¹ القول هاذا صادق: كان واحد حب يولي اسقف, راه طالب الصلاح. ² الاسقف لازم ما يكون فيه حتى حاجة يتلام عليها, متزوج بمرى واحدة, فايق, عاقل, حشّام, مضياف كريم, يقبل التعليم, ³ ما هوش سكارجي, ما هوش عنيف, يكون لطيف يكره لعراك, و ما يكونش طمّاع يحب المال, ⁴ يعرف يدبر بيتو مليح, اولادو يطيعوه و يحترموه. ⁵ اذا كان الواحد ما يعرفش يدبر امور دارو, كيفاه يقدر يتهلى في كنيسية الله؟ ⁶ ما يكونش جديد في الايمان باه ما يتكبرش و ينال العقاب اللي نالو ابليس. ⁷ و ثاني لازم الناس اللي من برى لكنيسية يشهدولو بالخير, باه ما يجيبش العار و يحصل في فخ ابليس. الشمامسة ⁸ والشمامسة ثاني لازم عليهم يكونوا محترمين, مش خدّاعين, و مش مولوعين بالشراب, و لا طمّاعين ف الربح الباطل, ⁹ و لازم عليهم يحافظوا على سر الايمان بضمير طاهر. ¹⁰ و لازم يتجربوا قبل, و من بعد كي ما يتلاموا بحتى شيء يتحطوا شمامسة. ¹¹ و ثاني حتى النساء لازم يكونوا محترمات, مش تاع نميمة, فايقات, امينات في كل شيء. ¹² الشمامسة كل واحد يكون عندو مرى واحدة, يحسنوا تربية اولادهم و يدبروا امور ديارهم مليح, ¹³ على خاطر كان داروا خدمتهم كيما لازم, يجيبوا لرواحهم درجة عالية و ثقة كبيرة في الايمان اللي بالمسيح يسوع. ¹⁴ نكتب لك هاذا الشيء و نتمنى نجيك عن قريب. ¹⁵ بالصح اذا كان تعطلت تكون عارف كيفاه تتصرف في بيت الله, اللي هو كنيسية الله الحي عرسة الحق و الساس تاعو. ¹⁶ ما فيهاش هدرة سر التقوى عظيم: الله ظهر في الجسد, تبرر في الروح, شافوه الملائكة, كان بشّارة للامم, امنوا بيه في العالم, و ترفع في الجاه.