¹ Kristus je' Sen Pena'dieng Ba'en ne, cenganak-cenganak kie, bangen tavai ne dalem Tuhan. Ahie ta'un hempaet hemet kie' nyoret maha eham jo di'i ne de' kejage' eham. ² Jage' ne te asu-asu, jage' ne te helonen de' ja'et, ngen jage' ne te e'o de' ozen terane' oso, ³ jo ilu ne un terane' de' atek len e, de' tunok dalem Roh Allah, fempou Yesus Kristus, ngen de ta'un mauong ta je' fozen udip le ⁴ azo fe kie' len e un ohen kefempou te voze-voze de' un tusun tane' ji. Bue un kemet du bue ezo de' homo e ezo un ohen ngempou voze-voze tusun tane' ji, mi'i te kie' vo'o: ⁵ Ahie de' nerane' te fengazo ta'ue, lepue' Israel de' atek ngelen, sen lepue' Benyamin, kelonen Ibrani de' fisiu Ibrani. Ba'en Hukum Taurat, ahie' zi kelonen Farisi. ⁶ Dalem kie' bangen belen, ahie' zi co de' ngenca'et taeng jemaat, ngen dalem feneneng ha denta Hukum Taurat, ahie ta'un un korang e. ⁷ Ngene mehe, muong de' ce'tau re duhue' kie' untong, nihi kie' homo lugie' kie' ko'en Kristus. ⁸ Je' atek elene, muong je kie' homo e lugie' muong te de' sengbese bo kie' tesenYesus Kristus lebih untong ko'en Kristus, Tuhan kie', muong je' metak te ahie' -- muong di de' kie' homo emue'! -- afane cie' senteng ke'uen Kristus. ⁹ Tei kie' fevesuong dalem Kristus ento e o'en feneneng kie' tengen de' kie fehalai sen Hukum Tauran, jo de' kenai sen pengelen fala Kristus, ji'i ne feneneng sen Allah de' senaven te pengelen. ¹⁰ Pengobe' kie' tesen Ezo ngen mehumpin fengoet kuasa de' fudip zo, ngen co le dalem penosa bi'i e tei kue ba'en Ezo dalem fatei E ¹¹ ho'o hetei e ahie' un udip te ru de' matei. Ferisie' Heteno Te Tepai Surgawi ¹² Ento e ho'en kie' tei e un ne ngen te'a, jo kie' fa'bet e bi'i kie' encam mafo e kue ba'en Kristus mafo ahie. ¹³ Cenganak-cenganak, ahie' ta'un homo e lepek ne mafo e. Jo je' kie' ozen; ahie' ngelufie' de' saha lihut cie ngen na'et inu de' heteno te. ¹⁴ Tei ie' fecok te ha'dep bi'i ie' un tolet, ji'i ne hetepai surgawi sen Allah dalem Yesus Kristus. ¹⁵ Tea te bole' de' tevu'un fehemet ue mehe re. Bue eham ta'un fehemet de' mehe, Allah tengen he hujue' e ngen te'a ta ihue'. ¹⁶ Azofe mehe, te'a te bue le mu'dip kue ba'en keteneng de' le un. ¹⁷ Cenganak-cenganak, baze' ne disie' udip kie' ngen na'et ne du de' mu'dip kue ba'en de' kam na'et sen amie'. ¹⁸ Jo ha'du ru de' mu'dip nyefati salib Kristus. De' mihi, tangen tene kie' ngetene' e mihue' ngen nihi kie' ngetene' ngen lulue'. ¹⁹ Tei ho'o udip do ji'i ne fatei, ko un ne tengala do batek do, ngen de' e'o fempou de' heve' sa'e le. Hemet do beng te je' tusun tane' ji. ²⁰ Jo un ne he ruhue' temek le he surga, hi'i te ilu ngena nai Juru Selamat, ji'i ne Tuhan Yesus Kristus. ²¹ Zo hemaliu udip ja'et di bi'i tei heve' ngen udip dema de' te'a. Ngen fengoet E, Kristus senteng engkin muong je' muong tunok te Zo.