¹ و كان شاول راضي على قتل استيفانوس . و صرى في هاذاك اليوم إضطهاد كبير على الكنيسية اللي في اورشليم , و راحوا كلهم توزعوا في جوايه اليهودية و السامرة , بقاو غير الرسل . ² و جاو رجال يخافوا ربي و هزوا استيفانوس دفنوه و عملواعليه مناحة كبيرة . ³ و اما شاول كان حاب يقضي على الكنيسية , و هو يدخل البيوت و يكركر الرجال والنساء و يرميهم في الحبس . ⁴ و هاذوك اللي تشتتوا راحوا من مكان لمكان يبشروا بكلمة الله . ⁵ و هبط فيليبس لواحد لمدينة في السامرة و بدا يبشر ناسها بالمسيح . ⁶ و كانوا الناس يصنتوا لكلامو بقلوبهم كي سمعوا بالعجايب اللي دارها وزادوا شافوا بعينيهم , ⁷ على خاطر ياسر منهم اللي كانوا مسكونين بالجنون كانت تخرج منهم و تصيح بصوت كبير . و ياسر من المشلولين و العايبين رتاحوا . ⁸ و كانت فرحة كبيرة في الجوايه الكل تاع المدينة . سيمون السحار ⁹ و قبل كان واحد الراجل في لمدينة اسمه سيمون , يعمل السحور و ناس السامرة كانوا حايرين فيه . و كان حاسب روحو حاجة كبيرة . ¹⁰ و من لكبيرحتى لصغير كلهم كانوا يتبعوا فيه و يقولوا : "هذا هو قدرة الله الكبيرة ". ¹¹ و تبعوه على خاطر كانوا مخدوعين بالسحور تاعو هذي مدة طويلة . ¹² و كي صدقوا لكلام تاع فيليبس و هو يبشر بالامور تاع ملكوت الله و باسم يسوع المسيح , تعمدوا رجال ونساء . ¹³ و حتى سيمون في ذاتو امن . و كي تعمد كان دايما يقعد مع فيليبس , و شاف عجايب و ايات كبيرة تصرى و بقى حاير . ¹⁴ و كي سمعوا الرسل اللي في اورشليم باللي السامرة قبلت كلمة الله , بعثولهم بطرس ويوحنا, ¹⁵ اللي كي راحولهم صلاو من اجلهم باه يقبلوا الروح القدس , ¹⁶ على خاطر ما زال ما استقرش حتى على واحد فيهم , بالصح هما كانوا متعمدين باسم يسوع المسيح . ¹⁷ و كي حطوا عليهم اليدين قبلوا الروح القدس . ¹⁸ و كي شاف سيمون اللي الحطان تاع يدين الرسل يمد الروح القدس جاب لهم صوارد ¹⁹ و قال : " مدوا لي حتى انا هاذي القدرة , باه كل من نحط عليه يدي يقبل الروح القدس " . ²⁰ قالو بطرس : " خلي صواردك عندك يهلكوك , راك حاسب بلي تقدر تشري المهبة تاع الله بالدراهم ! ²¹ لا عندك لا قسمة ولا نصيب في هذا الامر , على خاطر قلبك ماهوش صافي مع الله . ²² توب على شرك هذا , و اطلب من عند الله و لعل يسامحك على نية قلبك , ²³ على خاطر نشوف فيك تتخبط في مرارة المر و رباطات الظلام " . ²⁴ جاوب سيمون وقال : " اطلبوا انتوما من ربي على جالي باه ما يصراليش واش راكم تقولوا " . ²⁵ و من بعد ماشهد بطرس و يوحنا و تكلموا بكلمة ربي , ولاو لاورشليم بعد ما بشروا مدن كثيرة في بلاد السامريين . فيليبس و لوصيف الاثيوبي ²⁶ أيا ملاك الرب كلم فيليبس و قالو : " نوض روح جيهة الجنوب , على الطريق الخالية المحدرة من اورشليم لغزة " . ²⁷ ناض و راح و إذا واحد الراجل وصيف اثيوبي , وزير تاع كنداكة سلطانة اثيوبيا , متصرف على كل شؤون الخزنة , هذا كان حاج لاورشليم باه يسجد . ²⁸ و كي كان راجع قاعد في الكروسة تاعو و هو يقرى في لكتاب تاع اشعياء . ²⁹ و قال الروح لفيليبس :" قدم و امش بحذى هاذي الكروسة ". ³⁰ قرب ليه فيليبس , و سمعو يقرى في لكتاب تاع النبي اشعياء , و قالو :" كاش ما راك تفهم الشيء اللي راك تقرى فيه ؟" . ³¹ قالو : " كيفاه نقدر نفهم لو كان واحد ما يشرحلي ؟". و طلب من فيليبس يطلع و بقعد معاه . ³² اما جزء الكتاب اللي كان يقرى فيه كان هاذا : " كيما شاة يجرو فيها للذبيحة , و كيما خروف ساكت قدام اللي يجزوا فيه هكذا ما حلش فمو . ³³ و هو ذليل فكولو حقه , و في جيله شكون يخبر عليه ؟ على خاطر حياتو تقصفت من لرض " . ³⁴ جاوب لوصيف فيليبس و قالو :" قول لي : على شكون يهدر النبي لهنا ؟ على روحو و الا على واحد اخر ؟ . ³⁵ و بدا فيليبس من هاذ الكتاب يهدرلو و يبشر فيه بيسوع . ³⁶ و كي كانوا ما شيين في الطريق وصلوا لواحد البقعة فيها ماء , قال الوصيف :" ها هو الماء . واش يمنع لو كان نتعمد ؟ " . ³⁷ قالو فيليبس : " إذا راك تامن بكل قلبك يجوز " . جاوب و قال : " انا نامن بلي يسوع المسيح هو ابن الله " . ³⁸ و حبس الكروسة , و هبطوا مع بعضاهم للماء , فيليبس و لوصيف , و عمدوا . ³⁹ و كي خرجوا من الماء , خطف روح الرب فيليبس , و من لثم ما زادش لوصيف شافو , و راح مشى في طريقو فرحان . ⁴⁰ اما فيليبس لقاوه في مدينة اشدود . و هومعدي في طريقو كان يبشر كل المدن حتى وصل لمدينة قيصرية .