1 و كان واحد الراجل مريض اسمو لعازر, من بيت عنيا من القرية اللي تسكن فيها مريم و اختها مرثا. 2 و لعازر اللي كان مريض هو خو مريم, اللي صبت الطيب على يسوع و دهنتلو رجليه بشعرها. 3 و بعثوا لخواتات ف زوز ليسوع يقولوا: "يا سيدي, اللي تحبو راه مريض". 4 و كي سمع يسوع قال: هاذا لمرض ماهوش للموت, بالصح باه يتمجد بيه الله, و يتمجد بيه ابن الانسان". 5 و كان يسوع يحب مرثا و اختها و لعازر. 6 و كي سمع باللي راه مريض زاد قعد ف المضرب اللي كان فيه نهارين اخرين. 7 و من بعد قال للتلامذة تاعو: "هيا نزيدوا نروحوا لليهودية". 8 قالوا التلامذة: "يا معلم, كي غير كانوا اليهود حابين يرجموك, و تزيد تروح لثمة". 9 رد عليهم يسوع و قال: "ياخي النهار فيه ثناش ن ساعة؟ و كي واحد يمشي ف الضوء تاع النهار ما يتدعثرش على خاطر يشوف ف الضوء تاع هاذا العالم, 10 بالصح هاذاك اللي يمشي ف الليل هو اللي يتدعثر,على خاطر ما فيهش الضوء". 11 قال هاذا, و من بعد زاد قال لهم: "لعازر حبيبنا رقد. بالصح انا رايح باه ننوضو". 12 قالوا التلامذة: "يا سيدي, اذا كان راقد ضرك يرتاح مالا". 13 و كان يسوع يهدر على النوم تاع الموت, بالصح همّا حسبوه يهدر على النوم تاع الرقاد. 14 وقتها قال يسوع جهار: لعازر مات. 15 و انا نفرح على جالكم على خاطر ما كنتش لثمة, باه تامنوا. هيا نروحوا!". 16 و قال توما اللي يقولولو التومي للتلامذة خاوتو: "هيا نروحوا احنا ثاني معاه و نموتوا معاه!". انا هو لقيامة و لحياة 17 و كي وصل يسوع لقى باللي عندو ربعة ايام من اللي تدفن. 18 و كانت بيت عنيا قريبة لاورشليم بزوز اميال. 19 و كانوا يهود ياسر جاو لمرثا و مريم باه يعزيوهم ف خوهم. 20 و كي سمعت مرثا باللي يسوع جا راحت عرضتلو, اما مريم قعدت ف الدار. 21 و قالت مرثا ليسوع: "يا سيدي, لو كان جيت هنا راه ما ماتش خويا! 22 بالصح حتى ضرك على بالي مهما واش تطلب من عند الله يعطيك". 23 قال لها يسوع: "خوك راح يقوم". 24 ردت عليه مرثا و قالت: "نعرف باللي راح يقوم نهار لقيامة نهار لاخرة". 25 قال لها يسوع: "انا هو لقيامة و لحياة. اللي يامن بيّا حتى لو كان يموت راح يحيا, 26 و كل من كان حي و امن بيّا ما يموتش ابدا. تامني بهاذا الشيء؟". 27 قالت: "نعم يا سيدي, انا امنت انك انت هو المسيح ابن الله, اللي جا للعالم". لعازر يقوم من بين الموتى 28 و كي قالت هاذا لكلام راحت و عيطت على اختها مريم بالدرقة, و قالت لها: "المعلم او جا, و راه يعيطلك". 29 و هي كي سمعت وقفت تجري و راحت ليه. 30 و مازال يسوع ما دخلش للقرية, بقى قاعد ف المضرب اللي لاقاتو فية مرثا. 31 و هاذوك الناس اليهود اللي جاو باه يعزوا فيهم, كي شافوا مريم وقفت و خرجت تجري, تبعوها و قالوا: "اي رايحة للقبر تبكي على خوها". 