁷ و كي كثروا عليه, وقف على طولو وقال لهم: "شكون منكم اللي ما دار حتى غلطة يهز حجرة و يرجمها هو لول!". ⁸ و زاد طابس و بدى يكتب على لرض. ⁹ اما همّا كي سمعوا واش قال تبخسوا و رجعوا على ارواحهم, و خرجوا واحد ورى واحد, بداو من الشيوخة حتى للخرين الكل. و بقى يسوع وحدو هو و لمرى واقفة ف الوسط. ¹⁰ وقف على طولو و شاف كي ما لقى حتى واحد غير لمرى وحدها, قال لها: "يا مرى, وين راحوا الناس اللي كانوا يتهموا فيك؟ واحد ما حكم عليك؟". ¹¹ قالت: "لا يا سيدي, حتى واحد!". قال لها يسوع: "حتى انا ما نحكمش عليك. روحي و ما تزيديش تغلطي". انا هو النور تاع العالم ¹² و زاد كلمهم يسوع ثاني و قال: "انا هو النور تاع العالم. اللي يتبعني ما يمشيش ف الظلمة راح يكون ليه نور لحياة". ¹³ قالوا لو العلماء تاع الشريعة: "راك تشهد لذاتك. الشهادة تاعك باطلة". ¹⁴ رد عليهم يسوع و قال: "حتى لو كان نشهد لذاتي الشهادة تاعي شهادة حق. على خاطر نعرف منين جيت و نعرف وين راح نروح. اما انتم لا تعرفوا لا منين جيت و لا وين راح نروح. ¹⁵ انتم تحكموا على حساب لبدن, اما انا ما نحاسب حتى واحد. ¹⁶ و حتى اذا كنت نحاسب يكون الحكم تاعي حق, على خاطر مانيش وحدي, انا مع الاب اللي بعثني. ¹⁷ و زيد ف الشريعة تاعكم مكتوب تثبت الشهادة بزوز شهود تاع حق: ¹⁸ انا هو الشاهد لذاتي, و الاب اللي بعثني شاهد ليّا". ¹⁹ قالوا: "وين هو باباك؟". رد عليهم يسوع وقال: "انتم لا تعرفوني لا انا لا بابا. لو كان عرفتوني انا تكونوا عرفتوا بابا ثاني". ²⁰ هاذا لكلام قالو يسوع قدام الصندوق تاع التبرعات و هو يعلّم ف الهيكل. و واحد ما حكمو على خاطر مازالت ساعتو ما حضرتش. ²¹ و زاد قال لهم يسوع: "انا رايح و انتم راح تطلبوني, و راح تموتوا ف المعصية تاعكم. المضرب اللي راح نروحلو ما تقدروش انتم تجيو ليه". ²² قالوا ليهود: "بلاك راح يقتل روحو حتى يقول: المضرب اللي راح نروح لو ما تقدروش انتم تجيو ليه؟". ²³ قال لهم: "انتم من لتحت, اما انا من لفوق, انتم من هاذي الدنيا, اما انا مانيش من هاذي الدنيا. ²⁴ قلت لكم: راح تموتوا بذنوبكم, على خاطر لو كان ما تامنوش اني انا هو راح تموتوا بذنوبكم". ²⁵ قالوا لو: "شكون انت؟". قال لهم يسوع: "كيما قلت لكم من لول. ²⁶ عندي حوايج ياسر نهدر بيها و نحكم بيها من جيهتكم, بالصح اللي بعثني هو حق. و انا نقول الشيء اللي سمعتو من عندو, هو اللي نقولو للعالم". ²⁷ و ما فهموش باللي كان يهدر لهم على الاب. ²⁸ قال لهم يسوع: "نهار اللي تعلقوا ابن الانسان, وقتها تعرفوا باللي اني انا هو, و ما ندير حتى حاجة من عندي, نهدر برك كيما علمني بابا. ²⁹ و اللي بعثني هو واقف معايا, و ما يخلينيش الاب وحدي, على خاطر دايما نعمل غير رضايتو". اولاد براهيم ³⁰ و كي كان يهدر ف هاذا لكلام امنوا بيه ناس ياسر. ³¹ قال يسوع لليهود اللي امنوا بيه: "اذا كان بقيتوا ثابتين ف كلامي تكونوا التلامذة تاعي صح, ³² و تعرفوا الحق, و الحق هو اللي يجعلكم احرار". ³³ ردوا عليه و قالوا: "احنا ولاد