¹ Lelivi lelafika kuJeremiya libuya kuSimakadze ngemalanga aJehoyakhimi indvodzana yaJosaya inkhosi yakaJuda, litsi, ² ''Hamba kulomndeni wemaRekabites bese ukhuluma nawo. Ubese ubabuyisa endlini yami, kulinye lemakamelo lapho, bese ubanika liwayini batewunatsa.'' ³ Ngako, ngatsatsa Jazaniya indvodzana yaJeremiya indvodzana yaHabaziya kanye nebafowabo, onkhe emadvodzana akhe, nawo onkhe emalunga emndeni wemaRekabites. ⁴ Ngabatsatsa ngabayisa endlini yaSimakadze, ngekhatsi emakamelweni emadvodzana aHanani indvodzana yaIgdaliya, inceku yaNkulunkulu. Lamakamelo bekaseceleni kwelikamelo lebaholi, lelalingetulu kwelikamelo laMasaya indvodzana yaShalumu, umgcini lisango. ⁵ Ngase ngibeka tindishi netinkomishi letigcwele liwayini phambikwemaRekabites ngatsi kubo, ''Natsani liwayini.'' ⁶ Kodvwa batsi, ''Angeke silinatse liwayini, ngoba bokhokho betfu, Jonadabu indvodzana yaRekabu, wasiyala, ''Ningalinatsi liwayini, nine nobe titukulwane tenu, ingunaphakadze. ⁷ Futsi, ningakhi tindlu, nitjale tinhlavu, noma nihlanyele noma ngabe nguyiphi ingadze yemagelebisi; loku akusiko kwenu. Ngoba kufanele nihlale emathendeni emalanga enu onkhe, kute kutawenteka nihlale emalanga lamanyenti endzaweni lanitewuhlala khona njengetihambi.' ⁸ Silihloniphile livi laJonadabu indvodzana yaRekhabu, khokho wetfu, kukokonkhe lasiyala kuko, kutsi singalinatsi liwayini onkhe emalanga etfu, tsine, bafati betfu, emadvodzana nemadvodzakati etfu. ⁹ Angeke sitakhe tindlu lesitawuhlala kuto, futsi angeke kube nengadze yemagelebisi, emasimu, noma tinhlanyelo kitsi. ¹⁰ Sihleti emathendeni futsi sihloniphile sakwenta konkhe loku Jonadabu khokho wetfu lekasiyala ngako. ¹¹ Kodvwa ngesikhatsi Nebukhedineza inkhosi yaseBhabhiloni ihlasela lelive, satsi, ' Wotani, kufanele sihambe siye Jerusalema kute sibalekele timphi temaTshaladini netemaAramani.' Ngako ke sihlala eJerusalema.'' ¹² Lase lelivi laSimakadze liyefika kuJeremiya, litsi, ¹³ ''Simakadze wemabandla, Nkulunkulu waIsrayeli, usho naku, ''Hamba uyotsi emadvodzeni akaJuda netakhamuti taseJerusalema, ''angeke yini nikwemukele kulungiswa nekulalela emavi ami? -lesi simemetelo saSimakadze. ¹⁴ Lamavi aJonadabu indvodzana yaRekhabu lawaniketa emadvodzana akhe njengemyalo, kutsi kunganatfwa noma nganguliphi liwayini, asahlonishwa kute kube kulelilanga leli. Bawohlonipha umyalo wakhokho wabo. Kodvwa ngesingami, mine lucobo lwami bengenta timemetelo letichubekako kini, kodvwa nine aningilaleli. ¹⁵ Ngitfumele kini tonkhe tisebenti tami, baprofethi. Bengibatfumela ngalokunganamkhawulo kutsi batewutsi, 'umuntfu ngamunye akagucuke etindleleni takhe letikhohlakele ente tento letinhle; akungabibikho lochubeka ahambe ngemuva kwalabanye bonkulunkulu aphindze abakhonte. Esikhundleni, buyani kulelive lenganiniketa lona nabokhokho benu.' Kepha ngeke ningilalele nobe ninginake. ¹⁶ Ngoba titukulwane taJonadabu indvodzana yaRekhabu tiwugcilnile umyalo wabokhokho babo labaniketa wona, kodvwa letive leti tiyala kungilalela.'' ¹⁷ Ngako Simakadze, Nkulunkulu wemabandla naNkulunkulu waIsrayela, usho naku, 'Bukani, ngiletsa etikwaJuda nakuwonkhe-wonkhe lohlala eJerusalema, tonkhe letehlakalo lengatimemetela etukwabo ngoba ngakhuluma nabo, kodvwa abatange bangilalele; ngababita, kodvwa abatange bangiphendvule.'' ¹⁸ Jeremiya watsi kulomndeni wemaRekabites, ''Simakadze wemabandla, Nkulunkulu waIzrayeli, usho naku: Niyilalele imiyalo yaJonadabu khokho wenu futsi niyigcine yonkhe-nikuhloniphe konkhe loku laniyalete kutsi nikwente- ¹⁹ ngako Simakadze wemabandla, Nkulunkulu waIzrayeli, usho naku, 'Kuyohlala ngaso sonkhe sikhatsi kunemuntfu loyochamuka esitukulwaneni saJonadabu indvodzana yaRekhabu lotokhonta mine.''