¹ شاول يتوب و حياتو تتبدل . اما شاول ما زال مليان بالتهديد و القتيلة على تلامذة الرب، راح عند كبير الكهنة ² و طلب منو يمد لو براوات ل دمشق ، لليهود اللي لثم ، حتى كان لقى ناس من الطريق ، رجال و الا نساء ، يسوقهم مكتفين لاورشليم . ³ وهو رايح و كي قرب يدخل لمدينة دمشق برق عليه من السماء على غرادة من السماء نور قاوي, ⁴ طاح في لرض و سمع صوت يقولو :"يا شاول , يا شاول وعلاه راك تضطهد فيا ؟". ⁵ قالو: " يا سيدي شكون انت ؟ " قالو الرب :"أنا راني يسوع اللي انت راك تضطهد فيه . صعيب عليك ترحي النوى ". ⁶ قالو وهو مرعوب وحاير :" يا ربي واش تحبني ندير ؟" قال لو الرب :" نوض و ادخل للمدينة ضرك يقوللك واش لازم تدير ". ⁷ اما الرجال اللي كانوا مسافرين معاه وقفوا ساكتين , يسمعوا في الصوت بالصح ما شافواحتى واحد . ⁸ وقف شاول من لرض , و كانوا عينيه محلولين بالصح ما كان يشوف في حتى واحد . قادوه من يديه و دخلوه لدمشق . ⁹ و كان مدة ثلاثة ايام ما يشوفش , و ما كلا وما شرب . ¹⁰ و كان في دمشق واحد من التلامذة اسمو حنانيا , و قالو الرب في المنام :" يا حنانيا " قال :" نعم يا رب " . ¹¹ قالو الرب :" نوض و روح للزنقة اللي يقوللها المستقيم , روح لبيت يهوذا و عيط على واحد الراجل من طرسوس اسمو شاول . على خاطر كي كان يصلي , ¹² و شاف في المنام راجل اسمو حنانيا دخل وحط عليه يديه باه يولي يشوف ". ¹³ جاوب حنانيا :" يا ربي انا سمعت من عند ناس ياسر على هذا الراجل , و قداه من شر عمل في القديسين تاعك في اورشليم . ¹⁴ و زيد لهنا عندو الاذن من عند كبار الكهنة باه يقبض على جميع اللي يدعيو باسمك ". ¹⁵ قالو الرب:"روح ! على خاطر هاذاك ليا ماعون مخير باه يهز اسمي قدام شعوب وسلاطين و بني اسرائيل . ¹⁶ على خاطر راح نوريه قداه لازم يتعذب على جال اسمي ". ¹⁷ مشالو حنانيا و دخل للدار و حط عليه يديه و قال :" يا خويا شاول , انا بعثني الرب يسوع اللي ظهرلك في الطريق اللي جيت منو , باه تولي تشوف و تتملى من الروح القدس ". ¹⁸ و لثم بعد طاح من عينيه واحد الشيء كي لقشور , و في دقيقتها ولى يشوف , و ناض و تعمد . ¹⁹ و جابولو ماكلة تقوى بيها . و قعد شاول مع التلامذة اللي في دمشق أيامات . شاول ف اورشليم ²⁰ و ثم ثم بدا يبشر في المجامع بالمسيح :" بلي هذا هو ابن الله ". ²¹ وجميع اللي كانوا يسمعوه حاروا و قالوا :" ماشي هذا هو اللي قضى في اورشليم على اللي يدعيو بهذا الاسم ؟و جاء لهنا باه يسوقهم مكتفين قدام كبار الكهنة !". ²² بالصح شاول كان يزيد يتقوى , و يحير في ليهود اللي ساكنين ف دمشق و يأكد لهم " بلي هذا هو المسيح ". ²³ و بعد ما عدات ايامات ياسر تشاوروا عليه ليهود و تفاهموا باه يقتلوه , ²⁴ و عرف شاول بالحيلة تاعهم . و كانوا يعسوا حتى في البيبان نهار وليل باه يقتلوه . ²⁵ شوية داوه التلامذة ونزلوه في قفة من فوق السور تاع المدينة . ²⁶ و كي جاء شاول لاورشليم حب يبقى مع التلامذة , و كلهم كانوا يخافوا منو ما همش مصدقين بلي راه حتى هو ولى تلميذ . ²⁷ ولى داه برنابا و جابو للرسل , و حكالهم كيفاه شاف الرب في الطريق و بلي راه تكلم معاه , و كيفاه تكلم جهار باسم يسوع ف دمشق . ²⁸ و بقى معاهم يدخل ويخرج في اورشليم و يجاهر باسم الرب يسوع . ²⁹ و كان يتكلم و يتناقش مع اليونانيين , حتى حبوا يقتلوه . ³⁰ و كي سمعوا الخاوة هبطوه ل قيصرية و من لثم بعثوه ل طرسوس . ³¹ و بالصح الكنيسية في كل اليهودية و الجليل كانت متهنية , و كانت تتبنى و تمشي في مخافة ربي , و ب موعينة الروح القدس كانت تكثر و تزيد. ³² و صرى كي كان بطرس يتفقد في كل الخاوة , راح حتى للقديسين اللي ساكنين ف لدة , ³³ و لقى لثمة واحد الشخص اسمو اينياس حاكم لفراش هاذي مدة ثمانية سنين, و كان مشلول . ³⁴ قالو بطرس :" يا اينياس , يسوع المسيح يشفيك . قوم وقد فراشك بيديك " ثم ثم وقف . ³⁵ و شافوه كل الساكنين في لدة و سارون , اللي رجعوا للرب . ³⁶ وكان ف يافا واحدة من التلامذة اسمها طابيثا , اللي معناهاغزالة . هاذي كانت فايضة بفعل الصلاح و الحسنات اللي كانت تديرها . ³⁷ و صرى ف هاذيك ليامات انها مرضت وتوفات , غسلوها و حطوها ف بيت في السطح . ³⁸ و على خاطر مدينة لدة قريبة من مدينة يافا , التلامذة سمعوا بلي بطرس راه لثمة ف لدة , بعثولو زوز رجال يطلبوا منو باه يعدي عليهم و ما يبطاش . ³⁹ وقف بطرس و جاء معاهم . و كي وصل طلعوه للبيت اللي في السطح , و جاو عندو كل الارامل يبكيو و يورولو حوايج و قشات من اللي كانت غزالة تخيطهم كي كانت معاهم . ⁴⁰ و خرجهم بطرس كلهم ل برى , و سجد على ركايبو و صلى , و بعد تلفت للجثة و قال :" يا طابيثا , نوضي !" فتحت هي عينيها . و كي شافت بطرس تقعدت بالقاعدة , ⁴¹ و مد لها هو يدو و نوضها . و من بعد عيط على القديسين و الارامل و جابها لهم حية . ⁴² و هذا الشيء سمعت بيه يافا كاملة , و ياسر اللي امنوا بالرب . ⁴³ و قعد بطرس ف يافا ايامات ياسر , عند واحد دباغ الجلود اسمو سمعان .