¹ وبعد هاذا خرج بولس من اثينا و راح لكورنتوس, ² و لثمة تلاقى مع واحد الراجل يهودي اسمو اكيلا, بنطي من اهل البنط, و كان كي غير جا من ايطاليا, هو ومرتو برسكيلا, على خاطر القيصر كلوديوس قال لازم على ليهود الكل يخرجوا من روما. جاهم بولس. ³ و كي كان مولى صنعة كيما هما قعد عندهم و ولى يخدم معاهم في الصنعة تاع لخيَّم. ⁴ و كان كل نهار سبت يجادل ليهود و اليونانيين في المجمع و يقنع فيهم. ⁵ و كي هبطوا سيلا و تيموتاوس من مكدونية, و كان بولس حاصر انشغالو كامل في التبشير بالمسيح يسوع لليهود. ⁶ و كي ما حبوش وسبوه نفض يديه منهم و قال لهم : " ذنوبكم في رقبتكم! انا بري منكم. من ليوم نروح نبشر غيركم من الامم". ⁷ و راح من لثمة و سكن عند واحد الراجل اسمو يوستس, كان يعبد الله, و كانت دارو لاصقة في المجمع. ⁸ و كريسبس الرايس تاع المجمع امن هو ثاني بالرب هو واهل بيتو الكل, و ناس ياسر من كورنتوس سمعوا و تعمدوا. ⁹ و كلم الرب بولس في منامة في الليل و قالو: "ما تخافش, اهدر و ما تسكتش, ¹⁰ على خاطر راني معاك , واحد ما ياذيك, على خاطر عندي شعب كبير في هاذي لمدينة". ¹¹ و قعد عام ونص بيناتهم يعلم بالكلمة تاع الله. ¹² و كي كان غاليون والي على اخائية, ليهود الكل مع بعضاهم تفاهموا على بولس, و جابوه للمحكمة ¹³ و قالوا: "هاذا الراجل يميل في الناس باه يعبدوا الله عبادة تخالف الشيء اللي في الشرع تاع موسى". ¹⁴ و كي جا بولس راح يبدى يهدر قال غاليون لليهود: " يا ليهود لو كان جات لحكاية حكاية ظلم و الا جريمة خطيرة, كنت نقضيلكم بالحق و نستحملكم. ¹⁵ بالصح كي عادت المسألة مسألة كلام, و اسامي, في الشريعة تاعكم, انتوما تدبروا روسكم. على خاطر انا ما نحبش نكون قاضي لهاذي الامور". ¹⁶ و سحتهم من لمحكمة. ¹⁷ و حكموا ناس اليونان سوستانس الرايس تاع المجمع, و ضربوه قدام المحكمة, و اما غاليون ما هموش الامر خلاص. بريسكلا و اكيلا و ابولس ¹⁸ و قعد بولس لثمة مدة طويلة في كورنتوس, ومن بعد ودَّع الخاوة و سافر في البابور ل سوريا, و راحوا معاه بريسكلا و اكيلا, بعدما حفف شعرو في كنخريا على جال وعد كان عليه. ¹⁹ و كي وصل ل افسس خلاهم لثمة. و دخل هو للمجمع تاع ليهود باه يتجادل معاهم. ²⁰ و طلبوا منو يزيد يقعد عندهم اكثر بالصح ما حبش. ²¹ و ودعهم وقال لهم: " لازم نعيد العيد الجاي في اورشليم, بالصح نرجع لكم مرة اخرى ان شاالله". و ركب في البابور من افسس وسافر. ²² و كي هبط في قيصرية راح سلم على الكنيسية, وبعد هوَّد ل انطاكية. ²³ و بعد ما قعد لثمة مدة خرج و راح في جوايه غلاطية و فريجية يشجع في التلامذة و يقوي العزيمة تاعهم. ²⁴ و من بعد جا واحد الراجل ل افسس اسمو ابولس يهودي, من اهل الاسكندرية, يعرف يهدر مليح و فاهم الكتب المقدسة. ²⁵ و كان يعرف مليح طريق الرب. وكان عندو حماس يتكلم و يعلم تعليم صحيح كل واش يخص يسوع. و كان يعرف غير المعمودية تاع يوحنا برك. ²⁶ و بدا يجاهر في المجمع. و كي سمعوه اكيلا و برسكيلا داوه عندهم, و زادوا شرحولو طريق الرب بالتدقيق. ²⁷ و كي كان حاب يروح ل اخائية, شجعوه الخاوة و بعثوا برية للتلامذة لثمة و وصاوهم باه يستقبلوه و يرحبوا بيه. و كي وصل كان بالنعمة يعاون ياسر الناس اللي امنوا, ²⁸ على خاطر يتحاجج مع ليهود و يسكتهم جهار, و يبين لهم بلي يسوع هو هو المسيح.