براهيم, عمرنا ما كنا عبيد لحتى واحد! كيفاه تقول: نوَليوْ احرار؟". ³⁴ رد عليهم يسوع وقال لهم: كل من يعمل المعصية يكون عبد للمعصية. ³⁵ و العبد ما يبقاش ف البيت دايما. بالصح الابن هو اللي بيقى دايما. ³⁶ اذا كان الابن هو اللي يعطيكم الحرية تكونوا احرار تاع الصح. ³⁷ انا علابالي بيكم باللي انتم ولاد ابراهيم. بالصح حابين تقتلوني على خاطر كلامي ما عندو حتى محل فيكم. ³⁸ انا نهدر بالشيء اللي شفتو عند بابا, و انتم تعرفوا الشيء اللي سمعتوه من عند باباكم". ³⁹ ردوا عليه و قالوا: "بابانا هو ابراهيم". قال لهم يسوع: "لو كان جيتوا صح اولاد ابراهيم, كنتوا تعملوا اعمال ابراهيم! ⁴⁰ بالصح انتم حابين تقتلوني, و انا انسان هدرت معاكم غير بالحق اللي سمعتو من عند الله. و هاذا الشيء ما داروش ابراهيم. ⁴¹ انتم تعملوا ف عمايل باباكم". قالوا: "احنا ما راناش اولاد زنى. عندنا اب واحد و هو الله". اولاد ابليس ⁴² قال لهم يسوع: "لو كان جا الله باباكم كنتوا تحبوني, على خاطر خرجت من عند الله و جيت. ما جبتش من ذاتي, بالصح هو اللي بعثني. ⁴³ علاه ما تفهموش كلامي؟ على خاطر ما تقدروش تسمعوا كلامي. ⁴⁴ انتم من اب هو ابليس, و تحبوا تديروا غير واش يحب باباكم. هاذاك اللي كان من لول قتال للناس, و ما ثبتش ف الحق على خاطر ما يتسعاش فيه الحق. و كي يهدر يقول غير لكذب و الكذب ف طبعو, على خاطرو كذّاب و بو الكذّاب. ⁴⁵ اما انا كي عدت نقول لكم ف الحق ما تامنوش بيّا. ⁴⁶ شكون منكم اللي حكم عليّا غلطة؟ كي عدت نقول ف الحق علاه ما تامنوش بيّا؟ ⁴⁷ اللي من عند الله يسمع كلام الله. بالصح انتم ما تسمعوش, على خاطر انتم ماكمش من عند الله". يسوع و ابراهيم ⁴⁸ ردوا عليه ليهود و قالوا: "مش عندنا الحق كي نقولوا عليك: انت سامري و ساكنك شيطان؟". ⁴⁹ رد عليهم يسوع و قال: "ما نيش مسكون بالشيطان, بالصح انا نقدر ف بابا و اما انتم راكم تهينوا فيّا. ⁵⁰ انا مانيش طالب الجاه ليّا. كاين شكون يطلب و يحاسب. ⁵¹ نقول لكم الحق الحق: اذا كان واحد يعمل بكلامي ما يشوفش الموت ابدا". ⁵² قالوا ليهود: "ضرك تأكدنا باللي فيك شيطان. مات ابراهيم و ماتوا الانبياء الكل, و انت تقول: اللي يعمل بكلامي ما يذوقش الموت ابدا. ⁵³ راح تجي انت اعظم من بابانا ابراهيم اللي مات؟ و الا خير من الانبياء اللي ماتوا. واش حاسب روحك؟". ⁵⁴ رد عليهم يسوع: "لو كان جيت نمجد في روحي المجد تاعي ما يكون عندو حتى معنى. بالصح بابا هو اللي يمجدني, اللي انتم تقولوا عليه باللي هو الاله تاعكم, ⁵⁵ و انتم ما تعرفوهش. اما انا نعرفو. و اذا قلت باللي مانعرفوش نكون كذّاب كيما انتم, انا نعرفو و نعمل واش يقول. ⁵⁶ باباكم ابراهيم كان متشوق باه يشوف نهاري هاذا و شاف و فرح". ⁵⁷ ردوا عليه ليهود و قالوا: "ما زال ما عندكش حتى خمسين سنة ف عمرك, و تقول شفت ابراهيم؟". ⁵⁸ قال لهم يسوع: "نقول لكم الحق الحق: انا كاين من قبل ما يكون ابراهيم". ⁵⁹ وقتها هزوا لحجار باه يرجموه. اما يسوع تخبى منهم و خرج من الهيكل و عدى ف وسطهم و راح هكّا.