¹ "نقول لكم الحق الحق: اللي ما يدخلش للخرفان من الباب تاع لمراح, و يطلع من جيهة اخرى, هاذاك سارق و لص. ² اما اللي يدخل من الباب هاذاك هو الراعي تاع الخرفان. ³ على هاذا يحل عليه العساس, و الخرفان تسمع صوتو, و ينادي على الخرفان تاعو بالاسامي تاعها و يخّرجها. ⁴ و كي يخّرج الخرفان تاعو يمشي هو قدامها, و الخرفان تتبع فيه, على خاطر تعرف صوتو. ⁵ اما كي يكون واحد غريب ما تمشيش وراه و تهرب منو, على خاطر ما تعرفش صوت البرانية". ⁶ قال لهم يسوع هاذا لمثل بالصح هما ما فهموش واش كان يقصد بكلامو. ⁷ و زاد قال لهم يسوع ثاني: "نقول لكم الحق الحق: انا هو الباب تاع الخرفان. ⁸ كل اللي جاو قبلي سرّاق و لصوص, بالصح الخرفان ما حبوش يسمعولهم. ⁹ انا هو الباب. اللي يدخل مني يمنع و يدخل و يخرج و يلقى مرعى. ¹⁰ السارق يجي غير باه يسرق و يذبح و يقتل, اما انا جيت باه تكون لهم حياة و باه تكون لهم لحياة لمخيرة. ¹¹ انا هو الراعي الصالح, و الراعي الصالح هو اللي يضحي بحياتو على جال الخرفان. ¹² اما الخدّام اللي يخدم بالاجر, و مش كيما الراعي, الخرفان خاطياتو, هاذاك كي يشوف الذيب جاي يخلي الخرفان وحدها و يهرب, يخطفهم الذيب و يفرقهم. ¹³ الخدّام بالاجر يهرب على خاطر يهموا الاجر, بالصح ما تهموش الخرفان. ¹⁴ بالصح انا هو الراعي الصالح, نعرف الخرفان تاعي و الخرفان تاعي تعرفني, ¹⁵ كيما الاب يعرفني و انا نعرف الاب. و انا نضحي بحياتي على جال الخرفان. ¹⁶ و عندي خرفان اخرين ماهيش ف لمراح هاذا, هي ثاني لازم نجيبها و تسمع صوتي, باه تكون رعية واحدة و راعي واحد. ¹⁷ على هاذا الاب يحبني, على خاطر نضحي بحياتي باه نزيد نرجعها. ¹⁸ واحد ما ينحيلي حياتي مني, انا نضحي بيها برضايتي. عندي القدرة نحطها و عندي ثاني القدرة نرجعها. هاذي الوصية ديتها من عند بابا". ¹⁹ و تخالفوا ليهود مع بعضاهم على جال هاذا لكلام. ²⁰ و ياسر منهم قالوا: "هاذا الراجل ساكنوا شيطان و راه يخرف, علاه تسمعوا ف كلامو؟". ²¹ و اخرين قالوا: "هاذا لكلام مش تاع واحد ساكنو شيطان. علاه الشيطان يقدر يفتح عينين العميان؟". ليهود ما يامنوش ²² و كي جا عيد التجديد ف اورشليم, و كان وقتها شتاء. ²³ و كان يسوع يمشي ف الهيكل ف رواق سليمان, ²⁴ تلموا عليه ليهود و قالوا لو: "حتى لوقتاع تخلينا معلقين؟ اذا كنت انت هو المسيح قول لنا جهار". ²⁵ رد عليهم يسوع و قال: "انا قلت لكم بالصح انتم ما تامنوش. و لحاجات اللي انا نديرها باسم بابا هي تشهد لي. ²⁶ بالصح انتم ما تامنوش على خاطر انتم خاطيين الخرفان تاعي, كيما قلت لكم. ²⁷ الخرفان تاعي تسمع صوتي, و انا نعرفها و هي تتبعني. ²⁸ و انا نمد لها لحياة الدايمة, و ما تموتش ابدا, و واحد ما يخطفها من يدي. ²⁹ بابا اللي وهبها لي هو اعظم من كل موجود, و واحد ما يقدر يخطفها من يد بابا. ³⁰ انا والاب واحد". ³¹ و زادوا هزوا ليهود مرة اخرى لحجار و حبوا يرجموه. ³² قال لهم يسوع: "وريت لكم ياسر من الاعمال الصالحة من عند بابا. واش من حاجة منهم اللي على جالها ترجموني؟". ³³ ردوا عليه ليهود و قالوا: "ما نرجموك على حتى حاجة تاع صلاح درتها, بالصح نرجموك على جال الكفر تاعك, انت بشر و تجعل ف روحك اله". ³⁴ قال لهم يسوع: "ياخي مكتوب في الشريعة تاعكم: انا قلت باللي راكم الهة؟ ³⁵ اذا كان قال الهة على هاذوك اللي تكلموا بالوحي تاع الله, و الشريعة واحد ما يقدر يحَرفها, ³⁶ كيفاه مالا تقولوا لي, انا اللي قدسني الاب و بعثني للعالم,: انت تكفر, على خاطر قلت: انا ابن الله؟ ³⁷ لو كان ما جيتش نعمل ف اعمال بابا ما تامنوش بيّا. ³⁸ بالصح انا نعمل ف اعمال بابا, اذا ما امنتوش بيّا انا امنوا بهاذي الاعمال, باه تعرفوا و تامنوا باللي الاب فيّا و انا فيه". ³⁹ و زادوا حبوا يحكموه بالصح هو خرج من وسطهم. ⁴⁰ و زاد راح للجيهة لخرى تاع الاردن المضرب اللي كان يوحنا يعمد فيه قبل و قعد لثمة. ⁴¹ و جاو ليه ناس ياسر و قالوا: "يوحنا ما دار حتى معجزة, بالصح الشيء كامل اللي قالو على هادا الراجل صحيح". ⁴² و امنوا بيه ناس ياسر لثمة.