Hatok co le Atai ngen Kemet ¹ Jo mehe re, Cenganak-cenganak kie' de' kie' lesau ngen kie' menue', de' ozen ahie' saie' ngen bangen, mere'jeng ngen tangen le dalem Tuhan. ² Kie' nyet ta Euodia ngen ta Aintikhe mu'dip femamie' dalem Tuhan. ³ E'a, ahie nyet ta eham tozang-tozang len cie', tuluong na leto-leto di jo do peza'gen ba'et ngen ahie' dalem ja'gen Injil, mehe lete ngen Klemens ngen tozang-tozang e de' peza'gen ngen cie', de' nga'den-nga'den do senoret dalem kitab kehidupan. ⁴ Nyaie le nyelaven dalem Tuhan. Kie' kun ne la'a, nyaie ne! ⁵ Le fe keleme' atai kam te muong tesen. Henyeng tene Tuhan nai. ⁶ Enteng ne tosa ta je' inu-inu. Jo, dalem muong je' muong ba'da ne fengobe' kam fala Tuhan Allah dalem sembazang ngen fenyet ngen tenganie tavai. ⁷ Damei ngen saie' Tuhan Allah je' felavo ta muong kemet ke ha feto'bo atai ngen kemet cam dalem Tuhan Yesus Kristus. ⁸ Tei ho'o e cenganak-cenganak, muong je' teneng, muong je' te'a, muong je' keve', muong de' buie', muong je' te'a, muong je' du fempou, muong de' fenue', muong je' pahesiu du nenganie', pehemet ne muong a'dieng. ⁹ Inu de' kam lepek fahalei,ala ne, ngene'en ne, ngen na'at sen ahie', ti ne muong de, ba'en ne Tuhan Allah he'un damei pene'a ngen ke ha ngen eham. Paulus Kun Saie' Hemet fala Helonen-Helonen Ngelen ha Filipi te ¹⁰ Ahie' atek saie' le dalem Tuhan jo nihi, ho'o e kam nai felevet ke tumun cam mahie'. Un ne, hena kam ngetumun kemet mahie re, jo ta'un co avang kam. ¹¹ Ahie' kun ne zi ento e kie' dalem ta'un un je' un, jo ahie' lepek ne kie' fehalai ta muong tenozen de' un. ¹² Tesen cie' inu hasip, ngen tesen fe kie' inu aza'. Dalem muonge ngen muong fozen ahie' lepek tene fehalai mu'dip inu une, ngen beso ngen la'u, ha'du veng ngen ta'un veng. ¹³ Senteng kie' ti je' muonge ko'en je kenai fengoet mahie'. ¹⁴ Jo, eham lepek ozen te'a kobe' felotel empin ngen cie. ¹⁵ Eham tengen tesen, jemaat Filipi, ta'dieng kie' peza'gen Injil, o'o lepek kie' mecin sen Makedonia, ta'un co jemaat de' kobe' fetolet empin ngen cie' dalem tei ngen ala, de' ento eham. ¹⁶ Po tasa ha kota Tesalonika, kam nai je' kie perlue' ento co levei le. ¹⁷ Jo ento e je' kam nai de kie' meto, ji'i e beva-beva de' ngempezu pene'a kam. ¹⁸ Lepek tene kie' ala je' kam nai, felavo fe ta de. Ahie' un muong je' kie' perlue' ko'en pengencei kam mahie' je' Efaproditus engkin. Pengencei kam de co pengencei de' te'a, neleva de' pahesiu ngen pesaie' Tuhan Allah. ¹⁹ Tuhan Allah kie' ke ha nai e muong je' kam perlue' baze' ka'du sen Tuhan je' te'a dalem Yesus Kristus. ²⁰ Pene'a e maha Tuhan Allah ngen Amai le ceng ka'jen-ka'jen. Len ²¹ Abie henue' mie fala sengket kelonen buie' dalem Yesus Kristus. Kenue' maha eham sen cenganak-cenganak co le pengelen de' un ngen ahie' huwi ne. ²² Muong kelonen buie' nai henue' meham, nefu'un maha de' peza'gen ta istana kaisar. ²³ Kempoang sen Tuhan Yesus Kristus ngen roh kam. Len