¹ و من بعد كي وصل لدربة و لسترة, لقاو لثمة واحد التلميذ اسمو تيموتاوس, امو يهودية مومنة و باباه يوناني, ² و كانوا الخاوة في لسترة و في ايقونية يشهدوا لو شهادة مليحة. ³ و حب بولس باه يديه معاه, ولى ختنو على خاطر ليهود اللي لثمة كلهم كانوا على بالهم بلي باباه يوناني. ⁴ و كانوا يروحوا عند المومنين في المدن اللي يعديو عليها و يبلغولهم الاوامر تاع الرسل اللي في اورشليم و الحكم تاعهم في القضايا الهامة باه يعملوا بيها. لمنامة تاع بولس على الراجل المكدوني ⁵ و كانت الكنايس تتقوى في ليمان و يزيد العدد تاعها يوم بعد يوم. ⁶ و من بعد كي عداو في بلاد فيريجية و جوايه غلاطية, منَّع عليهم الروح القدس باه يبشروا بالكلمة لثمة في اسيا. ⁷ و كي وصلوا لميسيا حبوا يروحوا ل بيثينية, وزاد منَّع الروح القدس ثاني عليهم باه يدخلوا. ⁸ ولاو عداو على بيسية و هبطوا ل ترواس. ⁹ و كي كان بولس راقد في الليل شاف منامة: راجل من مقدونية واقف و يحاول فيه و يقولو: "عدي لمقدونية و عاونَّا!". ¹⁰ و بعدما ما شاف بولس لمنامة لثمة بعد وجَّدنا ارواحنا باه نسافروا لمقدونية, و كنَّا متيقنين بلي الله دعانا باه نبشروا الناس لثمة. ايمان ليدية في فيليبي ¹¹ و ركبنا لبابور من ترواس و رحنا طول ل ساموتراكي, و اليوم وغدوة رحنا ل نيابوليس. ¹² و منها رحنا ل فيليبي, و هي اكبر مدينة في ولاية مكدونية, وكانت تابعة لروما. و قعدنا ايامات في هاذي لمدينة. ¹³ و نهار السبت خرجنا و رحنا بحذى الواد, و من العادة كانوا ليهود يصليو صلاتهم لثمة, و لقينا جماعة تاع نساء مجتمعين قعدنا و بدينا نحكيو معاهم. ¹⁴ و كانت واحدة لمرى قاعدة تسمع فينا اسمها ليدية, بياعة تاع ارجوان من مدينة تياتيرا, ومومنة تعبد الله, فتح الله قلبها باه تقبل لكلام اللي كان بولس يقول فيه. ¹⁵ تعمدت هي و اهل بيتها و حاولتنا وقالت: "اذا كان حكمتوا عليا بلي راني مومنة بالرب, ارواحوا ادخلوا لداري و اقعدوا عندي". و كي حتمت علينا رحنا. بولس و سيلا في الحبس في فيليبي ¹⁶ و واحد النهاركي كنا رايحين لاجتماع الصلاة, تلاقتنا واحد لخديمة فيها روح تاع كزّانة و كانت تكسب صوارد ياسر لاسيادها من الخدمة تاعها. ¹⁷ بدات تتبع فينا و تعيط على طول صوتها و تقول: "هاذم الناس راهم يخدموا في الله العالي, و يبشروكم بطريق الخلاص". ¹⁸ و كانت كل يوم تعمل كيما هكا. حتى واحد النهار قلق منها بولس و تلفت و قال للروح اللي فيها: " انا نقولك باسم يسوع المسيح باه تخرج منها!". و في ساعتها بعد خرج منها. ¹⁹ و كي شافوا مواليها بلي ما بقاوش يكسبوا منها مال كيما قبل, حكموا بولس و سيلا و كركروهم للساحة تاع لمدينة قدام الحكام, ²⁰ و كي جابوهم للمحكمة قالوا: "هاذم الرجال راهم يديروا ف الفوضى في بلادنا, و راهم من ليهود, ²¹ قاعدين يناديو بعادات ما يجوزش لينا احنا الرومانيين, نقبلوها و الا نعملوا بيها". ²² و هاج عليهم الغاشي, و قطعولهم الحكام قشهم اللي فوق منهم و امروا العسكر باه يضربهم بالعصا. ²³ كثروا عليهم بالضرب و رماوهم في الحبس, و وصَّاو مامور الحبس باه يحط عليهم العسة مليح. ²⁴ و كي جا هاذا الامر للمأمور ولى حطهم في الحبس الداخل خلاص. و ربط لهم رجليهم في المقطرة. ²⁵ و عند نص الليل كان بولس وسيلا يصلِيو و يسبحوا في الله, والمحابسية كانوا يسمعوا فيهم. ²⁶ و على غرادة صرى زلزال قاوي خلاص حتى ن الساس تاع الحبس تحرك, و تحلت البيبان الكل, و تفكت السلاسل تاع لمحابسية الكل. ²⁷ و كي فاق المأمور تاع الحبس من النوم و لقى البيبان الكل محلولة, جبد السيف و كان حاب يقتل روحو, على خاطر كان حاسب بلي لمحابسية هربوا. ²⁸ عيط عليه بولس بأعلى صوتو و قالو: "ما تعمل في روحك حتى شيء! رانا الكل هنا!". ²⁹ طلب منهم يشعلوا الضوء و دخل يجري لداخل, و طاح على ركايبوا قدام بولس وسيلا و هو خايف يرتعد, ³⁰ و من بعد خرَّجهم و قال: "يا سيادي, واش لازمني ندير باه نخْلص؟". ³¹ قالوا لو: "امن بالرب يسوع المسيح تخْلص انت و اهل بيتك". ³² و كلموه هو والناس الكل اللي في دارو بالكلمة تاع الرب. ³³ و داهم في هاذاك الليل في هاذيك الساعة و نضف لهم الجروح تاعهم, واتعمد ثم ثم هو وكل اللي كانوا معاه في الدار. ³⁴ و كي طلَّعهم لداروا عمل لهم عشاء, و فرح بيهم هو واهلوا الكل على خاطر امنوا بالله. ³⁵ و كي طلع النهار بعثوا الحكام العسكر و قالولهم: "سيب هاذوك الزوزالرجال". ³⁶ خبَّر المأمور بولس بلي الحكام بعثوا امر باه نسَّيبكم, اخرجوا ضرك و روحوا في لمان. ³⁷ قالو بولس : "كيفاه يضربونا جهارو بلا محاكمة, و احنا عندنا الجنسية الرومانية, و زادوا رماونا في الحبس, و ضرك يطردونا في السر؟ لا! لازم هما اللي يجيو ويخرجونا". ³⁸ رجعوا العسكر و خبروا الحكام بكلام بولس. و كي سمعوا بلي هما عندهم الجنسية الرومانية خافوا. ³⁹ و جاو طلبوا منهم السماح و خرجوهم, و طلبوا منهم يخرجوا من لمدينة. ⁴⁰ و كي خرجوا من الحبس راحوا عند ليدية, و شافوا الخاوة لثمة و شجعوهم و من بعد راحوا.