¹ اول حاجة نطلبها منكم, ادعيو الله و صلِيوْ و سبحوا و اشكروا لجميع الناس, ² للسلاطين و كل مسؤول, باه نعيشوا مرتاحين هانيين بكل تقوى و كرامة, ³ على خاطر هاذا شيء مليح و مقبول عند الله اللي سلكنا, ⁴ الله اللي يحب جميع الناس يمنعوا, و لمعرفة الحق يوصلوا. ⁵ على خاطر كاين غير اله واحد و وسيط واحد بين الله و الناس: اللي هو يسوع المسيح, ⁶ اللي ضحى بروحو باه يفدي جميع الناس, و الشهادة على هاذا الشيء تمت في وقتها, ⁷ و الله جعلني ليها مبشر و رسول. نقول الحق في المسيح و ما نكذبش, معلم للامم في الايمان و الحق. ⁸ نحب الرجال يصلِيو في كل مكان , هازين يدين طاهرة, بلا غش و بلا عراك. ⁹ و النساء ثاني يزينوا ارواحهم بلباس الحشمة, و يزيدوا عليها لحياء و لعقالة, مش بالضفاير و الذهب و المجوهرات و القش الغالي, ¹⁰ بالصح كيما يليق بنساء يعيشوا في رضاية الله و لعمال الصالحة. ¹¹ و على لمرى تتعلم و هي ساكتة و في خضوع كامل. ¹² بالصح ما نسمحش للمرى تعلم و الا تتسلط على الراجل, و تكون هادية, ¹³ على خاطر ادم هو اللي نخلق لول و من بعد جات حواء, ¹⁴ و ادم ما تغرش, بالصح لمرى هي اللي تغرت و وقعت في المعصية. ¹⁵ بالصح الامومة تمَنّعها, اذا كانت ثابتة في الايمان و المحبة و القداسة مع الرزانة.