¹ و قال اغريباس لبولس: "مسموح ليك تهدر و تدافع على روحك". دار بولس اشارة بيدو وبدا يهدر و يدافع على روحو و قال: ² "حضرات الملك اغريباس انا فرحان اليوم, على خاطر راح ندافع على روحي قدامك و نرد على الشيء اللي يتهموني بيه ليهود. ³ حضرتك تعرف العادات و الامور الكل اللي بين ليهود, على هاذا نترجاك تصبر عليا و تسمعني للخر. ⁴ ليهود الكل يعرفوا السيرة تاعي من صغري و كيفاه تربيت في اورشليم و عشت في وسط اهلي وناسي, ⁵ و علابالهم من بكري, لو كان حبوا يشهدوا عليا بالحق, كيفاه كنت نتبع اصعب مذهب في العبادة تاعنا كي كنت فريسي. ⁶ و انا ضرك واقف نتحاكم على جال الوعد اللي مدوا ربي لجدودنا, ⁷ و اللي العشاير تاع بني اسراييل في تناش يستناو باه يتحقق لهم و ينالوه, يعبدوا في ربي ليل ونهار. و انا على جال هاذا الرجاء ليهود اليوم يتهموا فيا حضرات الملك اغريباس. ⁸ علاه ما تصدقوش باللي الله يحيي الموتى؟ ⁹ و انا كنت حاسب روحي قادر ندير امور ياسر معادية للاسم تاع يسوع الناصري. ¹⁰ و بديت حتى في اورشليم, و دخلت ياسر من المومنين بيه للحباس, و كنت ندي الاذن من عند الرياس تاع الكهنة. و كي كانوا يقتلوهم كنت موافق. ¹¹ و في كل مجمع كنت نعاقبهم و نعذبهم بلا حساب, و نحتم عليهم ينكروا الايمان تاعهم. و كنت من كثر ما نكرههم نزيد نحاوزهم حتى و هما خارج من اليهودية في مدن اخرى. ¹² و رحت لدمشق نفركت على اتباع هاذا الطريق, و انا هاز معايا الاذن من عند رياس الكهنة, ¹³ و في نص النهار و انا مسافر في الطريق, حضرات الملك, واحد النور اقوى و ابهى من النور تاع الشمس, برَق علينا انا و الناس اللي كانوا معايا. ¹⁴ طحنا الكل على لرض, و سمعت صوت يهدر معايا باللغة العبرية و يقول: شاول! علاه تضطاهد فيا؟ النوى صعيب يترحى. ¹⁵ قلت لو: شكون انت يا سيدي؟ رد عليا و قال: انا يسوع اللي راك تضطاهد فيه. ¹⁶ بالصح نوض و اوقف على رجليك على خاطر ظهرت لك على هاذي السبة, خايرتك باه تكون خادم ليّا و شاهد على الشيء اللي شفتو و الشيء اللي راح نزيد نبينو ليك. ¹⁷ و راح نمنعك من ليهود و من الامم اللي راح نبعثك ليهم, ¹⁸ باه تتفتح البصيرة تاعهم و يرجعوا من الظلمة للنور, ومن سيادة الشيطان عليهم للسيادة تاع الله, حتى ينالوا كي يآمنوا بيا الغفران لذنوبهم و يكون عندهم حتى هما قسمة مع القديسين. ¹⁹ "و من هاذاك النهار حضارات الملك اغريباس ماعصيتش هاذي الرؤيا اللي من السماء, ²⁰ و خبرت في الاول الناس اللي في دمشق, و اللي في اورشليم و اللي في الجوايه تاع بلاد ليهود كاملة, و من بعد الامم, باه يتوبوا و يرجعوا لله و يعملوا اعمال تليق بالتوبة. ²¹ و على جال هاذا الشيء حكموني ليهود في الهيكل و كانوا حابين يقتلوني. ²² بالصح الله عاونني , حتى لليوم هاذا, و انا نشهد للصغير و للكبير. و انا ما نقول في حتى الشيء اخر من غير اللي قالوه لنبياء و موسى وتنبأوا بيه راح يصرى. ²³ باللي المسيح راح يتوجع, و يكون هو اول واحد يقوم من بين الموتى, و تجي لبشارة لليهود و للامم بالنور تاع الخلاص". ²⁴ و كي كان بولس يدافع على روحو بهاذا لكلام, قال فستوس بصوت عالي: "راك هبلت يا بولس! هبلاتك كثرة لكتب!". ²⁵ قالو بولس: "ما نيش مهبول يا لعزيز فستوس, انا نقول في كلام الحق و الصواب. ²⁶ و الملك اللي قاعد اليوم نكلم فيه جهار, يعلم بهاذي الامور الكل, و ما نظنش باللي راح تخفى عليك حاجة كيما هاذي, على خاطر هاذا الشيء ما صرات في ركن اظلم, واحد ما علابالو بيه. ²⁷ حضرات الملك اغريباس تامن بالانبياء؟ على بالي بيك تامن". ²⁸ قال اغريباس لبولس: "مازال شوية برك و تقنعني نولي مسيحي!". ²⁹ قالو بولس: " بالقليل و الا بالكثير, صلاتي لله ليك و لجميع اللي يسمعوا فيا اليوم, يوليو كيما انا, بالصح بلا سلاسل". ³⁰ و كي قال هاذا وقف الملك و الوالي و برنيكي و الناس اللي كانوا حاضرين معاهم, ³¹ و خرجوا و هما يهدروا بيناتهم و يقولوا: " هذا الراجل ما عندو ما دار مش حاجة يستاهل عليها الموت و الا الحبس". ³² و قال اغريباس لفستوس: " كنا قادرين نسيبوه لوكان ما رفعش القضية تاعو للقيصر".