¹ "يا خاوتي الرجال و يا سيادي اللي مقامكم في مقام بابا, خلوني ندافع على روحي قدامكم". ² و كي سمعوه يهدر باللغة العبرية سكتوا خلاص. وقال لهم: ³ " انا يهودي مولود في طرسوس في كيليكية ,بالصح تربيت هنا في هاذي لمدينة و قريت شرع جدودنا قراية صحيحة عند غمالائيل. و كنت كيفكم انتوما اليوم الكل نغير على الشرع تاع ربي. ⁴ و كنت نعادي طريق يسوع و نقتل اللي يتبعوه, و حكمت منهم رجال و نساء و كتفتهم و وصلتهم للحباس, ⁵ و رايس الكهنة و الشيوخة تاع الشعب كلهم يشهدوا عليا, و من عندهم هما اللي ديت بريات للخاوة ليهود اللي في دمشق, و رحت لثمة باه نحكم اللي امنوا بيسوع و نكتفهم و نكركرهم لاورشليم باه يتحاسبوا لهنا. ⁶ و كي كنت رايح و انا قريب نوصل لدمشق جوايه نص النهار, برَق عليا من السماء نور قاوي. ⁷ حتى ن طحت في لرض, و سمعت صوت يقول لي: شاول, شاول! علاه راك تضطهد فيا؟ ⁸ جاوبتو و قلت: شكون انت يا سيدي؟ قال لي: انا يسوع الناصري اللي راك تضطهد فيه. ⁹ و الرجال اللي كانوا معايا شافوا النور وكانوا خايفين, بالصح ما سمعوش الصوت اللي كلمني. ¹⁰ قلت لو: يا ربي واش تحبني ندير؟ قال لي الرب: نوض و ادخل لدمشق ضرك يقولوا لك واش لازم تدير. ¹¹ و على خاطر عينيا عماو من قوة هاذاك الضوء, قوْدوني الناس اللي كانوا معايا من يدي حتى دخلت لدمشق. ¹² و من بعد واحد الراجل يخاف ربي و يمشي حساب الشرع تاعو. و يشهدوا لو ليهود الكل اللي في دمشق ¹³ جاء عندي, و قال لي: يا خويا شاول, حل عينيك! و في ساعتها تحلوا عينيا خزرت معاه و و عدْتْ نشوف. ¹⁴ و قالي: الاه جدودنا خايرك باه تتعرف على واش حاب يدير, و تشوف البار, و تسمعو يكلمك. ¹⁵ على خاطر راح تكون شاهد ليه عند الناس الكل بالشيء اللي شفتو و سمعتو. ¹⁶ و ضرك خف روحك نوض اتعمد و اغسل ذنوبك و ادعي باسمو. ¹⁷ و من بعد ايامات كي رجعت لاورشليم, و انا نصلي في الهيكل, صرات لي واحد الغفوة رحت في النوم, ¹⁸ وانا نشوف فيه يقول لي: ازرب! اخرج من اورشليم في ساع, على خاطر الناس لهنا ما يقبلوش الشهادة تاعك عليا. ¹⁹ قلت لو: يا ربي, راهم عارفين كيفاه كنت في كل مجمع نضرب الناس اللي يامنوا بيك و ندخلهم للحبس. ²⁰ و نهار اللي قتلوا استفانوس الشهيد تاعك و كنت حاضر لثمة و راضي على الشيء اللي داروه. و كنت نعس على قشات الناس اللي قتلوه. ²¹ قال لي: هيا روح, انا راح نبعثك بعيد لشعوب واحايد اخرين من غير ليهود". ²² و كان الغاشي يسمع فيه و كي وصل للكلمة هاذي, بداو يعيطوا على طول اصواتهم و يقولوا: "افْنِيوْ هاذا الراجل من الدنيا, حرام يعيش!". ²³ و كي كانوا الكل يعيطوا و و ينحِوْ في قشاتهم و يرمِوْ في التراب ف لهواء, ²⁴ اعطا الرايس تاع الكتيبة امر للعسكر باه يدِيوَه للكزرنة, و طلب منهم يضربوه حتى ن يقول على واش من سبّة الناس هاجوا عليه كيما هكذا. بولس مواطن روماني ²⁵ و كي حطوه في لرض و ربطوه باه يضربوه, قال بولس للقايد الواقف لثمة: "عنكم الحق باه تضربوا مواطن عندو الجنسية الرومانية بلا ما يعدي على المحكمة؟". ²⁶ و كي سمع هاذا القايد واش قال بولس راح للقايد تاع الكزرنة و قالو: "على بالك واش كنت راح تدير؟ هاذا الراجل عندو الجنسية الرومانية". ²⁷ جاء عندو يجري و سقساه: "قول لي: انت روماني؟". قال بولس: "نعم". ²⁸ ولى القايد قالو: "انا باه وصلت اديت الجنسية حتى ن خلصت سومة غالية خلاص". قالوا بولس: "اما انا من اللي ولدت وانا عندي الجنسية". ²⁹ و ثم ثم بعدوا عليه هاذوك اللي كانوا راح يستجوبوه. و خاف القايد كي عرف باللي بولس مواطن روماني, و هو كتفو. قدام الرياس تاع ليهود ³⁰ و اليوم و غدوة القايد كان حاب يفهم: وعلاه ليهود شكَاو بيه؟ جابوا و حلوا من يديه, وامر باه يجيبوا رياس الكهنة هما و المجمع تاعهم كامل, و من بعد جابلهم بولس.