32 و كي وصلت مريم عند يسوع و شافاتو, رمات روحها عند رجليه و قالت: "يا سيدي, لو كان جيت هنا راه خويا ما ماتش!". 33 و كي شافها يسوع تبكي, و الناس اللي معاها يبكيو, توجَع و غاضو الحال, 34 و قال: "وين دفنتوه؟". قالوا: "يا سيدي, ارواح تشوف". 35 و بكى يسوع. 36 قالوا ليهود: "شوفوا قداه كان يحبو!". 37 و جماعة منهم قالوا: "هاذا اللي فتح عينين العميان زعمى ما كانش قادر يرد الموت على لعازر؟". 38 وزاد حزن يسوع ثاني مرة اخرى و جا للقبر, و هو مغارة و يقفلوها بحجرة كبيرة. 39 و قال يسوع: "هزوا الحجرة!". قالت لو مرثا اخت الميت: "يا سيدي, او عندو ربعة ايام من اللي مات راه نتان". 40 قال لها يسوع: "ياخي قلت لك: كان امنتي تشوفي المجد تاع الله؟". 41 و هزوا الحجرة وين كان محطوط الميت, و هز يسوع عينيه للسماء وقال: "نشكرك يا ابي, على خاطر سمعت لي, 42 و انا عارف باللي تسمعني دايما. بالصح على جال الناس اللي واقفين هنا قلت هاذا لكلام, باه يامنوا باللي انت هو اللي بعثتني". 43 و كي قال هاذا لكلام عيط بصوت عالي و قال: "لعازر, ارواح لبرى!". 44 و خرج لهم الميت و يديه و رجليه مربوطين بالقماش, و وجهو مغطي بالمنديل تاع لكفن. قال لهم يسوع: "حلوه خلوه يروح". ليهود يتفاهموا باه يقتلوا يسوع 45 و جماعة كبيرة من ليهود اللي جاو لمريم, و شافوا بعينيهم واش دار يسوع, و امنوا بيه. 46 و كاين منهم جماعة اللي راحوا للعلماء تاع الشريعة و قالوا لهم واش دار يسوع. 47 و داروا الرياس تاع الكهنة و العلماء تاع الشريعة اجتماع و قالوا: "واش نديروا؟ هاذا الراجل يدير معجزات ياسر. 48 لو كان نخليوه ضرك الناس الكل يامنوا بيه, و يجيو الرومان يرَيْبوا الهيكل و يفنيو الامة تاعنا". 49 قال واحد منهم, و هو قيافا, اللي كان رايس الكهنة ف هاذاك العام: "انتم ما تعرفوش واحدة الحاجة, 50 و ما تفهموش بالي خير لينا يموت راجل واحد من الشعب و ما تفناش الامة كاملة!". 51 و هو ما قالش هاذا الكلام من راسو, بالصح على خاطر حكم المنصب تاع رايس الكهنة ف هاذاك العام, تنبأ باللي يسوع راح يموت و يفدي الامة, 52 مش غير الامة برك بالصح ثاني باه يلم الشمل تاع ابناء الله المتفرقين و يجعلهم شعب واحد. 53 و من هاذاك اليوم تشاوروا باه يقتلوه. 54 و حتى يسوع ما كانش يمشي جهار بين ليهود, و راح من ثمة للجوايه لقريبة للصحراء, لواحد لمدينة اسمها افرايم, و قعد هو و التلامذة تاعو لثمة. 55 و كي قرّب عيد الفصح تاع ليهود. طلعوا ناس ياسر من اهل القرى لاورشليم قبل الفصح باه يطهروا ارواحهم. 56 و كانوا يفركتوا على يسوع و يقولوا بيناتهم, و همّا واقفين ف وسط الهيكل: "واش رايكم زعمى؟ يجي للعيد و الا لا؟". 57 و حتى رياس الكهنة و العلماء تاع الشريعة حطوا امر باللي كل من يعرف وين هو يخبر عليه, باه يحكموه.