¹ و عداو على امفيبوليس و ابولونية, و وصلوا لتسالونيكي وين كاين المجمع تاع ليهود. ² دخل عندهم بولس كيما العادة وقعد يتحاجج معاهم من الكتب المقدسة ثلاث سبوت وراء بعضاهم. ³ كان يشرح لهم و يبين بلي كان لازم على المسيح يتألم و يقوم من بين الموتى, و بلي راه هاذا المسيح هو يسوع اللي انا قاعد نبشر لكم بيه. ⁴ و كاين منهم جماعة اقتنعت و جات في صف بولس وسيلا, و من بينهم ياسر من اليونانيين اللي يعبدوا ربي, و ثاني نساء ياسر من لكبار في لعمر. ⁵ و غاروا منهم ليهود اللي ما همش مومنين و راحوا كراو عصابة تاع اشرار من السوق داروا الفوضى و الشغب في لمدينة, و راحوا لدار ياسون يحوسوا على بولس و سيلا باه يسلموهم للشعب. ⁶ و كي ما لقاوهمش كركروا ياسون و معاه خاوة اخرين للحكام تاع لمدينة و هما يعَّيطوا: "هاذم هما اللي داروا الفتنة ف لرض كاملة و زادوا جاو لهنا ثاني. ⁷ و راه مضَّيفهم ياسون عندو. و هما كاملين يخالفوا الامر تاع قيصر ويقولوا بلي عندهم ملك واحد اخر هو : يسوع!". ⁸ و الناس الكل و الحكام تاع لمدينة تقلقوا و ما عجبهمش الحال كي سمعوا هاذي الهدرة. ⁹ و طلبوا كفالة من عند ياسون و لخرين و سَّيبوهم. في بيرية ¹⁰ حكموا الخاوة خرجوا بولس وسيلا ثم ثم و بعثوهم ل بيرية. و كي وصلوا دخلوا للمجمع تاع ليهود. ¹¹ و كانوا ناس ملاح خير من ناس تسالونيكي, و قبلوا الكلمة برغبة كبيرة وكل يوم يفركتوا في الكتب المقدسة: باه يشوفوا اذا كانت هاذي الامور صحيحة؟ ¹² و امنوا منهم ياسر, منهم ياسر من النساء اللي يخافوا ربي, و ياسر ثاني من الرجال. ¹³ و كي سمعوا ليهود الي في تسالونيكي بلي بولس يبشر ثاني بالكلمة في بيرية, لحقوه لثمة وبداو يحرشوا عليه في الناس. ¹⁴ ولاو الخاوة ركَّبوا بولس في لبابور و بعثوه, اما سيلا و تيموتاوس بقاو في تسالونيكي. ¹⁵ و اللي راحوا مع بولس وصلوه حتى ل اثينا, و رجعوا و وصاهم بولس باه يقولوا ل سيلا وتيموتاوس يلحقوا عليه في اقرب وقت. في اثينا ¹⁶ و كي كان بولس يستنى فيهم ف اثينا تقَّلَق و ما قدرش يستحمل, كي شاف لمدينة مليانة بالاصنام. ¹⁷ و كان يكلم ليهود اللي يجيو يعبدوا الله في المجمع, وحتي هاذوك اللي يتلاقى بيهم في السوق كل يوم. ¹⁸ و تجادلوا معاه جماعة من الفلاسفة الابيكوريين و الرواقيين, وحايد منهم قالوا: "يا درى واش يحب يقول لنا هذا الهدَّار؟". و وحايد اخرين قالوا: "الظاهر عليه قاعد ينادي بالهة غريبة". بالصح هو كان يبشر فيهم بيسوع و قيامتو من بين الموتى. ¹⁹ و داو بولس للمجلس تاع لمدينة في اريوس باغوس, و قالوا لو: "نحبوا نعرفوا واش هو هاذا التعليم الجديد اللي قاعد تتكلم عليه. ²⁰ على خاطر راك تقول في امور غريبة علينا, مادابينا نفهموها". ²¹ و كانوا ناس اثينا الكل بالمواطن بالغريب, كلهم ما عندهم حتى حاجة اخرى يديروها في الوقت الفارغ تاعهم, غير يهدروا و الا يسمعوا حاجة جديدة. ²² وقف بولس في وسط المجلس اريوس باغوس و قال: " يا ناس اثينا! راني نشوف فيكم متدينين ياسر من الجوايه الكل, ²³ على خاطركي كنت ندور في لمدينة و نشوف في المعابد تاعكم, شفت واحد المذبح مكتوب عليه:"ل الاله المجهول". و هاذا اللي تعبدوا فيه بلا ما تعرفوه, هاذا هو اللي انا ننادي لكم بيه. ²⁴ الاله اللي خلق الدنيا و كل ما فيها, هاذا, هو رب السماء و لرض, ما يسكنش في معبد مبني باليدين, ²⁵ و ماهوش هو اللي الناس يخدموه بيديهم كي اللي راه محتاج ليهم, على خاطر هو اللي يمد للناس الكل حياة و نفس و كل شيء. ²⁶ و خلق البشر الكل اللي على وجه لرض من اصل واحد, و عطاهم الزمان و لمكان اللي يسكنوا فيه, ²⁷ باه يطلبوه لعلهم يحوسوا عليه ويلقاوه, و هو ماهو بعيد على حتى واحد. ²⁸ على خاطر بيه نحيا و نتحرك و نكون, كيما قالوا وحايد من الشعراء تاعكم ثاني: حتى نحنا رانا من الذرية تاعو. ²⁹ و اذا كنا احنا اولاد الله, ما لازمش نحسبوا االاولوهية كيما الذهب والفضة و الا حجرة منقوشة من الشيء اللي يصنعو الانسان. ³⁰ الله ضرك يامر الناس الكل في كل مكان يتوبوا, و يغمض عينو على زمانات الجهل. ³¹ على خاطر حدد نهار راح يحكم فيه على المسكونة كاملة بالعدل, على يد واحد الراجل خايرو هو, و الدليل بلي خايرو هو كي قومو من بين الموتى". ³² و كي سمعوه يهدر على القيامة من بين الموتى ولاو وحايد يستهزاو بيه, و قالوا وحايد اخرين: "لازم نزيدوا نسمعوك تكلمنا على هاذا الامر ثاني!". ³³ و كيما هكذا خرج بولس من وسطهم. ³⁴ و كاين اللي امنوا وبقاو معاه ما حبوش يخلِوه, و منهم ديونسيوس الاريوباغي, و مرى اسمها دامرس و معاهم وحايد اخرين.