1 و هبطوا جماعة من اليهودية وبداو يعلموا في الخاوة بلي: " لو كان ما تتختنوش كيما قال موسى, ما تقدروش تتحصلوا على الخلاص". 2 و صرى جدال و خلاف كبير و بين بولس و برنابا, و في لخر تفاهموا باه بولس و برنابا و و ناس اخرين معاهم يروحوا للرسل و للشيوخة اللي في اورشليم باه يفرزوا هاذا المشكل. 3 و شيْعتهم لكنيسية على خير و كي راحوا عداو على فينيقية و السامرة و خبروهم كيفاه حتى الامم هداهم ربي لطريقو, الشيء اللي فرحوا بيه الخاوة ياسر. 4 و كي وصلوا لكنيسية اورشليم فرحوا بيهم و الرسل و الشيوخة, و زادوا خبروهم حتى هما بالشيء اللي عملوا ربي معاهم. 5 و قفولهم جماعة من المومنين اللي كانوا قبل يتبعوا في المذهب تاع الفريسيين, و قالوا لهم: "لازم على اللي ماهمش يهود يتختنوا و يعملوا بالشرع تاع موسى قبل". 6 و تلموا الرسل و الشيوخة باه يلقاو حل. 7 و صرى بيناتهم جدال كبير و من بعد وقف بطرس و قال لهم: "يا الخاوة, راكم عارفين بلي الله قبل خلاص خايرني من بينكم باه انا اللي نخبر الامم على كلمة الانجيل و يامنوا. 8 و الله اللي عارف لقلوب, شهد لهم حتى هما كي مدلهم الروح القدس كيما مد لنا احنا بالذات. 9 و ما ميَّزش بينا و بينهم في حتى شيء, على خاطر هو اللي طهر قلوبهم بالايمان. 10 و ضرك علاه تجربوا في الله و تحطوا في رقبة التلامذة هاذا النير اللي عجزنا احنا و جدودنا باه نهزوه؟ 11 بالصح نامنوا بلي بالنعمة تاع ربنا يسوع المسيح احنا ننالوا الخلاص و حتى هما ثاني". 12 و لاو سكتوا الكل. و بقاو يسمعوا في برنابا و بولس و هما يتكلموا على كل الايات و العجايب اللي عملها الله على يديهم بين الامم. 13 و كي كملوا كلامهم تكلم يعقوب و قال: " يا خاوتي, اسمعوني. 14 كيما قال سمعان بلي الله من لول كان حاب يدي من بين الامم شعب على اسمو. 15 و هاذا الشيء اللي جاء في كلام الانبياء, كيما راه مكتوب: 16 نزيد نرجع من بعد لخيمة داوود اللي تهدمت و نبنيها, نزيد نبنيها من فوق الردم و نعليها, 17 باه كل الناس ترجع لي, و حتى الامم اللي اسمي تحط عليها, هكذا يقول الله وهاذي الامور كلها يجريها. 18 معروفة من بكري وجميع اعمالو خبر عليها. 19 على هاذيك انا نشوف بلي ما نزيدوش نثقلوا على الناس اللي رجعوا لله من الامم, 20 بالصح نكتبولهم و نوصيوْهم باه يمنعوا النجاسات تاع الاصنام, و الزنا, و الجيفة, و الدم. 21 و شريعة موسى من قبل راهي منتشرة في كل مكان من لجيال لقديمة حتى لضرك, في كل مدينة كاين معلمين يقراوها كل سبت في لمجامع". رسالة لكنيسية للمومنين اللي من الامم 22 وقتها تفاهموا الرسل و الشيوخة تاع لكنيسية باه يخايروا زوز رجال من وسطهم, و يبعثوهم لانطاكية مع بولس وبرنابا: خايروا يهوذا اللي يعيطولوا برسابا, و سيلا, و هما ناس عندهم مكانة كبيرة بين الخاوة. 23 و سلمولهم هاذي البرية اللي كتبوها بيديهم قالوا فيها: "سلام من عند الرسل و الشيوخة و الخاوة الكل للخاوة اللي من الامم في انطاكية وسورية و كليكية: 24 رانا سمعنا بلي كاين ناس خرجوا من عندنا و جاو عندكم و قلقوكم و شوْشوا عليكم, كي طلبوا منكم تتختنوا و تعملوا على حساب الشرَع تاع موسى, و هاذو الناس احنا ما طلبناش منهم يعملوا هاذا الشيء, 25 على هاذيك تفاهمنا و خايرنا نبعثولكم زوز رجال مع خاوتنا لعزاز بولس وبرنابا, 26 رجال مدوا حياتهم على جال الاسم تاع ربنا يسوع المسيح. 27 بعثنالكم يهوذا و سيلا, باه يخبروكم بنفس الامور اللي كتبناها. 28 على خاطر الروح القدس و احنا شفنا, بلي ما نزيدوش عليكم حمل واحد اخر, من غير هاذي الحاجات اللي واجبة: 29 تبطلوا الذبايح اللي تتذبح للاصنام, و الدم, و الجيفة, و الزنا, اذا كان صنتوا ارواحكم من هاذي الامور تعملوا الصواب, يعطيكم الصحة ". 30 و راحوا في لول ل انطاكية, و لموا جماعة المومنين و سلمولهم لبرية. 31 و كي قراوها فرحوا خلاص بالتشجيع اللي جاء فيها. 32 و على خاطر يهوذا هو و سيلا كانوا ثاني انبياء, وعظوا الخاوة لثمة بكلام ياسر و شجعوهم. 33 و بقاو مدة من الزمان و من بعد سيبوهم على خير باه يرجعوا للرسل. 34 بالصح سيلا حب يبقى في انطاكية, 35 و بولس هو برنابا سكنوا في انطاكية و بقاو يعلموا و يبشروا مع الخاوة لخرين حتى هما بالكلمة تاع الرب. بولس و برنابا يتفارقوا 36 و من بعد ايامات قال بولس لبرنابا: "هيا نرجعوا نروحوا نتفقدوا الخاوة في كل مدينة بشرنا فيها بكلمة ربي, و نشوفوا احوالهم كيفاه". 37 طلب منو برنابا باه يديو معاهم ثاني يوحنا اللي يقولولو مرقس, 38 بالصح بولس ما حبش على خاطر مرقس تفارق معاهم في بمفيلية و ما راحش معاهم للخدمة. 39 و صرى بيناتهم نزاع حتى تفارقوا على بعضاهم. برنابا دا معاه مرقس وسافروا في لبحر لقبرس. 40 و بولس دا معاه سيلا و خرج من انطاكية بعدما ودَّع الخاوة و خلاهم للنعمة تاع ربي. 41 و راح لسوريا و كليكية يشجع في الكنايس و يقوى فيهم .