¹ و يسوع قبل عيد الفصح, و هو عالم باللي ساعتو حضرت باه يترفع من هاذا العالم و يروح عند الاب, و على خاطر حب اتباعو اللي ف هاذا العالم, حبهم ع لخر. ² و قعد باه يتعشى مع التلامذة تاعو, و كان الشيطان حط ف قلب يهوذا سمعان الاسخريوطي باه يروح يسلمو لليهود, ³ و يسوع و هو عالم باللي الاب دفع كل شيء بين يديه, و باللي راه خرج من عند الله, و عند الله يرجع, ⁴ وقف على لعشاء, و نحى البرنوس تاعو, و هز منشفة حطها ف نصو, ⁵ و من بعد صب الماء ف القصعة, و بدى يغسل ف رجلين التلامذة و يمسح فيها بالمنشفة اللي كانت ف نصو. ⁶ و كي وصل لسمعان بطرس. قالو: "يا سيد, كيفاه انت تغسل لي رجليّا!". ⁷ رد عليه يسوع و قالو: "انت ما تعرفش واش قاعد ندير ضرك, بالصح من بعد تفهم". ⁸ قالو بطرس: "لا ما تغسلش رجليّا ابدا!". رد عليه يسوع و قال: "لو كان ما نغسل رجليك ما يكون ليك معايا حتى نصيب". ⁹ قالو سمعان بطرس: "ياسيدي, مالا ما تغسلش رجليّا برك زيد اغسل حتى يديّا و راسي". ¹⁰ قالو يسوع: "اللي غسل ما يحتاج غير يغسل رجليه برك, على خاطر هو بكلو طاهر. و انتم طاهرين بالصح مش كلكم". ¹¹ على خاطر كان عارف شكون راح يبيعو, على هاذا قال: "ما كمش الكل طاهرين". ¹² و بعد ما غسل لهم رجليهم لبس لبرنوس و قعد هو ثاني, و قال لهم: "فهمتوا الشيء اللي عملت لكم؟ ¹³ انتم تقولولي معلم و سيد, و هاذي حاجة مليحة, على خاطر انا معلم و سيد. ¹⁴ و اذا كنت انا المعلم و السيد و غسلت لكم رجليكم, مالا انتم ثاني لازم تغسلوا رجلين بعضاكم, ¹⁵ انا اعطيت لكم مثال, باه كيما درت انا تديروا انتم ثاني. ¹⁶ نقول لكم الحق الحق: ما كانش عبد اعظم من سيدو, و لا رسول اعظم من اللي بعثو. ¹⁷ و ضرك كي عرفتوا هاذي الحقيقة يا سعدكم كي تعملوا بيها. يسوع يخبر التلامذة بالخيانة تاع يهوذا ¹⁸ "ما نقولش هاذا لكلام عليكم الكل. انا نعرف اللي خايرتهم. باه يتم المكتوب: اللي ياكل معايا الملح دار عليّا. ¹⁹ نخبركم اليوم بالامر قبل ما يصير, باه نهار اللي يصرى تامنوا باللي انا هو. ²⁰ نقول لكم الحق الحق: اللي يقبل الناس اللي نبعثهم يقبلني انا, و اللي يقبلني انا يقبل اللي بعثني". ²¹ و كي قال يسوع هاذا لكلام ضاقت نفسو, و قال لهم جهار: كاين واحد منكم راح يبيّع بيّا!". ²² و بقاو التلامذة يخزروا ف بعضاهم و همّا محيرين على من كان يهدر. ²³ و كان واحد من لتلامذة قاعد و يسوع محضنو, كان يسوع يحبو. ²⁴ دارلو سمعان بطرس اشارة براسو باه يسقسيه على شكون يهدر. ²⁵ و اتكى هاذاك التلميذ على صدر يسوع و قال لو: "يا سيدي, شكون هو؟". ²⁶ رد يسوع وقال: "هاذاك اللي نغمس اللقمة و نمدلو!". و غمّس اللقمة و اعطاها ليهوذا سمعان الاسخريوطي. ²⁷ و كي كلاها دخل فيه الشيطان. و قالو يسوع: "روح ازرب دير واش راح تدير ما تبطاش". ²⁸ و ما كان حتى واحد من القاعدين فهم لهدرة اللي قالها لو, ²⁹ و على خاطر كان الصندوق عند يهوذا, كاين جماعة اللي حسبوا يسوع بعثو و قالو: اشري واش نحتاجو للعيد, و الا وصاه يمد صدقة للفقراء. لوصية الجديدة ³⁰ و هاذاك بعدما كلى اللقمة خرج ثم ثم. و كانت الدنيا ليل. ³¹ و كي خرج قال يسوع: "ضرك تمجد ابن الانسان و تمجد الله فيه. ³² و اذا كان الله تمجد فيه, يعني الله راح يمجدو ف ذاتو, و يمجدو بعد شوية. ³³ يا ولادي, انا راح نبقى معاكم زمان قليل. راح تفركتوا عليا, و كيما قلت لليهود نزيد نقول لكم انتم: وين رايح ما تقدروش انتم تروحوا ضرك. ³⁴ انا نعطيكم وصية جديدة: تحبوا بعضاكم. كيما حبيتكم انا تحبوا انتم ثاني بعضاكم. ³⁵ بهاذا يعرفوا الناس الكل باللي انتم التلامذة تاعي: اذا كان عندكم محبة لبعضاكم". يسوع يقول باللي بطرس راح ينكروا ³⁶ قالو سمعان بطرس: "يا سيدي وين رايح؟". رد عليه يسوع و قال: "المضرب اللي راح نروحلو ما تقدرش تتبعني ليه ضرك, بالصح يجي نهار و تتبعني". ³⁷ قال لو بطرس: "يا سيدي علاه ما نقدرش نروح معاك ضرك؟ انا نضحي بحياتي على جالك!". ³⁸ رد عليه يسوع وقال: "تضحي بروحك على جالي؟ نقول لك الحق الحق: قبل ما يعوعش السردوك تنكرني ثلاثة مرات.